ପଣଜୀ,୨୧।୧ : ରୁଷିଆର ରାଜଧାନୀ ମସ୍କୋରୁ ଗୋଆକୁ ଆସୁଥିବା ଏକ ଚାର୍ଟାର୍ଡ ବିମାନରେ ଏକ ବୋମା ଥିବା ନେଇ ଆତଙ୍କ ସୃଷ୍ଟି ହୋଇଛି। ଏହା ପରେ ବିମାନକୁ ଉଜବେକିସ୍ତାନକୁ ପଠାଯାଇଥିଲା। ସେଠାରେ ବିମାନ ଜରୁରୀ ଅବତରଣ କରିଥିଲା। ପୋଲିସର ସୂଚନାନୁସାରେ ବିମାନରେ ୨୪୦ ଜଣ ଯାତ୍ରୀ ଥିଲେ। ଖବର ମୁତାବକ ଏହି ବିମାନଟି ଦକ୍ଷିଣ ଗୋଆର ଦବୋଲିମ ବିମାନବନ୍ଦରରେ ଭୋର ୪ଟା ୧୫ରେ ଅବତରଣ କରିବାର ଥିଲା। କୁହାଯାଇଛି ଯେ ଯାତ୍ରୀଙ୍କ ବ୍ୟତୀତ ବିମାନରେ ୭ ଜଣ କ୍ରୁ ସଦସ୍ୟ ମଧ୍ୟ ଅଛନ୍ତି।
ଖବର ଅନୁଯାୟୀ, ଆଜୁର୍ ଏୟାର ଦ୍ୱାରା ପରିଚାଳିତ ବିମାନ ଏଜେଡଭି-୨୪୬୩ ଭାରତୀୟ ଭାରତୀୟ ବିମାନ ବନ୍ଦରରେ ପହଞ୍ଚିବା ପୂର୍ବରୁ ଡାଇଭର୍ଟ କରାଯାଇଥିଲା। ଅଧିକାରୀଙ୍କ ଅନୁଯାୟୀ, ରାତି ପ୍ରାୟ ୧୨ ଟା୩୦ରେ ସମୟରେ ଏକ ଇମେଲ ମାଧ୍ୟମରେ ଏହି ବିମାନରେ ବୋମା ଥିବା ବିଷୟରେ ସବୋଲିମ ବିମାନବନ୍ଦର ନିର୍ଦ୍ଦେଶକଙ୍କୁ ସୂଚନା ଦିଆଯାଇଥିଲା। ଏହା ପରେ ହିଁ ଏହାକୁ ଡାଇଭର୍ଟ କରାଯାଇଥିଲା ।
ଏହାପରେ ଗାଆ ବିମାନ ବନ୍ଦରରେ ସୁରକ୍ଷା ବ୍ୟବସ୍ଥା ବୃଦ୍ଧି ପାଇଛି। ଭାସ୍କୋ ଡେପୁଟି ଏସପି ସଲିମ ଶେଖଙ୍କ ଅନୁଯାୟୀ ଗୋଆ ପୋଲିସ, କୁଇକ ରେସପନ୍ସ ଟିମ (କ୍ୟୁଆରଟି) ଏବଂ ଆତଙ୍କବାଦ ନିରୋଧୀ ସ୍କ୍ବାଡ (ଏଟିଏସ) ସହିତ ବୋମା ଏବଂ ଡଗ ସ୍କ୍ବାଡକୁ ସତର୍କ ରଖାଯାଇଛି।
ସୂଚନାଯୋଗ୍ୟ ଯେ ଦୁଇ ସପ୍ତାହ ପୂର୍ବରୁ ମସ୍କୋରୁ ଗୋଆକୁ ଆସୁଥିବା ଆଜୁର ଏୟାରଲାଇନ୍ସର ଏକ ବିମାନରେ ବୋମା ଥିବା ବିଷୟରେ ମଧ୍ୟ ସୂଚନା ମିଳିଥିଲା। ଏହା ପରେ ଗୁଜରାଟର ଜାମନଗରରେ ବିମାନର ଜରୁରୀ ଅବତରଣ କରାଯାଇଥିଲା। ତେବେ ଏହି ବୋମା ସମ୍ବନ୍ଧୀୟ ତଥ୍ୟ ଗୁଜବ ବୋଲି ଜଣାପଡିଥିଲା।