ରାୟଗଡ଼ା ଅଫିସ,୧୦ା୧୨: ରାୟଗଡ଼ା ଜିଲା କାଶୀପୁର ବ୍ଲକ ଅନ୍ତର୍ଗତ ସୁଙ୍ଗେର ଗ୍ରାମରେ ବୁଧବାର ଜଣେ ବ୍ୟକ୍ତିଙ୍କ ଘର ପଛପାର୍ଶ୍ୱ ପାଇଖାନାରେ ବୋମା ଲୁଚାଇ ରଖାଯାଇଥିବା ମାମଲାରେ ପୋଲିସ ୬ ଅଭିଯୁକ୍ତଙ୍କୁ ଗିରଫ କରିଛି। ମାଓବାଦୀ ପରିଚ ଦେଇ ଜଣେ ବ୍ୟକ୍ତିଙ୍କୁ ହତ୍ୟା କରିବା ଉଦ୍ଦେଶ୍ୟରେ ବୋମା ରଖାଯାଇଥିଲା ବୋଲି ଏସ୍ପି ବିବେକାନନ୍ଦ ଶର୍ମା ଶୁକ୍ରବାର ଗଣମାଧ୍ୟମକୁ ସୂଚନା ଦେଇଛନ୍ତି।
ସୂଚନାଯୋଗ୍ୟ, ଜଣେ ବ୍ୟକ୍ତିଙ୍କୁ ମାଓବାଦୀର ପରିଚୟ ଦେଇ ଅଭିଯୁକ୍ତମାନେ ୫ ଲକ୍ଷ ଟଙ୍କା ମାଗିଥିଲେ। ଟଙ୍କା ନ ଦେଲେ ହତ୍ୟା କରିବାକୁ ତାଙ୍କୁ ଧମକ ଦେଇଥିଲେ। ଏ ନେଇ ଧମକର ଶିକାର ହୋଇଥିବା ବ୍ୟକ୍ତି ପୋଲିସକୁ ଜଣାଇଥିଲେ। ପରେ ଅଭିଯୋଗକାରୀଙ୍କୁ ହତ୍ୟା କରିବା ଉଦ୍ଦେଶ୍ୟରେ ବୋମା ରଖାଯାଇଥିବା ପୋଲିସ ସୂଚନା ପାଇଥିଲା। ଜିଲା ପୋଲିସ, ସିଆର୍ପିଏଫ୍ ଏବଂ ଡିଭିଏଫ୍ ଯବାନ ବହୁ ଖୋଜାଖୋଜି କରି ପାଇଖାନାରୁ ବୋମାକୁ ଠାବ କରିଥିଲେ। ବୋମା ନିଷ୍କ୍ରିୟକାରୀ ଦଳ ସତର୍କତାର ସହ ବୋମାକୁ ନିଷ୍କ୍ରିୟ କରିଥିଲେ। ପୋଲିସ ରାୟଗଡ଼ା ଏବଂ କଳାହାଣ୍ଡି ଜିଲାର ବିଭିନ୍ନ ସ୍ଥାନରେ ଚଢ଼ାଉ କରି ୬ ଅଭିଯୁକ୍ତଙ୍କୁ ଗିରଫ କରିଛି। ନିଷ୍କ୍ରିୟ କରାଯାଇଥିବା ବୋମା ୨୦୦ ଗ୍ରାମ୍ର ୫ ଜିଲୋଟିନ୍, ୧୦ ଟି ଇଲେକ୍ଟ୍ରୋନିକ୍ ଡିଟୋନେଟର୍, ୫ ମିଟର ବିଦ୍ୟୁତ୍ ତାରରେ ବୋମା ପ୍ରସ୍ତୁତ ହେଇଥିବା ପୋଲିସ ସୂଚନା ଦେଇଛି। ଅଭିଯୁକ୍ତଙ୍କ ଠାରୁ ୪ଟି ମୋବାଇଲ, ସିଲିଣ୍ଡର ଏବଂ ଡିଜିଟାଲ ୱାଚ୍ ଜବତ କରାଯାଇଛି। ଏ ନେଇ ୧୫୯/୨୨ରେ ପୋଲିସ ଏକ ମାମଲା ରୁଜୁକରି ଅଧିକ ତଦନ୍ତ ଜାରି ରଖିଛି। ଅଭିଯୁକ୍ତମାନେ ପୂର୍ବରୁ ଯୋଜନା ପ୍ରସ୍ତୁତ କରି ବୋମା ପ୍ରସ୍ତୁତି ନିମନ୍ତେ ବାହାର ରାଜ୍ୟରୁ ସମସ୍ତ ସାମଗ୍ରୀ ଆଣିଥିବା ସନ୍ଦେହ କରାଯାଉଛି। ବୋମା ଠାବ, ନିଷ୍କ୍ରିୟ ଏବଂ ତଦନ୍ତରେ ରାୟଗଡ଼ା ଏସ୍ଡିପିଓ ଦେବଜ୍ୟୋତି ଦାସ, କାଶୀପୁର ଥାନା ଅଧିକାରୀ ପଦ୍ମା ମୁଥୁ ପ୍ରମୁଖ ସାମିଲ ଥିବା ଏସ୍ପି ସୂଚନା ଦେଇଛନ୍ତି। ତେବେ ଅଭିଯୁକ୍ତଙ୍କ ନାମ ଏବଂ ଠିକଣା ବିଷୟରେ ପୋଲିସ ସୂଚନା ଦେଇନାହିଁ।
