ମହାରାଷ୍ଟ୍ରର ସତାରା ଜିଲାରେ ରହିଛି ଭିଲାର ନାମକ ଏକ ଗାଁ। ଏହି ଗାଁ ବହିର ଗାଁ ଭାବେ ଏବେ ବେଶ୍ ଲୋକପ୍ରିୟ। କାରଣ ଏଠାରେ ଯୁଆଡ଼େ ଚାହିଁବେ ସେଠି ଆପଣଙ୍କୁ କେବଳ ବହି ହିଁ ବହି ଦେଖାଯିବ। ଅର୍ଥାତ୍ ସ୍ଥାନୀୟ ଅଞ୍ଚଳର ଅଧିକାଂଶ ଘର, ବିଦ୍ୟାଳୟ, ରେଷ୍ଟ ହାଉସ୍ ଇତ୍ୟାଦିକୁ ସ୍ଥାନୀୟ ସରକାର ଗୋଟିଏ ଗୋଟିଏ ଲାଇବ୍ରେରୀରେ ପରିବର୍ତ୍ତନ କରିଦେଇଛନ୍ତି। ସରଳରେ କହିବାକୁ ଗଲେ, ଏହି ସବୁ ସ୍ଥାନରେ ସରକାରଙ୍କ ତରଫରୁ ସମ୍ପୂର୍ଣ୍ଣ ମାଗଣାରେ ହଜାର ହଜାର ସଂଖ୍ୟାରେ ବହିକୁ ଯୋଗାଇ ଦିଆଯିବା ସହ ତାହାକୁ ଖୁବ୍ ସୁନ୍ଦର ଭାବେ ସଜାଇ ରଖିବାର ବ୍ୟବସ୍ଥା ମଧ୍ୟ କରି ଦିଆଯାଇଛି। ଏପରି କରିବା ପଛରେ ମୁଖ୍ୟ କାରଣ ହେଉଛି, ଯେହେତୁ ଭିଲାର ଷ୍ଟ୍ରବେରୀ ଚାଷ ପାଇଁ ପ୍ରସିଦ୍ଧ ଏବଂ ଏହା ଏକ ଲୋକପ୍ରିୟ ପର୍ଯ୍ୟଟନସ୍ଥଳୀ। ତେଣୁ ବର୍ଷକ ବାରମାସ ଏଠାକୁ ଦେଶବିଦେଶରୁ ବହୁ ସଂଖ୍ୟାରେ ପର୍ଯ୍ୟଟକ ବୁଲି ଆସିଥାନ୍ତି। ଆଉ ସେହି ପର୍ଯ୍ୟଟକଙ୍କୁ ଅଧିକ ଆକର୍ଷିତ କରିବା ଏବଂ ତାଙ୍କ ମନରେ ପଢିବା ପ୍ରତି ଆଗ୍ରହ ସୃଷ୍ଟି କରାଇବା ପାଇଁ ସ୍ଥାନୀୟ ସରକାରଙ୍କ ତରଫରୁ ଏଭଳି ଭିନ୍ନ ଉପାୟ ଅବଲମ୍ବନ କରାଯାଇଛି। ସେଥିପାଇଁ ଏଠାରେ ବିଭିନ୍ନ ବିଷୟବସ୍ତୁ ଉପରେ ପର୍ଯ୍ୟବସିତ ହଜାର ହଜାର ସଂଖ୍ୟାରେ ବହି ରଖାଯାଇଛି। ଆଉ ସବୁଠୁ ବଡ଼ କଥା ହେଉଛି ପାଠକେ ଏହି ବହଗୁଡ଼ିକୁ ବୁଲି ଦେଖିବା ସହ ସମ୍ପୂର୍ଣ୍ଣ ମାଗଣାରେ ପଢିପାରିବେ। ଏଥିସହିତ ଏଠାକାର ରାସ୍ତାଘାଟ, କାନ୍ଥବାଡ ତଥା ପାଚେରୀ ଆଦିରେ ମଧ୍ୟ ବିଭିନ୍ନ କଳା, ସଂସ୍କୃତିକୁ ନେଇ ଖୁବ୍ ସୁନ୍ଦର ସୁନ୍ଦର ପେଣ୍ଟିଂ ମଧ୍ୟ କରାଯାଇଛି। ସତରେ ବହି ପ୍ରିୟ ପର୍ଯ୍ୟଟକଙ୍କ ପାଇଁ ଏହା ଏକ ଅତ୍ୟନ୍ତ ସୁନ୍ଦର ସ୍ଥାନ ଭାବେ ଏବେ ଲୋକପ୍ରିୟତା ପାଇବାରେ ଲାଗିଛି।