ଲଣ୍ଡନ, ୨୧।୧୧: ନ୍ୟୁୟର୍କରେ ରହୁଥିବା ସ୍କଟଲାଣ୍ଡ ଲେଖକ ଡୌଗ୍ଲାସ୍ ଷ୍ଟୁଆର୍ଟ ତାଙ୍କର ଆତ୍ମଜୀବନୀ ଆଧାରିତ ଉପନ୍ୟାସ ‘ଶୁଗି ବେନ୍’ ପାଇଁ ଚଳିତବର୍ଷର ମର୍ଯ୍ୟାଦାଜନକ ବୁକର୍ ପ୍ରାଇଜ୍ ମିଳିଛି। ପୁରସ୍କାର ଲାଗି ସଂକ୍ଷିପ୍ତ ତାଲିକାରେ ଥିବା ଭାରତୀୟ ବଂଶୋଦ୍ଭବ ଅବନୀ ଦୋଶୀଙ୍କ ସମେତ ୫ ଜଣଙ୍କୁ ସେ ପଛରେ ପକାଇ ଦେଇଛନ୍ତି। ୮୦ ଦଶକର ଗ୍ଲାସ୍ଗୋ ସହରର ପ୍ରେମ ଓ ମଦନିଶା ଉପରେ ଶୁଗି ବେନ ଉପନ୍ୟାସ ଲେଖାଯାଇଛି। ଡୌଗ୍ଲାସ୍ଙ୍କୁ ୧୬ ବର୍ଷ ହୋଇଥିବାବେଳେ ମାଆ ମଦ ନିଶାରେ ପ୍ରାଣ ହରାଇଥିଲେ। ଉକ୍ତ ପୁସ୍ତକକୁ ସେ ତାଙ୍କ ମାଆଙ୍କ ଉଦ୍ଦେଶ୍ୟରେ ଉତ୍ସର୍ଗ କରିଛନ୍ତି। ତାଙ୍କ ସ୍ବପ୍ନ ସାର୍ଥକ ହୋଇଛି ଓ ସମ୍ପୂର୍ଣ୍ଣ ଜୀବନ ବଦଳିଯାଇଛି ବୋଲି ପୁ୍ରସ୍କାର ଗ୍ରହଣ କରିବା ଅବସରରେ ଡୌଗ୍ଲାସ୍ କହିଛନ୍ତି। ଦୁବାଇରେ ରହୁଥିବା ଭାରତୀୟ ବଂଶୋଦ୍ଭବ ଲେଖିକା ଅବନୀଙ୍କ ‘ବର୍ଣ୍ଟ ସୁଗାର’ ଉପନ୍ୟାସ ସଂକ୍ଷିପ୍ତ ତାଲିକାରେ ସ୍ଥାନ ପାଇଥିଲେ ହେଁ ପୁରସ୍କାର ପାଇପାରି ନାହିଁ।
ଅନ୍ୟମାନଙ୍କ ମଧ୍ୟରେ ଜିମ୍ବାଓ୍ବେ ଲେଖକ ସିତ୍ସି ଡଙ୍ଗରେମ୍ବଗା, ଆମେରିକୀୟ ଲେଖକ ଡିଏନେ କୁକ୍, ମାଜା ମେଙ୍ଗିସ୍ତେ ଏବଂ ବ୍ରାଣ୍ଡନ୍ ଟେଲରଙ୍କ ନାଁ ସଂକ୍ଷିପ୍ତ ତାଲିକାରେ ସ୍ଥାନ ପାଇଥିଲା। ସମ୍ପାଦକ, ଭାଷା ସମାଲୋଚକ ଓ ପୂର୍ବତନ ପ୍ରକାଶକ ମାରଗାରେଟ୍ ବୁସ୍ବିଙ୍କ ଅଧ୍ୟକ୍ଷତାରେ ଗଠିତ ଚଳିତବର୍ଷର ବୁକର୍ ପ୍ରାଇଜ୍ ବିଚାରକ ପ୍ୟାନେଲରେ ଲେଖକ ଲି ଚାଇଲ୍ଡ, ଲେଖକ ତଥା ସମାଲୋଚକ ସମୀର ରହିମ, ଲେଖକ ତଥା ବ୍ରଡ୍କାଷ୍ଟର ଲେମ୍ନ ସିସାଏ ଏବଂ କ୍ଲାସିକିଷ୍ଟ ଏମିଲି ଓ୍ବିଲ୍ସନ ସ୍ଥାନ ପାଇଥିଲେ।