କୋଲକାତା,୮।୨ : ଯଦିଓ ଭାରତ ଏବଂ ଅଷ୍ଟ୍ରେଲିଆ ମଧ୍ୟରେ ପ୍ରଥମ ଟେଷ୍ଟ ସିରିଜ ୭୫ ବର୍ଷ ପୂର୍ବେ ଖେଳାଯାଇଥିଲା, କିନ୍ତୁ ବର୍ଡର-ଗାଭାସ୍କର ଟ୍ରଫି ଅଧୀନରେ ଟେଷ୍ଟ ସିରିଜ ୨୬ ବର୍ଷ ପୂର୍ବେ ଆରମ୍ଭ ହୋଇଥିଲା। ଅକ୍ଟୋବର ୧୯୯୬ ରୁ ଭାରତ ଏବଂ ଅଷ୍ଟ୍ରେଲିଆ ମଧ୍ୟରେ ଖେଳାଯାଇଥିବା ଟେଷ୍ଟ ସିରିଜକୁ ବର୍ଡର-ଗାଭାସ୍କର ଟ୍ରଫି ଭାବେ ନାମିତ କରାଯାଇଥିଲା। ସେହି ଦିନଠାରୁ ବର୍ତ୍ତମାନ ପର୍ଯ୍ୟନ୍ତ ଏହି ଦୁଇ ଦଳ ମଧ୍ୟରେ ଟେଷ୍ଟ ମ୍ୟାଚ ଏହି ଟ୍ରଫି ଅଧୀନରେ ଅନୁଷ୍ଠିତ ହେଉଛି।
ଗୁରୁବାର ଫେବୃୟାରୀ ୯ରୁ ଏହା ଆରମ୍ଭ ହେବାକୁ ଯାଉଛି। ଯେତେବେଳେ ଅକ୍ଟୋବର ୧୯୯୬ ରେ ପ୍ରଥମ ଥର ପାଇଁ ବର୍ଡର-ଗାଭାସ୍କର ଟ୍ରଫି ଖେଳାଯାଇଥିଲା, ସେତେବେଳେ କେବଳ ଗୋଟିଏ ଟେଷ୍ଟ ଖେଳାଯାଇଥିଲା। ଅଷ୍ଟ୍ରେଲିଆର ଦଳ ଭାରତ ଗସ୍ତରେ ଆସିଥିଲା ଏବଂ ଦଳକୁ ୭ ୱିକେଟରେ ପରାଜୟର ସାମ୍ନା କରିବାକୁ ପଡିଥିଲା। ଏହି ସିରିଜ ଆରମ୍ଭ ହେବାଠାରୁ ବର୍ତ୍ତମାନ ପର୍ଯ୍ୟନ୍ତ ଟ୍ରଫିରେ କେବଳ ଭାରତ ପ୍ରାଧାନ୍ୟ ବିସ୍ତାର କରିଆସୁଛି।ଗତ ୨୬ ବର୍ଷ ମଧ୍ୟରେ ବର୍ଡର-ଗାଭାସ୍କର ଟ୍ରଫି ୧୫ ଥର ଅନୁଷ୍ଠିତ ହୋଇଛି ଯେଉଁଥିରେ ଭାରତ ୯ ଥର ଜିତିଥିବାବେଳେ ଅଷ୍ଟ୍ରେଲିଆ ଦଳ ମାତ୍ର ୫ ଥର ଜିତିଛି। ଥରେ ଏହି ଟ୍ରଫି ମଧ୍ୟ ଡ୍ର ହୋଇଛି। ଏହି ଅବଧିରେ ମୋଟ ୫୨ ଟି ମ୍ୟାଚ ଖେଳାଯାଇଥିଲା ଯେଉଁଥିରେ ଭାରତ ୨୨ ଟି ମ୍ୟାଚ ଜିତିଥିବାବେଳେ ଅଷ୍ଟ୍ରେଲିଆ ୧୯ ଟି ମ୍ୟାଚ ଜିତିଥିଲା । ଦୁଇ ଦଳ ମଧ୍ୟରେ ୧୧ ଟି ଡ୍ର ମଧ୍ୟ ହୋଇଛି।
ବର୍ଡର-ଗାଭାସ୍କର ଟ୍ରଫି ପୂର୍ବରୁ ନଭେମ୍ବର ୧୯୪୭ ରୁ ଜାନୁୟାରୀ ୧୯୯୨ ମଧ୍ୟରେ ପ୍ରାୟ ୪୫ ବର୍ଷରେ ଭାରତ ଏବଂ ଅଷ୍ଟ୍ରେଲିଆ ମଧ୍ୟରେ ୧୨ ଟି ଟେଷ୍ଟ ସିରିଜ ଖେଳାଯାଇଥିଲା। ସେଥିମଧ୍ୟରୁ ୭ ସିରିଜ ଅଷ୍ଟ୍ରେଲିଆ ଜିତିଥିବାବେଳେ ଭାରତୀୟ ଦଳ କେବଳ ଥରେ ସିରିଜ ଜିତିଥିଲା। ୪ ସିରିଜ ଡ୍ର ରହିଥିଲା। ଅର୍ଥାତ ଅଷ୍ଟ୍ରେଲିଆର ଏକପାଖିଆ ପ୍ରାଧାନ୍ୟ ରହିଥିଲା। ଏହି ଅବଧିରେ ଅନୁଷ୍ଠିତ ମୋଟ ୫୦ ଟି ଟେଷ୍ଟ ମ୍ୟାଚରେ ଅଷ୍ଟ୍ରେଲିଆ ୨୪ ଟି ମ୍ୟାଚ ଜିତିଥିଲା ଏବଂ ଭାରତ ମାତ୍ର ୮ ଟି ଜିତିଥିଲା। ୧୭ ଟି ମ୍ୟାଚ ଡ୍ର ରହିଥିଲା ଏବଂ ଗୋଟିଏ ମ୍ୟାଚ ଟାଇ ହୋଇଥିଲା। ପୁରୁଣା ଇତିହାସ ଦୋହରାଇବା ଲକ୍ଷ୍ୟରେ ଟିମ୍ ଇଣ୍ଡିଆ ରହିଛି।