କୌଣସି ଫିଲ୍ମର ଶୁଟିଂ କାର୍ଯ୍ୟ ଶେଷ ହେବା ପରେ ଏହାର ପ୍ରମୋଶନରେ ଲାଗିପଡ଼ନ୍ତି ସମସ୍ତ କଳାକାର। ଏଥିରେ କଳାକାରମାନେ କୌଣସି ଅଭାବ ମଧ୍ୟ ରଖନ୍ତି ନାହିଁ। ଏମିତି କିଛି ଘଟିଛି ଅଭିନେତା ରାଜକୁମାର ରାଓଙ୍କ ସହ। ରାଜକୁମାରଙ୍କୁ ଫିଲ୍ମ ‘ରୋହି’ରେ ଜାହ୍ନବୀ କପୁର ଏବଂ ବରୁଣ ଶର୍ମାଙ୍କ ସହ ଦେଖିବାକୁ ମିଳିଛି। ଇତିମଧ୍ୟରେ ଫିଲ୍ମଟି ରିଲିଜ ହୋଇସାରିଛି। ମାତ୍ର ଅଭିନେତା ଲଗାତାର ଭାବେ ଫିଲ୍ମର ପ୍ରମୋଶନ କରିବାରେ ଲାଗିଛନ୍ତି। ‘ରୋହି’ ରିଲିଜ୍ ହେବା ପରେ ରାଜକୁମାର ଗୁରୁବାର ଦିଲ୍ଲୀର ଏକ ପିଭିଆର୍ରେ ପହଞ୍ଚିଥିଲେ। ମଲ୍ଟିପ୍ଲେକ୍ସରେ ପହଞ୍ଚିବା ପରେ ଅଭିନେତା ବୁକିଂ କାଉଣ୍ଟରରେ ଦର୍ଶକଙ୍କୁ ଟିକେଟ କାଟି ଦେଇଥିଲେ। ଲୋକମାନେ ଫିଲ୍ମ କାଉଣ୍ଟରରେ ରାଜକୁମାରଙ୍କୁ ଦେଖି ଖୁସିରେ ପାଗଳ ହୋଇଯାଇଥିଲେ। ରାଜକୁମାରଙ୍କୁ ଦେଖିବା ପରେ ପ୍ରଶଂସକଙ୍କ ଉତ୍ସାହ ଦ୍ୱିଗୁଣିତ ହୋଇଯାଇଥିଲା। ପ୍ରଶଂସକଙ୍କ ସହ କଥାବାର୍ତ୍ତା କରି ରାଜକୁମାର ତାଙ୍କ ଫିଲ୍ମ ଦେଖିବା ପାଇଁ ଏବଂ ପରିବାର, ସାଙ୍ଗସାଥୀଙ୍କୁ ଦେଖାଇବା ପାଇଁ ସମସ୍ତଙ୍କୁ ନିବେଦନ କରିଥିଲେ।