ବମ୍ବେ: ସ୍ବାମୀ ଅରବାଜ ଖାନ୍ଙ୍କଠାରୁ ଅଲଗା ହେବା ପରେ ଅଭିନେତା ଅର୍ଜୁନ କପୁରଙ୍କ ପ୍ରେମରେ ପଡ଼ିଛନ୍ତି ମଲାଇକା ଅରୋରା। ବେଶ କିଛି ଦିନ ସେ ନିଜ ସମ୍ପର୍କକୁ ନେଇ ନିରବ ଥିଲେ। ହେଲେ ଏବେ ଉଭୟ ଖୁଲମଖୁଲା ପ୍ରେମର ପରିପ୍ରକାଶ କରୁଛନ୍ତି। ସୋସିଆଲ ମିଡିଆରେ ଉଭୟଙ୍କ ଫଟୋ ପୋଷ୍ଟ କରିବା ସହ ସ୍ବତନ୍ତ୍ର ବାର୍ତ୍ତା ମଧ୍ୟ ସେମାନେ ଦେଉଛନ୍ତି।
ଅପରପକ୍ଷେ ଦେଖିଲେ ମଲାଇକାଙ୍କଠାରୁ ୧୨ ବର୍ଷ ସାନ ଅର୍ଜୁନ। ହେଲେ ବୟସକୁ ନେଇ ତାଙ୍କ ସମ୍ପର୍କରେ ଫରକ ପଡେନା ବୋଲି ଅର୍ଜୁନ ସଫାସଫା କହିସାରିଛନ୍ତି। ବର୍ତ୍ତମାନ ବିବାହ ନେଇ କୌଣସି ଯୋଜନା ନାହିଁ। ସେ ସମୟ ଆସିଲେ ସେ ଲୁଚିଛପି ନୁହେଁ ବରଂ ସମସ୍ତଙ୍କ ଆଶୀର୍ବାଦ ନେଇ ବିବାହ କରିବେ ବୋଲି ମଧ୍ୟ କହିଛନ୍ତି।
କୁହାଯାଏ ୨୦୧୬ରେ ସ୍ବାମୀ ଅରବାଜଙ୍କଠାରୁ ଅଲଗା ହେବା ପରେ ମଲାଇକା ଅର୍ଜୁନଙ୍କ ପ୍ରେମରେ ଡେଣା ଲାଗିଥିଲା। ହେଲେ ବାପା ବୋନି କପୁରଙ୍କୁ କଥାଟା ହଜମ ହୋଇ ନ ଥିଲା। ସେ ସମ୍ପର୍କକୁ ନେଇ ସହମତି ପ୍ରକାଶ କରି ନ ଥିଲେ। ଏପରିକି ମଲାଇକାଙ୍କଠାରୁ ଦୂରରେ ରୁହନ୍ତୁ ବୋଲି ରୋକଠୋକ ଶୁଣାଇଦେଇଥିଲେ। ସଲମାନଙ୍କ ଭାଉଜଙ୍କୁ ଡେଟ୍ କରୁଥିବାରୁ ତାଙ୍କ କ୍ୟାରିୟର ବରବାଦ ହୋଇପାରେ ବୋଲି ତାଙ୍କୁ ଲାଗୁଥିଲା। ହେଲେ ଏବେ ପରିସ୍ଥିତି ସାମାନ୍ୟ ଥିବା କୁହାଯାଉଛି। ବୋନିଙ୍କ ଭାଇ ତଥା ଅଭିନେତା ଅନିଲ କପୁର ଉଭୟଙ୍କୁ ନେଇ ଖୁସି ଥିବା କହିଛନ୍ତି। ଫଳରେ ବୋନି ମଧ୍ୟ ପୁଅଙ୍କ ଖୁସି ପାଇଁ ସମ୍ପର୍କକୁ ମାନି ନେବେ ବୋଲି ଚର୍ଚ୍ଚା ହେଉଛି।