କାମାକ୍ଷାନଗର,୧୦ା୪(ଡି.ଏନ୍.ଏ.): ରାଜନୈତିକ ଶତ୍ରୁତାକୁ କେନ୍ଦ୍ରକରି ଅଶାନ୍ତ ହୋଇଉଠିଛି ଢେଙ୍କାନାଳ ଜିଲା କାମାକ୍ଷାନଗର ବ୍ଲକ ତୁମୁସିଙ୍ଗା ଥାନା ଅଧୀନ କୋଟଗରା ଗ୍ରାମ। ଶନିବାର ମଧ୍ୟରାତିରେ ପୂର୍ବତନ ସମିତିସଭ୍ୟ ଅଶ୍ୱିନୀ କୁମାର ପରିଡ଼ାଙ୍କ ଘର ଉପରକୁ ବୋମାମାଡ଼ କରାଯାଇଥିବା ଅଭିଯୋଗ ହୋଇଛି। ଅଭିଯୁକ୍ତମାନେ ଗ୍ୟାରେଜରେ ଥିବା ତାଙ୍କ ଜିପ୍ ଜାଳି ଦେଇଛନ୍ତି। ପୋଲିସ ପହଞ୍ଚତ୍ ଦୁଇଟି ଅଫୁଟା ବୋମା ଜବତ କରିବା ସହ ତଦନ୍ତ ଆରମ୍ଭ କରିଛି।
ପୋଲିସ ନିକଟରେ ହୋଇଥିବା ଏତଲାରେ ଦର୍ଶାଯାଇଛି, ଶନିବାର ରାତି ପ୍ରାୟ ସାଢ଼େ ୧୧ଟାରୁ ୧୨ଟା ମଧ୍ୟରେ ଯୋଗୀଡ଼ିହ ଗ୍ରାମର କୃଷ୍ଣଚନ୍ଦ୍ର ଦାସ ଓରଫ୍ କୁଶିଆ, ଅମ୍ଳାନ ଜେନା, କୋଟଗରା ଉପର ଗୋଡ଼ିସାହିର ରଞ୍ଜିତ ପରିଡ଼ା ଏକ ବାଇକ୍ରେ ଆସି ଘର କବାଟ ବାଡ଼େଇଥିଲେ। ଅମ୍ଳାନ ଏକ ପିସ୍ତଲ ଏବଂ କୃଷ୍ଣ ଖଣ୍ଡା ଧରି ଘର ବାହାରେ ଆତଙ୍କ ସୃଷ୍ଟି କରିବା ସହ ଅସଭ୍ୟ ଭାଷାରେ ଗାଳିଗୁଲଜ କରିଥିଲେ। ଏଥିସହ ହତ୍ୟା କରିବାକୁ ଧମକ ଦେଇଥିଲେ। ସେମାନେ ଗ୍ୟାରେଜ୍ରେ ଥିବା ଜିପ୍ (ନଂ ଓଆର୍ ୦୫ ୧୫୫୬)କୁ ପେଟ୍ରୋଲ ଢାଳି ନିଅଁା ଲଗାଇ ଦେଇଛନ୍ତି। ଫଳରେ ଗାଡ଼ି ସମ୍ପୂର୍ଣ୍ଣ ଜଳିଯାଇଛି। ଭାଇ ଅରୁଣ କୁମାର ପରିଡ଼ା ଏହି ଘଟଣାର ସାକ୍ଷୀ ରହିଛନ୍ତି। ଏଭଳି କାଣ୍ଡ ଭିଆଇଥିବା ଅଭିଯୁକ୍ତଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଅଶ୍ୱିନୀ ପୋଲିସ ନିକଟରେ ଦାବି କରିଛନ୍ତି। ସୂଚନା ପାଇ ପୋଲିସ ପହଞ୍ଚତ୍ ତଦନ୍ତ ଆରମ୍ଭ କରିଛି। ଏ ସଂକ୍ରାନ୍ତରେ ଏସ୍ଡିପିଓ ରଞ୍ଜନ କୁମାର ଦେ କୁହନ୍ତି, ଅଭିଯୋଗ ଆଧାରରେ ତୁମୁସିଙ୍ଗା ଥାନାରେ ଏକ ମାମଲା ରୁଜୁ ହୋଇଛି। ଘଟଣାସ୍ଥଳରେ ପହଞ୍ଚତ୍ ପୋଲିସ ଛାନଭିନ୍ ଆରମ୍ଭ କରିଛି।