ଖୋର୍ଦ୍ଧା ଅଫିସ,୨୫ା୧୨: ଖୋର୍ଦ୍ଧା ଜିଲା ଜଙ୍କିଆ ଥାନା ଅଧୀନ ମଳିପଡ଼ା ଗ୍ରାମର ଜଣେ ଯବାନଙ୍କ ଘରେ ଶୁକ୍ରବାର ରାତିରେ ବୋମାମାଡ଼ ହୋଇଛି। ସାମାନ୍ୟ ବଚସାକୁ ନେଇ ୧୦ଜଣ ଯୁବକ ଯବାନ ଭାଗୀରଥି ପାହାଡସିଂଙ୍କ ଘରେ ବୋମାମାଡ଼ କରିବା ସହ ଆସବାବପତ୍ର ନଷ୍ଟ କରିଦେଇଛନ୍ତି। ଏପରି କି ଯୁବକମାନେ ଭାଗୀରଥି ଓ ତାଙ୍କ ବାପା ମଦନମୋହନଙ୍କୁ ଖଣ୍ଡାରେ ଆକ୍ରମଣ କରିଥିଲେ। ଚିକିତ୍ସା ପାଇଁ ଉଭୟଙ୍କୁ ମେଡିକାଲରେ ଭର୍ତ୍ତି କରାଯାଇଛି। ଦିନରେ ଏକ ଭୋଜି ବେଳେ ହୋଇଥିବା ବଚସାକୁ ନେଇ ଏହି ବୋମାମାଡ଼ ହୋଇଥିବା ଜଣାପଡ଼ିଛି। ଅନ୍ୟପକ୍ଷରେ ଏନେଇ ଭାଗୀରଥିଙ୍କ ଅଭିଯୋଗକ୍ରମେ ଶନିବାର ପୋଲିସ ଏକ ମାମଲା ରୁଜୁକରି ତଦନ୍ତ ଚଳାଇଛି।
ଅଭିଯୋଗ ମୁତାବକ, ଭାଗୀରଥି ବିଏସ୍ଏଫ୍ ଯବାନ ଭାବେ କଶ୍ମୀରଠାରେ କାର୍ଯ୍ୟରତ ଅଛନ୍ତି। ଗତ ୧୪ତାରିଖରେ ସେ ଛୁଟିରେ ଘରକୁ ଆସିଥିଲେ। ଶୁକ୍ରବାର ସକାଳେ ମଳିପଡାସ୍ଥିତ ଭଗବତୀ ମନ୍ଦିର ପରିସରରେ ଭାଗୀରଥି ସମସ୍ତ ସାଙ୍ଗସାଥିଙ୍କୁ ନେଇ ବନ୍ଧୁମିଳନ କାର୍ଯ୍ୟକ୍ରମ ଆୟୋଜନ କରିଥିଲେ। ସେଠାରେ ଅନ୍ୟ ଏକ ଗୋଷ୍ଠୀର ପ୍ରାୟ ୨୫ଜଣ ଭୋଜି କରୁଥିଲେ। ଦୁର୍ଗାପୁର, ତିରିମଲ୍ଲ, ଦଲକ, ପଲ୍ଲା, ଦଳେଇପୁଟ ଏବଂ ଅନ୍ୟ ଗ୍ରାମର ଯୁବକମାନେ ରହିଥିଲେ। ଖାଇବା ସମୟରେ ଯୁବକମାନେ ହୋହଲ୍ଲା କରିଥିଲେ। ଏହାର ପ୍ରତିବାଦ କରିବାରୁ ଉଭୟଙ୍କ ମଧ୍ୟରେ ବଚସା ଓ ମୁହଁାମୁହିଁ ହୋଇଥିଲେ। ଏପରି କି ଘଟଣା ସମ୍ପର୍କରେ ସ୍ଥାନୀୟ ଗ୍ରାମବାସୀ, ସରପଞ୍ଚଙ୍କ ଉପସ୍ଥିତିରେ ସମାଧାନ କରିବାକୁ ମଧ୍ୟ କହିଥିଲେ। ପରେ ଭୋଜି ସାରି ସମସ୍ତେ ଘରକୁ ଫେରିଥିଲେ। ତେବେ ରାତି ପ୍ରାୟ ୮ଟାରେ ମନ୍ଦିରରେ ବଚସା ହୋଇଥିବା ଯୁବକମାନଙ୍କ ମଧ୍ୟରୁ ୧୦ଜଣ ଖଣ୍ଡା, ଲୁହାରଡ, ମାରଣାସ୍ତ୍ର ଧରି ଭାଗୀରଥିଙ୍କ ଘର କବାଟକୁ ଗୋଇଠା ମାରି ଭାଙ୍ଗି ଭିତରକୁ ପଶିଥିଲେ। ଏହାପରେ ଯୁବକମାନେ ଭାଗୀରଥିଙ୍କୁ ଧକ୍କା ମାରିବା ସହ ଖଣ୍ଡାରେ ଆକ୍ରମଣ କରିଥିଲେ। ମଦନମୋହନ ପ୍ରତିବାଦ କରିବାରୁ ଯୁବକମାନେ ମଧ୍ୟ ତାଙ୍କୁ ଖଣ୍ଡାରେ ଆକ୍ରମଣ କରିଥିଲେ। ଏପରିକି ଯୁବକମାନେ ଘରର ସମସ୍ତ ଆସବାବପତ୍ର ନଷ୍ଟ କରିବା ସହ ଝରକା, କବାଟକୁ ମାରଣାସ୍ତ୍ରରେ ହାଣିଥିଲେ। ବାଇକ୍କୁ ଖଣ୍ଡାରେ ହାଣିବା ସହ ଏୟାରକୁଲର, ଫ୍ୟାନ, ଚେୟାର ନଷ୍ଟ କରିଦେଇଥିଲେ। ଏହାପରେ ଯୁବକମାନେ ଘର ଭିତରେ ଗୋଟିଏ ଏବଂ ବାହାରେ ୩ଟି ବୋମା ମାଡ଼ କରି ପଳାଇଥିଲେ।