ମୁମ୍ବାଇ,୨୧ ।୧୦: କ୍ରୁଜ ଡ୍ରଗ୍ସ ମାମଲାରେ ଫସି ଥିବା ବଲିଉଡ୍ ବାଦଶାହା ଶାହାରୁଖ ଖାଁଙ୍କ ପୁଅ ଆର୍ଯ୍ୟନ ଖାଁଙ୍କ ଅଡୁଆ ବଢି ବଢି ଚାଲିଛି । ଗୁରୁବାର ତାଙ୍କ ଜାମିନ ଆବେଦନର ଶୁଣାଣି ଥିବା ବେଳେ ଏହାକୁ ପୁଣିଥରେ ୨୬ ଅକ୍ଟୋବରକୁ ଘୁଞ୍ଚାଇ ଦିଆଯାଇଛି । ଏବେ ଅକ୍ଟୋବର ୨୬ ପର୍ଯ୍ୟନ୍ତ ସେ ଜେଲରେ ରହିବେ । ମଙ୍ଗଳବାର ବମ୍ବେ ହାଇକୋର୍ଟରେ ଏହାର ଶୁଣାଣି କରାଯିବ । ଜାମିନ ନ ମିଳିବା ପର୍ଯ୍ୟନ୍ତ ଆର୍ଯ୍ୟନ ଜେଲରେ ହିଁ ରହିବେ । ସୂଚନାଯୋଗ୍ୟ, ଆର୍ଯ୍ୟନ ଖାଁ, ଅରବାଜ ମର୍ଚାଣ୍ଟ ଓ ମୁନମୁନ ଧମେଚାଙ୍କୁ ମାଦକ ଦ୍ରବ୍ୟ ରଖିବା, ସେବନ କରିବା ଓ କାରବାର କରିବା ଅଭିଯୋଗରେ ଏନ୍ସିବି ଅକ୍ଟୋବର ୩ରେ ଗିରଫ କରିଥିଲା । ଦୀର୍ଘ ପ୍ରାୟ ୧୭ ଦିନ ପରେ ଗୁରୁବାର ଆର୍ଯ୍ୟନଙ୍କ ପିତା ଶାହାରୁଖ ତାଙ୍କୁ ଦେଖା କରିବାକୁ ଜେଲ ଯାଇଥିଲେ । ସୂଚନାଯୋଗ୍ୟ, ବୁଧବାର ବିଶେଷ ଏନ୍ଡିପିଏସ୍ କୋର୍ଟ ଆର୍ଯ୍ୟନଙ୍କ ସମେତ ଅନ୍ୟ ଅଭିଯୁକ୍ତଙ୍କ ଜାମିନ ଆବେଦନକୁ ଖାରଜ କରି ଦେଇଥିଲେ । ଏହାପରେ ଆର୍ଯ୍ୟନଙ୍କ ଓକିଲ ତୁରନ୍ତ ବମ୍ବେ ହାଇକୋର୍ଟରେ ଅପିଲ କରି ତଳ କୋର୍ଟଙ୍କୁ ଚ୍ୟାଲେଞ୍ଜ ଦେଇଥିଲେ ।