ନୂଆଦିଲ୍ଲୀ,୨।୧(ପି.ଟି.): ଭାରତୀୟ ତାରକା ଦ୍ରୁତ ବୋଲର ଯଶ୍ପ୍ରୀତ ବୁମ୍ରାଙ୍କ ପ୍ରଶଂସାରେ ଶତମୁଖ ହୋଇଛନ୍ତି ପାକିସ୍ତାନ ପୂର୍ବତନ ପେସର ସୋଏବ ଅଖ୍ତର। ଏବେ ବୁମ୍ରା ବିଶ୍ୱର ସବୁଠାରୁ ସ୍ମାର୍ଟ ତଥା ଚତୁର ଦ୍ରୁତ ବୋଲର ବୋଲି ସେ କହିଛନ୍ତି। ବାୟୁରେ ସେ ପ୍ରତିପକ୍ଷ ବ୍ୟାଟ୍ସମ୍ୟାନଙ୍କୁ ଧୋକା ଦେବାର କଳା ଶିକ୍ଷା କରିଛନ୍ତି। ଏକଦା ପାକିସ୍ତାନ ଦ୍ରୁତ ବୋଲରମାନଙ୍କ ପାଖରେ ଏଭଳି କଳା ଦେଖିବାକୁ ମିଳୁଥିଲା ବୋଲି ଅଖ୍ତର କହିଛନ୍ତି।
ବୁମ୍ରାଙ୍କ ପ୍ରତିଭାରେ ଅଖ୍ତର ବେଶ୍ ପ୍ରଭାବିତ ହୋଇଛନ୍ତି। ମାତ୍ର ୫ ସେକେଣ୍ଡ ମଧ୍ୟରେ ବୁମ୍ରା ଏକ କଷ୍ଟକର ରନ୍ ଅପ୍ରୁ ବୋଲିଂ କରି ଯେକୌଣସି ବ୍ୟାଟ୍ସମ୍ୟାନଙ୍କୁ ଚତୁରତାର ସହ ଝଟ୍କା ଦେବାକୁ ସକ୍ଷମ। ବୁମ୍ରା ସମ୍ଭବତଃ ଭାରତର ପ୍ର ଥମ ଦ୍ରୁତ ବୋଲର, ଯିଏ ପବନର ଗତିକୁ ରୋକିବା ସହ ଦିଗରୁ ଫାଇଦା ଉଠାଇ ବୋଲିଂ କରିପାରୁଛନ୍ତି। ଗ୍ରାଉଣ୍ଡରେ ଅଧିକ ଘାସ ନ ଥିଲେ ମଧ୍ୟ ସେ ସଫଳତାର ସହ ବୋଲିଂ କରିବାର କଳାକୁ ଶିକ୍ଷା କରିଛନ୍ତି। ପୂର୍ବରୁ ପାକିସ୍ତାନ ଦ୍ରୁତ ବୋଲରମାନେ ମଧ୍ୟ ଏପରି ବୋଲିଂ କରୁଥିବା ଅଖ୍ତର ଏକ ୟୁଟ୍ୟୁବ୍ ଚ୍ୟାନେଲ ‘ସ୍ପୋଟର୍ସ ଟୁଡେ’କୁ ସାକ୍ଷାତ୍କାର ଦେଇ କହିଛନ୍ତି। ପୂର୍ବରୁ ଓ୍ବାସିମ ଆକ୍ରମ, ଓ୍ବାକର ୟୁନିସ୍ ଓ ମୁଁ ପବନର ଗତି ତଥା ବେଗ, ଦିଗକୁ ଅନୁଧ୍ୟାନ କରି ବୋଲିଂ କରିଥାଉ। ଦ୍ରୁତ ବୋଲିଂର ମେକାନିକ୍ସ ଓ ଏରୋ ଡାଇନାମିକ୍ସ ନେଇ ସେତେବେ ଆମେ ଅବଗତ ଥିଲୁ। ଦିନର କେତେବେଳେ ଓ କେଉଁ ପରିମାଣରେ ବଲ ସୁଇଂ ହେବ ଆମେ ଜାଣିଥିଲୁ। ଏବେ ବୁମ୍ରା ଏହାକୁ ଶିକ୍ଷା କରିପାରିଛନ୍ତି ବୋଲି ସେ କୁହନ୍ତି।
