ବଲିଉଡ୍ ଅଭିନେତା ସୋନୁ ସୁଦ କରୋନା ସମୟରେ ପ୍ରବାସୀ ଶ୍ରମିକ ତଥା ଅସହାୟ ଲୋକଙ୍କୁ ସାହାଯ୍ୟ କରି ଖୁବ୍ ଚର୍ଚ୍ଚାରେ ରହିଛନ୍ତି। ଏଥିପାଇଁ କିଛି ଲୋକ ତାଙ୍କୁ ଭଗବାନ ଭଳି ପୂଜା ମଧ୍ୟ କରୁଛନ୍ତି। ମାତ୍ର ଏବେ କିଛି ଦିନ ହେବ ତାଙ୍କୁ ସୋସିଆଲ ମିଡିଆରେ ଟ୍ରୋଲ କରାଯାଉଛି। ସୋନୁଙ୍କୁ ୨୦୨୦ର ସବୁଠାରୁ ବଡ ସ୍କାନର ବୋଲି କୁହାଯାଉଛି। ଏହା ପରେ ସୋନୁଙ୍କ ଦ୍ୱାରା ସହାୟତା ପାଇଥିବା ଅନେକ ଲୋକ ସେମାନଙ୍କ ଟୁଇଟ୍ ଏବଂ ଆକାଉଣ୍ଟ ଡିଲିଟ୍ ମଧ୍ୟ କରିଦେଉଥିବା କୁହାଯାଉଛି।
ଏ ନେଇ ସୋନୁ ଏବେ ମୁହଁ ଖୋଲିଛନ୍ତି। ସେ କହିଛନ୍ତି, ଏହା ସବୁକିଛି ଟ୍ରୋଲ୍ସ ମାତ୍ର। ଯାହା ହଠାତ୍ ସୋସିଆଲ ମିଡିଆରେ ଭାଇରାଲ ହେଉଛି। ସେମାନେ ବାସ୍ତବ ଜୀବନରେ ବିଦ୍ୟମାନ ନୁହନ୍ତି। ସେମାନେ କ’ଣ ସବୁ ଲେଖଛନ୍ତି ମୁଁ ଦେଖିନାହିଁ। ଏ ସବୁ ପାଇଁ ମୋ ପାଖରେ ଆଦୌ ହେଲେ ସମୟ ନାହିଁ ବୋଲି ସୋନୁ କହିଛନ୍ତି।
ଆହୁରି ମଧ୍ୟ ସେ କହିଛନ୍ତି, କିଛି ଦିନ ପୂର୍ବେ ଜଣେ ବ୍ୟକ୍ତି କହିଥିଲେ ସୋନୁ ବିଦେଶରୁ କାହାକୁ ଆଣି ନାହାନ୍ତି। କେବଳ ମିଛ କୁହାଯାଉଛି ବୋଲି ସେ କହିଥିଲେ। ଏହାପରେ ଜଣେ ଛାତ୍ର ନିଜ କଲେଜ ନାମ ସୋସିଆଲ ମିଡିଆରେ ଶେୟାର କରିବା ସହ ବୋର୍ଡିଂ ପାସ୍ ଏବଂ ଫ୍ଲାଇଟ୍ ନମ୍ବର ମଧ୍ୟ ଦେଇଥିଲେ। ଏହାପରେ ଉକ୍ତ ଟ୍ରୋଲରମାନେ କୁଆଡେ ଗାଏବ ହୋଇଯାଇଥିଲେ। ଏହି ଟ୍ରୋଲମାନଙ୍କୁ ଟଙ୍କା ମିଳିଥାଏ, ତେଣୁ ସେମାନେ ଶହ ଶହ ଆକାଉଣ୍ଟ ଚଲାଇଥାନ୍ତି ବୋଲି ସୋନୁ କହିଛନ୍ତି।