ହାଟଡିହୀ,୧୬।୪(ଡି.ଏନ୍.ଏ.): କେନ୍ଦୁଝର ଏବଂ ଭଦ୍ରକ ଜିଲା ମଧ୍ୟରେ ସୀମା ବିବାଦ ଏବେ ଉଗ୍ରରୂପ ଧାରଣ କରିଛି । କେନ୍ଦୁଝର ଜିଲା ନନ୍ଦିପଦା ଥାନା ଓରାଳି ଏବଂ ଭଦ୍ରକ ଜିଲା ବନ୍ତ ଥାନା ଅଧୀନ ଆପଣ୍ଡା ଦୁଇ ଗ୍ରାମ ମଧ୍ୟରେ ବିବାଦ ଘଟି ଗୋଷ୍ଠୀ ସଂଘର୍ଷ ହୋଇଛି । ଦୁଇ ଗ୍ରାମ ମଧ୍ୟରେ ଶନିବାର ବିଳମ୍ବିତ ରାତିରେ ଗୋଷ୍ଠୀ ସଂଘର୍ଷ ଘଟି ଏଥିରେ ୨୦ରୁ ଊର୍ଦ୍ଧ୍ୱ ଆହତ ହୋଇଛନ୍ତି। ଓରାଳି ବଜାରରେ ଥିବା ଦୋକାନ ଗୁଡିକ ଭଙ୍ଗାରୁଜା ହେବା ସହ କେତେକ ଦୋକାନକୁ ପୋଡ଼ି ଦିଆଯାଇଛି । ୨ କାର ଏବଂ ୩ ଟି ମୋଟର ସାଇକେଲକୁ ମଧ୍ୟ ଜାଳି ଦିଆଯାଇଛ। ଏ ନେଇ ଓରାଳିରେ ରାସ୍ତା ଅବରୋଧ କରାଯାଇ ଯାନବାହନ ଚଳାଚଳ ବନ୍ଦ କରାଯାଇଛି । ଘଟଣାସ୍ଥଳରେ ପ୍ରବଳ ଉତ୍ତେଜନା ଲାଗି ରହିଛି । କୌଣସି ପରିସ୍ଥିତିରେ ବଡ଼ ଧରଣର ଅଘଟଣା ଘଟିବା ଆଶଙ୍କା କରାଯାଉଛି। ନନ୍ଦିପଦା ଏବଂ ବନ୍ତ ପୋଲିସ ପରିସ୍ଥିତିକୁ ଆୟତ୍ତ କରିବା ପାଇଁ ଘଟଣାସ୍ଥଳରେ ଫୋର୍ସ ସହ ମୃତୟନ କରିଛି। ଘଟଣାସ୍ଥଳରେ ଉପସ୍ଥିତ ଥିବା ପୋଲିସ ଏସ୍ଆଇ ପ୍ରସାଦ କୁମାର ଜେନା କହିଛନ୍ତି, ସୀମା ବିବାଦକୁ ନେଇ ଏପରି ଘଟଣା ଘଟିଛ। ଦୋକାନ ପୋଡା ଜଳା ସହ ବହୁ ବ୍ୟକ୍ତି ଆହତ ହୋଇ ଆଗରପଡା ମେଡିକାଲରେ ଚିକିତ୍ସିତ ହେଉଛନ୍ତି ।
