ଦିଗପହଣ୍ଡି,୧୫ା୧୧(ଅଶେଷ ନାଥ ମିଶ୍ର): ସାନଖେମୁଣ୍ଡି ଓ ଦିଗପହଣ୍ଡି ଅଞ୍ଚଳରେ ଗତ କିଛିଦିନ ହେଲା ବୋମାମାଡ଼ କରି ଆତଙ୍କ ଚଳାଇଥିବା ଅପରାଧୀ ଗ୍ୟାଙ୍ଗର ଜଣେ ଯୁବକଙ୍କୁ ପୋଲିସ ଗିରଫ କରି ଶୁକ୍ରବାର କୋର୍ଟ ଚାଲାଣ କରିଛି। ସେ ହେଲେ ଦିଗପହଣ୍ଡି ଅଞ୍ଚଳ କଲୋନୀରେ ରହୁଥିବା ମୌଳାଭଞ୍ଜା ଗ୍ରାମର ସୁନୀଲ ସେଠୀ। ସେ ହାତବୋମା ପ୍ରସ୍ତୁତ କରି ଏକ ନିର୍ଦ୍ଦିଷ୍ଟ ଅପରାଧୀ ଗୋଷ୍ଠୀଙ୍କୁ ନିୟମିତ ବ୍ୟବଧାନରେ ଯୋଗାଇ ଦେଉଥିଲେ ବୋଲି ଥାନା ଏସ.ଆଇ ଜ୍ୟୋତି ରଞ୍ଜନ ବେହେରା କହିଛନ୍ତି। ଥାନା ମାମଲା ନଂ.୪୨୦/୨୪ ଅନୁଯାୟୀ ଜାମିନ ଆବେଦନ ଖାରଜ ହେବାରୁ ତାଙ୍କୁ ଦିଗପହଣ୍ଡି ସବ ଜେଲ ହାଜତକୁ ପଠାଇ ଦିଆଯାଇଛି। ସୂଚନାଯୋଗ୍ୟ, ଗତ ୨୬ ତାରିଖରେ ସନ୍ଧ୍ୟାରେ କୁଶପଡ଼ା ଗ୍ରାମର ଗାଡ଼ିଚାଳକ ଶତ୍ରୁଘ୍ନ ବିଷୋୟୀଙ୍କୁ ଲକ୍ଷ୍ୟକରି କେତେଜଣ ଦୁର୍ବୃତ୍ତ ପୃଥକ ଦୁଇଟି ସ୍ଥାନରେ ବୋମାମାଡ଼ କରିଥିଲେ। ସେ କୌଶଳକ୍ରମେ ଖସିଯିବାରୁ ବର୍ତ୍ତି ଯାଇଥିଲେ।