ମହମ୍ମଦ ଆସିଫ ଓ ମହମ୍ମଦ ଆମିରଙ୍କ ପରେ ବୁମ୍ରା ସବୁଠାରୁ ଚତୁର ଦ୍ରୁତ ବୋଲର। ୭ଟି ଷ୍ଟେପ୍ ରନ୍- ଅପ୍ରେ ବୋଲିଂ କରି ବୁମ୍ରା ଏବେ ବ୍ୟାଟ୍ସମ୍ୟାନଙ୍କୁ ମାତ୍ର ୫ ସେକେଣ୍ଡରେ ଭୟଭୀତ କରାଇବାରେ ସକ୍ଷମ। କିପରି ଉଇକେଟ ହାସଲ କରିହେବ ତାହା ତାଙ୍କୁ ଭଲଭାବେ ଜଣା। ସେ ଜଣେ ବଡ଼ ଖେଳାଳିଭାବେ ଉଭା ହୋଇଛନ୍ତି। ଯଦି ଫିଟ୍ନେସ ବଜାୟ ରଖିପାରନ୍ତି ତା’ହେଲେ ଜଣେ ମହାନ୍ ଦ୍ରୁତ ବୋଲରଭାବେ ମାନ୍ୟତା ପାଇବେ। ତାଙ୍କ ପିଠିରେ ଯଦି ଆଗକୁ ଆଘାତ ସମସ୍ୟା ନ ରହେ ତା’ହେଲେ ସେ ଦୀର୍ଘଦିନ ଧରି ଖେଳ ଜାରି ରଖିବେ ବୋଲି ଅଖତର କହିଛନ୍ତି। ସମାଲୋଚକଙ୍କୁ ଯେଉଁ ଭଳି ଭାବେ ବୁମ୍ରା ଭୁଲ୍ ପ୍ରମାଣିତ କରିଛନ୍ତି ତାହା ତାଙ୍କୁ ପ୍ରଭାବିତ କରିଛି। ତାଙ୍କ ଅସ୍ବାଭାବିକ ଆକ୍ସନକୁ ଲୋକେ ସମାଲୋଚନା କରୁଥିଲେ। ତେବେ ଏହି ଆକ୍ସନରେ ସେ ସଫଳତାର ଶୀର୍ଷକୁ ଛୁଇଁ ପାରିଛନ୍ତି। ଛୋଟିଆ ସ୍ଥାନରେ ସେ ବଲର ଲେନ୍ଥରେ ପରିବର୍ତ୍ତନ ଆଣିବା ସହ ପ୍ରଥମେ ବ୍ୟାଟ୍ସମ୍ୟାନଙ୍କୁ ଏୟାରରେ ଓ ପରେ ପିଚ୍ରେ ଚକ୍ମା ଦେବାକୁ ସିଦ୍ଧହସ୍ତ। କ୍ରିଜ୍ରୁ ମଧ୍ୟ ସେ ଫାଇଦା ଉଠାଇବାକୁ ସକ୍ଷମ। କ୍ରିଜ୍ ମଧ୍ୟରେ ସେ ବଲ୍ର ଲେନ୍ଥରେ ପରିବର୍ତ୍ତନ ସହଜରେ କରିପାରୁଛନ୍ତି। ବାମହାତୀ ବ୍ୟାଟ୍ସମ୍ୟାନଙ୍କୁ ସେ ଆଉଟ୍ ସୁଇଂ ବୋଲିଂ କରିବାରେ ମଧ୍ୟ ସକ୍ଷମ। ଇନ୍କମିଂ ବୋଲିଂ କରି ବଲକୁ ବିପରୀତ ଦିଗରେ ମଧ୍ୟ ସୁଇଂ କରାଇବାରେ ସେ ଜଣେ ସଫଳ ବୋଲର। ଅର୍ଥାତ୍ ବଲ ପିଚ୍ ଖାଇବା ପରେ ବାହାରକୁ ଯାଇଥାଏ। ଯାହା ଫଳରେ ବ୍ୟାଟ୍ସମ୍ୟାନ ଚକ୍ମା ଖାଇଥାଏ। ଉଇକେଟ ନେବାର କଳା ବୁମ୍ରାଙ୍କୁ ଜଣାଅଛି ବୋଲି ଅଖତର କହିଛନ୍ତି।