ଝାରସୁଗୁଡ଼ା ଅଫିସ୍,୨୬।୪: ଝାରସୁଗୁଡା ଜିଲା କୋଲାବିରା ଥାନା ଅଧୀନ ୪୯ନମ୍ବର ଜାତୀୟ ରାଜପଥ ସିରିଆପାଲି ଛକ ନିକଟରେ ଏକ ଦୁର୍ଘଟଣା ଘଟିଛି। ଏକ ଚୋରା ଡିଜେଲ ବୋଝେଇ ବୋଲେରୋ ଏକ ଟ୍ରକ୍କୁ ଧକ୍କା ଦେଇଥିଲା। ଏଥିରେ ବୋଲେରୋ ଚାଳକଙ୍କ ମୃତ୍ୟୁ ଘଟିଛି। ସେ ହେଲେ ବିହାର ମୁଜାଫରପୁର ଅଞ୍ଚଳର ମହମ୍ମଦ ମୁବାରକ ଆନ୍ସରୀ(୨୪)। ସେ ପରିବାର ସହ ବିଟିଏମ୍ ବାଇପାସ୍ ନିକଟରେ ରହୁଥିଲେ।
ପୋଲିସ ମୃତଦେହ ଜବତ କରି ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରିଛି। ଏନେଇ କୋଲାବିରା ଥାନା ପୋଲିସ ଏକ ମାମଲା (ନଂ.୫୮/୨୨) ରୁଜୁ କରିଛି। ପୋଲିସ ଦୁର୍ଘଟଣାଗ୍ରସ୍ତ ଓଆର୍ ୧୬ସି ୫୦୩୩ ବୋଲେରୋ, ଓଡି ୦୯ ଏନ୍ ୨୨୮୪ନମ୍ବର ଟ୍ରକ୍କୁ ମଧ୍ୟ ଜବତ କରିଛି। ଏହା ସହିତ ଦୁର୍ଘଟଣାଗ୍ରସ୍ତ ବୋଲେରୋରେ ବୋଝେଇ ହୋଇଥିବା ୩ ଜାର୍କିନ ଡିଜେଲ୍କୁ ପୋଲିସ ଜବତ କରିଛି। ଡିଜେଲ ଚୋରି ଘଟଣାରେ ସମ୍ପୃକ୍ତ ଥିବା ସନ୍ଦେହ କରି ପୋଲିସ ଆଉ ଏକ ବୋଲେରୋ ସହିତ ଚାଳକଙ୍କୁ ଥାନାରେ ଅଟକ ରଖି ପଚରାଉଚରା ଚଳାଇଛି । ଦୁର୍ଘଟଣାଗ୍ରସ୍ତ ବୋଲେରୋ ଗାଡି କୋଲାବିରାରୁ ଝାରସୁଗୁଡା ଯାଉଥିଲା। ସିରିଆପାଲି ଛକ ନିକଟରେ ଭାରସାମ୍ୟ ହରାଇ ଆଗରୁ ଆସୁଥିବା ଟ୍ରକ୍କୁ ଧକ୍କା ଦେଇଥିଲା। ଫଳରେ ବୋଲେରୋ ସମ୍ପୂର୍ଣ୍ଣ ଭାଙ୍ଗିରୁଜି ଯାଇଛି।