ରାଉରକେଲା ଅଫିସ/ଭୁବନେଶ୍ୱର (କ୍ରୀଡ଼ା ପ୍ରତିନିଧି), ୨୧।୧: ଗତଥରର ଚାମ୍ପିୟନ ବେଲଜିୟମ ଏଥର ମଧ୍ୟ ପ୍ରଭାବୀ ପ୍ରଦର୍ଶନ ଜାରି ରଖି ହକି ବିଶ୍ୱକପର କ୍ୱାର୍ଟର ଫାଇନାଲରେ ପ୍ରବେଶ କରିଛି। ଶୁକ୍ରବାର ବିର୍ସାମୁଣ୍ଡା ଷ୍ଟାଡିୟମରେ ଅନୁଷ୍ଠିତ ପୁଲ୍ ‘ବି’ର ଏକ ମ୍ୟାଚରେ ଏହି ଦଳ ୭-୧ ଗୋଲରେ ଏସୀୟ ଦଳ ଜାପାନକୁ ପରାସ୍ତ କରିଛି। ତାରକା ଖେଳାଳି ଟମ୍ ବୁନ୍ ୨୧, ୨୬, ୨୭, ୫୦ ଓ ୫୫ତମ ମିନିଟରେ ଏକାକୀ ୫ଟି ଗୋଲ ଦେଇ ବେଲଜିୟମକୁ ବୃହତ୍ ବିଜୟ ଦେବାରେ ମୁଖ୍ୟ ଭୂମିକା ତୁଲାଇଥିଲେ। ସେ ୪ଟି ଫିଲ୍ଡ ଗୋଲ ଦେଇଥିବାବେଳେ ୫୫ତମ ମିନିଟରେ ଜାପାନ ଖେଳାଳିଙ୍କ ବିପଜ୍ଜନକ ପ୍ରଦର୍ଶନ ଯୋଗୁ ବେଲଜିୟମକୁ ମିଳିଥିବା ପେନାଲ୍ଟି ଷ୍ଟ୍ରୋକ୍ ସୁଯୋଗର ସଦ୍ବ୍ୟବହାର କରିଥିଲେ। ବିଜୟୀ ଦଳ ପକ୍ଷରୁ ସେଡ୍ରିକ ଚାର୍ଲେର ୧୭ ଏବଂ ସେବାଷ୍ଟିଆନ ଡୋକେର ୫୧ତମ ମିନିଟରେ ଅନ୍ୟ ୨ଟି ଗୋଲ ଦେଇଥିଲେ। ଜାପାନ ପକ୍ଷରୁ କେନ୍ତାରୋ ଫୁକୁଡା ୪୫ତମ ମିନିଟରେ ଗୋଟିଏ ଗୋଲ ପରିଶୋଧ କରିଥିଲେ। ୩ ମ୍ୟାଚରୁ ୨ ବିଜୟ ଓ ୧ ଡ୍ର ସହ ୭ ପଏଣ୍ଟ ପାଇ ବେଲ୍ଜିୟମ ସିଧାସଳଖ କ୍ୱାର୍ଟର ଫାଇନାଲରେ ପ୍ରବେଶ କରିଛି। ଜର୍ମାନୀ ସମାନ ୭ ପଏଣ୍ଟ ପାଇଥିଲେ ହେଁ ଗୋଲ ବ୍ୟବଧାନ ଦୃଷ୍ଟିରୁ ଦ୍ୱିତୀୟ ସ୍ଥାନରେ ରହିଛି। ବେଲଜିୟମର ଗୋଲ ବ୍ୟବଧାନ +୧୧ ଥିବାବେଳେ ଜର୍ମାନୀର +୮ ରହିଛି। ଫଳରେ ଜର୍ମାନୀ ଦ୍ୱିତୀୟ ଏବଂ ଦକ୍ଷିଣ କୋରିଆ ୩ ପଏଣ୍ଟ ସହିତ ତୃତୀୟ ସ୍ଥାନରେ ରହି କ୍ରସ୍ ଓଭର ଖେଳିବାକୁ ଯୋଗ୍ୟତା ପାଇଛନ୍ତି। ଅନ୍ୟପକ୍ଷରେ ଜାପାନ ୩ ମ୍ୟାଚରୁ ତୃତୀୟ ବିଜୟ ସହ ବିଦାୟ ନେଇଛି। ଏବେ ଏହି ଦଳ କ୍ଲାସଫିକେଶନ ମ୍ୟାଚ ଖେଳିବ। ବେଲଜିୟମ ପ୍ରଥମ ମ୍ୟାଚରେ ୫-୦ରେ ଦକ୍ଷିଣ କୋରିଆକୁ ହରାଇଥିବାବେଳେ ଜର୍ମାନୀ ବିପକ୍ଷ ଦ୍ୱିତୀୟ ମ୍ୟାଚକୁ ୨-୨ ଗୋଲରେ ଡ୍ର ରଖିଥିଲା। ତୃତୀୟ ମ୍ୟାଚରେ ବୃହତ୍ ବିଜୟ ହାସଲ କରି ଏହି ଦଳ ସିଧାସଳଖ କ୍ୱାର୍ଟର ଫାଇନାଲରେ ପ୍ରବେଶ କରି ଟାଇଟଲ ବଜାୟ ରଖିବା ଦିଗରେ ଗୋଟିଏ ପାଦ ଆଗକୁ ବଢ଼ିଛି।