ବ୍ରହ୍ମପୁର ଅଫିସ,୧୯ା୫: ବ୍ରହ୍ମପୁର ସଦର ଥାନା ଅନ୍ତର୍ଗତ ନାରାୟଣପୁର ଗ୍ରାମ ନିକଟ କୁରେଇଶୁଣି ମନ୍ଦିର ପାର୍ଶ୍ୱରେ ଥିବା ଏକ ନାଳରୁ ଜଣେ ଯୁବକଙ୍କ ମୃତଦେହ ଗୁରୁବାର ପୋଲିସ ଉଦ୍ଧାର କରିଛି। ସେ ହେଲେ ସଦର ଥାନା ଅଧୀନ ନୂଆ ବଉଳଝୋଳି ଗ୍ରାମର ଦିଲୀପ ମଲିକ(୨୮)। ଖବର ପାଇ ମୃତ ଦିଲୀପଙ୍କ ଭାଇ କାଳୁ ଘଟଣାସ୍ଥଳରେ ପହଞ୍ଚତ୍ ଭାଇଙ୍କ ମୃତଦେହ ଚିହ୍ନଟ କରିଥିଲେ। ମୃତ୍ୟୁର ପ୍ରକୃତ କାରଣ ଜଣାପଡ଼ୁ ନ ଥିବା ବେଳେ ତାଙ୍କୁ କେହି ହତ୍ୟା କରିଥିବା ପରିବାର ଲୋକ ସନ୍ଦେହ କରୁଛନ୍ତି। ଅନ୍ୟପଟେ ପୋଲିସ ମୃତଦେହ ଜବତ କରି ନଂ.୨୭/୨୨ରେ ଅପମୃତ୍ୟୁ ମାମଲା ରୁଜୁ କରିଛି। ବ୍ୟବଚ୍ଛେଦ ରିପୋର୍ଟ ମିଳିବା ପରେ ମୃତ୍ୟୁର କାରଣ ଜଣାପଡ଼ିବ ବୋଲି ପୋଲିସ କହିଛି।
ସୂଚନାନୁଯାୟୀ, ଦିଲୀପ ସୁରଟରେ କାମ କରୁଥିବା ବେଳେ ଗତ ବର୍ଷେ ତଳେ ସିଦ୍ଧେଶ୍ୱର ଗ୍ରାମରେ ତାଙ୍କର ବାହାଘର ହୋଇଥିଲା। ସେ ଗତ କିଛିମାସ ହେଲା ଶ୍ୱଶୁରଘରେ ରହୁଥିଲେ। ବୁଧବାର ଦିଲୀପ ନୂଆ ବଉଳଝୋଳି ଗ୍ରାମକୁ ଆସି ଭାଇଙ୍କ ଘରେ ରହିଥିଲେ। ଅପରାହ୍ନ ୫ଟା ବେଳେ ସେ ତାଙ୍କର ଶ୍ୱଶୁର ଘର ଯିବାକୁ କହି ଭାଇ କାଳୁଙ୍କୁ କହିଥିଲେ। ତେବେ ଗୁରୁବାର ପୂର୍ବାହ୍ନରେ ତାଙ୍କ ମୃତଦେହ ଗଁାଠାରୁ ପ୍ରାୟ ୯ କି.ମି. ନାରାୟଣପୁର ଗ୍ରାମ ନିକଟ ନାଳରେ ପଡ଼ିଥିବା ଜଣାପଡ଼ିଥିଲା। ତାଙ୍କ ଶରୀରରେ ଶାର୍ଟ ନ ଥିବା ବେଳେ ସେ କେବଳ ପ୍ୟାଣ୍ଟ ପିନ୍ଧି ନାଳ ଭିତରେ ପଡ଼ିଥିବା ଦେଖିବାକୁ ମିଳିଥିଲା। ଘଟଣାର ତଦନ୍ତ କରିବା ପାଇଁ କାଳୁ ଓ ଗ୍ରାମବାସୀ ପୋଲିସକୁ ନିବେଦନ କରିଛନ୍ତି ବୋଲି ଜଣାପଡ଼ିଛି।
