ଲକ୍ଷ୍ନୌ,୨୧ା୪: ୨୦୨୩ ଫେବୃୟାରୀ ୨୪। ପ୍ରୟାଗରାଜର ଧୂମାନଗରରେ ରାଜୁ ପାଲ୍ ହତ୍ୟାକାଣ୍ଡର ମୁଖ୍ୟ ସାକ୍ଷୀ ଉମେଶ ପାଲ୍ଙ୍କୁ ଟାର୍ଗେଟ କରାଯାଇଥିଲା। ଗ୍ୟାଙ୍ଗ୍ଷ୍ଟର ଅତିକ୍ ଅହମ୍ମଦଙ୍କ ପୁଅ ଅସଦ ଅହମ୍ମଦ ଓ ଶାର୍ପ ଶୁଟର ଗୁଲାମ ମହମ୍ମଦ (ଏନ୍କାଉଣ୍ଟରରେ ଉଭୟେ ମୃତ) ଗୁଳି ଚଳାଉଥିବାବେଳେ ଉମେଶଙ୍କ ଉପରକୁ ତୁହାକୁ ତୁହା ବୋମା ଫିଙ୍ଗୁଥିଲେ ଧଳା ଶାର୍ଟ, କଳା ପ୍ୟାଣ୍ଟ ଓ ସ୍ପୋଟର୍ସ ସୁଜ୍ ପିନ୍ଧି ବାଇକ୍ରେ ଆସିଥିବା ଜଣେ ମଧ୍ୟବୟସ୍କ। ଏହି ଆକ୍ରମଣରେ ଯୁବ ଆଇନଜୀବୀ ଉମେଶ ଏବଂ ତାଙ୍କ ୨ ପୋଲିସ ସୁରକ୍ଷା ଗାର୍ଡ ସନ୍ଦୀପ ନିଷାଦ ଓ ରାଘବେନ୍ଦ୍ର ସିଂ ମଧ୍ୟ ପ୍ରାଣ ହରାଇଥିଲେ। ଉମେଶଙ୍କୁ ତାଙ୍କ ଘର ବାହାରେ ହତ୍ୟା କରାଯିବାର ଦୃଶ୍ୟ ସିସିଟିଭି କ୍ୟାମେରାରେ କଏଦ୍ ହୋଇଥିଲା। ଫୁଟେଜ୍ ଅଣ୍ଡାଳିବା ପରେ ଉତ୍ତର ପ୍ରଦେଶ ସ୍ପେଶାଲ ଟାସ୍କ ଫୋର୍ସ (ଏସ୍ଟିଏଫ୍) ଚିହ୍ନିପାରିଥିଲା ଗୁଡ୍ଡୁ ମୁସ୍ଲିମ୍ଙ୍କୁ। ମୋଷ୍ଟ ଓ୍ବାଣ୍ଟେଡ୍ ଗୁଡ୍ଡୁ ସେହିଦିନ ମିରଟରେ ଅତିକ୍ଙ୍କ ସମ୍ପର୍କୀୟଙ୍କଠାରୁ ଟଙ୍କା ନେଇ ଦିଲ୍ଲୀ ଫେରାର ହୋଇଯାଇଥିଲେ। ତାଙ୍କୁ ଧରାଇଦେଲେ ୫ ଲକ୍ଷ ଟଙ୍କା ପୁରସ୍କାର ଦିଆଯିବ ବୋଲି ୟୁପି ପୋଲିସ ଘୋଷଣା କରିଥିଲା।
୫୦ ବର୍ଷୀୟ ଗୁଡ୍ଡୁ ମୁସ୍ଲିମ ୟୁପିରେ ଆତଙ୍କର ଅନ୍ୟନାମ। କୁହାଯାଏ ଅତିକ୍ ଓ ତାଙ୍କ ଭାଇ ଅଶ୍ରଫ୍ ଅହମ୍ମଦ ଯାହା ଯୋଜନା କରୁଥିଲେ ସେସବୁକୁ ଗୁଡ୍ଡୁ ହିଁ କାର୍ଯ୍ୟକାରୀ କରୁଥିଲେ। ଦୁଇଭାଇ ଜେଲ ଯିବା ପରେ ଅତିକ୍ଙ୍କ ସ୍ତ୍ରୀ ଶାଇସ୍ତା ସମ୍ଭାଳୁଥିଲେ ଅତିକ୍ ଅହମ୍ମଦଙ୍କ କ୍ରାଇମ୍ ସିଣ୍ଡିକେଟ୍। କେଉଁଠୁ କେତେ ଟଙ୍କା ଆସିବ। କାହାଠାରୁ କେତେ ଅସୁଲ କରାଯିବ ସବୁ ଶାଇସ୍ତାଙ୍କ ଇଶାରାରେ ସ୍ଥିର ହେଉଥିଲା। ସେପଟେ ଫେରାର ଥିବା ଗୁଡ୍ଡୁ ମଧ୍ୟ ଏକ ସମାନ୍ତରାଳ ଗ୍ୟାଙ୍ଗ୍ ଗଢ଼ି ବ୍ୟବସାୟୀ, ଠିକାଦାର ଓ ନେତାଙ୍କଠାରୁ ବେଆଇନ ବଟି ଅସୁଲି କରୁଥିଲେ। ସମ୍ଭବତଃ ଏହି କାରଣରୁ ଶାଇସ୍ତା ଓ ଗୁଡ୍ଡୁଙ୍କ ମଧ୍ୟରେ ଶତ୍ରୁତା ବଢ଼ିଥିଲା। ଦିନେ ଅତିକ୍ଙ୍କ ଅତି ଘନିଷ୍ଠ ଥିବା ଗୁଡ୍ଡୁ ମୁସ୍ଲିମ ଶେଷରେ ତାଙ୍କୁ ହତ୍ୟା କରାଇଥିବା କୁହାଯାଉଛି, ଯାହାର କାରଣ ଖୋଜୁଛି ୟୁପି ଏସ୍ଟିଏଫ୍।