ତିଗିରିଆ,୪। ୩(ଡି. ଏନ. ଏ. ): ତିଗିରିଆ ବ୍ଲକର ବିଭିନ୍ନ ପଞ୍ଚାୟତରେ ମହିଳା ଗୋଷ୍ଠୀ କର୍ମକର୍ତ୍ତା ନିଯୁକ୍ତିରେ ଅନିୟମିତତା ହୋଇଥିବା ଅଭିଯୋଗ କରି ଶୁକ୍ରବାର ବ୍ଲକ କାର୍ଯ୍ୟାଳୟ ଘେରାଉ କରାଯାଇଥିଲା। ଆନ୍ଦୋଳନକାରୀମାନେ ଯେଉଁ ଗାଡ଼ିରେ ଆସିଥିଲେ ତା’ଉପରକୁ ବୋମାମାଡ଼ ହୋଇଥିବା ଅଭିଯୋଗ ହୋଇଛି। ଏନେଇ ତିଗିରିଆ ଥାନାରେ ମାମଲା (ନଂ. ୪୩/୨୩) ରୁଜୁ ହୋଇଛି। ତିଗିରିଆ ବ୍ଲକର ବିଭିନ୍ନ ପଞ୍ଚାୟତର ମିଶନ ଶକ୍ତି ଅଧୀନରେ ନିର୍ବାଚିତ ଲୋକ ପ୍ରତିନିଧିମାନଙ୍କୁ ବେଆଇନ ଭାବେ ନିଯୁକ୍ତି ଦିଆଯାଇଥିବା ଅଭିଯୋଗ କରି ଅପରାହ୍ନରେ ବହୁ ମହିଳା ଓ ପୁରୁଷ ବ୍ଲକ କାର୍ଯ୍ୟାଳୟ ସମ୍ମୁଖରେ ପହଞ୍ଚତ୍ ବିକ୍ଷୋଭ ପ୍ରଦର୍ଶନ କରିଥିଲେ। ଆଠଗଡ଼ର ବିଜେଡିର ଯୁବ ସଙ୍ଗଠକ ଅଭୟ ବାରିକ ଏହାର ନେତୃତ୍ୱ ନେଇଥିଲେ। ଖବରପାଇ ତିଗିରିଆ ବିଡିଓ ପ୍ରଣବ କୁମାର ବେହେରା ପହଞ୍ଚି ଯେଉଁମାନେ ନିଯୁକ୍ତି ପାଇଛନ୍ତି ସେମାନେ ଇସ୍ତଫା ଦେଇଥିବା କହିଥିଲେ। ଶନିବାର ଅପରାହ୍ନରେ ସେମାନଙ୍କ ଇସ୍ତଫାପତ୍ର ଯୁବ ସଙ୍ଗଠକଙ୍କୁ ପ୍ରଦାନ କରାଯିବ ବୋଲି କହିବା ପରେ ଆନ୍ଦୋଳନକାରୀମାନେ ଫେରିଯାଇଥିଲେ। ଏହାପରେ ଆନ୍ଦୋଳନକାରୀ ଆସିଥିବା ଏକ ସ୍କର୍ପିଓ ଏବଂ ଅଟୋ ନିକଟସ୍ଥ ଶିବ ମନ୍ଦିର ପାଖରେ ଥୁଆ ହୋଇଥିଲା। ଏହି ସମୟରେ ୨ ଜଣ ଦୃର୍ବୃତ୍ତ ହେଲ୍ମେଟ୍ ପିନ୍ଧି ଏକ ସ୍କୁଟିରେ ଆସି ଉକ୍ତ ଗାଡ଼ି ଉପରକୁ ବୋମାମାଡ଼ କରି ପଳାଇଯାଇଥିଲେ। ଏଥିରେ ସ୍କର୍ପିଓର ପଛ କାଚ ଭାଙ୍ଗିଯାଇଥିବାବେଳେ ଅଟୋର ଚକରେ ବୋମା ବାଜିଛି। ମାତ୍ର ବିଶେଷ କିଛି କ୍ଷୟକ୍ଷତି ହୋଇନାହିଁ। ସେହି ସମୟରେ ଗାଡ଼ିରେ କେହି ନ ଥିବାରୁ କାହାର କୌଣସି କ୍ଷତି ହୋଇନାହିଁ। ଏନେଇ ଅଭୟ ଥାନାରେ ଅଭିଯୋଗ କରିବା ପରେ ଆଠଗଡ ଡିଏସ୍ପି ବିଜୟ କୁମାର ବିଶି, ତିଗିରିଆ ଆଇଆଇସି ସୁଚିତ୍ରା ଜେନା, କାନପୁର ଆଇଆଇସି ରବୀନ୍ଦ୍ର ଭୁଜବଳ ଘଟଣାସ୍ଥଳରେ ପହଞ୍ଚତ୍ ତଦନ୍ତ କରିଛନ୍ତି। ଖୁବ୍ଶୀଘ୍ର ଅଭିଯୁକ୍ତଙ୍କୁ ଗିରଫ କରାଯିବ ବୋଲି ପୋଲିସ କହିଛି।
