ଦାରିଙ୍ଗବାଡି,୨୬।୮ (ଅରୁଣ ସାହୁ): କନ୍ଧମାଳ ଜିଲା ଦାରିଙ୍ଗବାଡି ବ୍ଲକ ବୁଡ଼ାଗୁଡା ଅଞ୍ଚଳରେ ଆଇନଶୃଙ୍ଖଳା ପରିସ୍ଥିତି ବିପର୍ଯ୍ୟସ୍ତ। ସନ୍ଧ୍ୟା ନଇଁଲେ ଲୋକେ ଆଉ ଘରୁ ପଦାକୁ ବାହାରିବାକୁ ସୁରକ୍ଷିତ ମଣୁ ନାହାନ୍ତି। ସେପଟେ ସନ୍ଧ୍ୟା ହେଲେ ଦୋକାନବଜାର ବନ୍ଦ ହେଇଯାଉଛି। ବ୍ରିଟିଶ ଅମଳର ଥାନା ଏବେ ପରିତ୍ୟକ୍ତ। ପୋଲିସର ପାଦ ପଡୁନି।
ବୁଡଗୁଡା ଅଞ୍ଚଳରେ ଫଳରେ ଅପରାଧୀଙ୍କ ଦୌରାତ୍ମ୍ୟ ବୃଦ୍ଧି ପାଇଛି। ନିଶା କାରବାର ବେଧଡକ ଚାଲିଥିବାବେଳେ ଚୋରାରେ ଦେଶୀ ଓ ବିଦେଶୀ ମଦକାରବାରର ପେଣ୍ଠସ୍ଥଳ ପାଲଟିଛି। ଆକଟ କରିବାକୁ ପୋଲିସ ଆଉ ଅବକାରୀ ବିଭାଗର ସେଠାରେ କୌଣସି ପ୍ରଭାବ ନାହିଁ। ଫଳରେ ଦିନକୁ ଦିନ ଚୋରା ମଦ କାରବାର ବୃଦ୍ଧି ପାଉଛି। ଆପରାଧିକ ଘଟଣା ବୃଦ୍ଧି ପାଉଛି। ଅଞ୍ଚଳରେ ଚୋରି, ଗଣ୍ଡଗୋଳ ଓ ଭଙ୍ଗାରୁଜା ସହ ଅନେକ ସମସ୍ୟା ଦେଖାଯାଇଛି।
ମଦ୍ୟପମାନେ ନିଶାରେ ବଜାର ଉପରେ ଦିନ ରାତି ଦୌରାତ୍ମ୍ୟ ଓ ଗଣ୍ଡଗୋଳ କରୁଥିବାରୁ ଜରୁରୀ କାର୍ଯ୍ୟ ନ ଥିଲେ କେହି ବଜାରକୁ ଯାଉନାହାନ୍ତି। ବିଦ୍ୟାଳୟକୁ ଯାତାୟତ କରୁଥିବା ଛାତ୍ରୀଛାତ୍ରମାନେ ମଦ୍ୟପଙ୍କୁ ଦେଖି ଭୟଭୀତ ହୋଇପଡୁଛନ୍ତି। ଏଭଳି ଘଟଣା ଏବେ ପ୍ରତିଦିନ ଭଳି ଘଟୁଛି।
ଅନେକ ପରିବାରର ଯୁବପିଢ଼ି ଓ ପୁରୁଷମାନେ ଏହି ମଦ ପିଇ ଘରର ଆର୍ଥିକ ପରିସ୍ଥିତି ଉଜୁଡିବାକୁ ବସିଲାଣି। ଅନେକ ପରିବାର ସର୍ବସ୍ବ ହରେଇବାକୁ ବସିଲେଣି। ସେପଟେ ଏହି ଚୋରା ମଦ କାରବାର ବନ୍ଦ କରିବାକୁ ଅଞ୍ଚଳବାସୀ ଅଣ୍ଟା ଭିଡ଼ିଲେଣି। ସୋମବାର ଗାଁ ଦାଣ୍ଡରେ ସରପଞ୍ଚ ତାତୁରା ପ୍ରଧାନଙ୍କ ନେତୃତ୍ୱରେ କିଛି ଲୋକ ବୈଠକ କରି ଥାନା ଖୋଲାଯିବାକୁ ଦାବି ଜଣାଇବାକୁ କନ୍ଧମାଳ ଏସପିଙ୍କୁ ଭେଟିବାକୁ ନିଷ୍ପତି ନେଇଛନ୍ତି।
ବ୍ରିଟିଶ ଶାସନ ବେଳେ ପ୍ରଥମେ ଥାନା ଖୋଲାଯାଇଥିବା ବେଳେ ଧୀରେ ଧୀରେ ଥାନା ଉଠାଇ ଦିଆଯାଇ କେବଳ ଫାଣ୍ଡିରେ ପରିଣତ ହୋଇଥିଲା। ପରେ ଗତ ୮ /୧୦ ବର୍ଷ ହେଲା ଉକ୍ତ ଫାଣ୍ଡି ସମ୍ମୁଖରେ କେହି ଦୁର୍ବୁତ୍ତ ମାଓବାଦୀଙ୍କ ନାମରେ ବ୍ୟାନର, ପୋଷ୍ଟର ଲଗାଇବା ପରେ ସେଠାରୁ ପୋଲିସଙ୍କୁ ବାଲିଗୁଡା ଫେରେଇ ନିଆଗଲା। ଆଉ ସେହିଦିନଠାରୁ ଆଉ ଫାଣ୍ଡି ଖୋଲିନି । ଏବେ ନୂତନ କୋଠା ନିର୍ମାଣ ହୋଇଥିଲେ ସୁଦ୍ଧା ନା ଫାଣ୍ଡି ଖୋଲୁଛି ନା ଥାନା କେହି ପୋଲିସ ରହୁ ନ ଥିବାରୁ ଅଞ୍ଚଳବାସୀ ଚିନ୍ତାରେ ଅଛନ୍ତି। ସେହିପରି ଉକ୍ତ ଅଞ୍ଚଳରେ ସ୍ବାସ୍ଥ୍ୟକେନ୍ଦ୍ରରେ ଷ୍ଟାଫ ଅଭାବ ସାଙ୍ଗକୁ ବୁଡଗୁଡାଠାରୁ ବାଲିଗୁଡା ଅତି ନିମ୍ମମାନର ରାସ୍ତା ସମ୍ପ୍ରସାରଣ କାର୍ଯ୍ୟ କରାଯାଉଥିବା ଅଞ୍ଚଳବାସୀ ଅଭିଯୋଗ କରିଛନ୍ତି। ସେହିପରି ଫୋର୍ଜି ମୋବାଇଲ ଟାୱାର ସ୍ଥାପନ ପାଇଁ ଅଞ୍ଚଳବାସୀ ଦାବି କରିଛନ୍ତି। ଦୀର୍ଘ ସମୟ ଓ ନିୟମିତ ମୋବାଇଲ ଟାୱାର ଫେଲ ହେଉଥିବା ଗ୍ରାମବାସୀ ଅଭିଯୋଗ କରିଛନ୍ତି। ଦାବି ପୂରଣ ନ ଆନ୍ଦୋଳନ କରିବାକୁ ଗ୍ରାମବାସୀ ଧମକ ଦେଇଛନ୍ତି।