ବଲିଉଡ୍ ଅଭିନେତ୍ରୀ ତୃପ୍ତି ଶଙ୍ଖଧରଙ୍କ ଜୀବନପ୍ରତି ବିପଦ ରହିଛି। ଏ ନେଇ ତୃପ୍ତି ଇନ୍ଷ୍ଟାଗ୍ରାମ୍ରେ ଏକ ଭିଡିଓ ପୋଷ୍ଟକରି ଏହି ସୂଚନା ଦେଇଛନ୍ତି। ହେଲେ ଖାସ୍ କଥା ହେଲା, ଜୀବନପ୍ରତି ବିପଦ ତାଙ୍କ ବାପାଙ୍କଠାରୁ ରହିଛି। ନିଜ ବାପାଙ୍କ ଉପରେ ମାରପିଟ ଅଭିଯୋଗ ଆଣିଛନ୍ତି ତୃପ୍ତି। ଖୁବ୍ଶୀଘ୍ର ଏହାର ସମାଧାନ କରା ନ ଗଲେ ତାଙ୍କ ସହ ତାଙ୍କ ମା’ଙ୍କ ଜୀବନ ଚାଲିଯିବ ବୋଲି ମଧ୍ୟ ସେ କହିଛନ୍ତି। ଏଥିପାଇଁ ସେ ଘରୁ ନିଜ ମା’ଙ୍କ ସହ ଚାଲିଯାଇଛନ୍ତି।
ତୃପ୍ତିଙ୍କ ବାପା ହେଉଛନ୍ତି ରତନ ଶଙ୍ଖଧର। ସେ ଝିଅ ତୃପ୍ତିଙ୍କୁ ମୁମ୍ବାଇ ପଠାଇଥିଲେ। ଇତିମଧ୍ୟରେ ତାଙ୍କର ମାତ୍ର ଗୋଟିଏ ଫିଲ୍ମ ରିଲିଜ୍ ହୋଇଛି। ଏବେ ସେ ଝିଅର ବିବାହ କରିଦେବାକୁ ଚାହୁଁଛନ୍ତି। ଏଥିପାଇଁ ଝିଅକୁ ନିର୍ଯାତନା ମଧ୍ୟ ଦେଉଥିଲେ। ବିବାହ ନ କଲେ ଜୀବନରୁ ମାରିଦେବାକୁ ଧମକ ଦେଉଥିବା ତୃପ୍ତି କହିଛନ୍ତି। ମା’ଙ୍କୁ ମଧ୍ୟ ସେ ସବୁବେଳେ ମାଡ ମାରୁଥିଲେ। ଏଥିପାଇଁ ତୃପ୍ତି ପୋଲିସକୁ ଜଣାଇଥିଲେ। ମାତ୍ର କିଛି ଲାଭ ହେଲା ନାହିଁ। ତେଣୁ ସେ ମା’ଙ୍କ ସହ ଘର ଛାଡି ଚାଲିଯାଇଛନ୍ତି। ଇନ୍ଷ୍ଟାଗ୍ରାମ୍ରେ ତୃପ୍ତି ୨ଟି ଭିଡିଓ ପୋଷ୍ଟକରି ଏହା କହିଛନ୍ତି। ହେଲେ ପରେ ସେ ଉକ୍ତ ଭିଡିଓକୁ ଡିଲିଟ୍ କରିଦେଇଛନ୍ତି।
ତୃପ୍ତି ଏକତା କପୁରଙ୍କ ଧାରାବାହିକ ‘କୁମ୍କୁମ୍ ଭାଗ୍ୟ’ରୁ ଅଭିନୟ କ୍ୟାରିୟର ଆରମ୍ଭ କରିଥିଲେ। ଏଥିସହ ସେ ଦେବ୍-୨, ପରମାତ୍ମା ଶ୍ରୀକୃଷ୍ଣ, ଜିନ୍ଦେଗି ୟୁ ଟର୍ଣ୍ଣ, କସୌଟି ଜିନ୍ଦେଗୀ କି-୨ ଆଦି ଧାରାବାହିକରେ କାମ କରିଛନ୍ତି। ସେ ଫିଲ୍ମ ‘ଜଜ୍ମେଣ୍ଟଲ ହୈ କ୍ୟା’ରେ କାମ କରିଛନ୍ତି। ଏଥିରେ ରାଜକୁମାର ରାଓ ଏବଂ କଙ୍ଗନା ରନାଓ୍ବତ୍ ମୁଖ୍ୟ ଭୂମିକାରେ ଅଭିନୟ କରିଥିଲେ।