କରୋନା ମହାମାରୀ ଆସିବା ପରଠାରୁ ଏହି ଦୁଇବର୍ଷ ମଧ୍ୟରେ ଲୋକଙ୍କୁ ଏକ ନୂଆ ଅଭ୍ୟାସ ଶିଖାଇ ଦେଇଛି। ହାତକୁ ବାରମ୍ବାର ଧୋଇବା, ସାନିଟାଇଜ କରିବା ଫଳରେ କରୋନା ମହାମାରୀଠାରୁ ଦୂରେଇ ରହିବା। ଡାକ୍ତର ନିୟମିତ ଭାବରେ ହାତ ସଫା ରଖିବାକୁ ପରାମର୍ଶ ଦେଉଛନ୍ତି। ମଲ୍ଠାରୁ ଆରମ୍ଭ କରି ରେଷ୍ଟୁରାଣ୍ଟ ପର୍ଯ୍ୟନ୍ତ ଆପଣ ଯୁଆଡ଼େ ଯିବେ ପ୍ରଥମେ ଆପଣଙ୍କୁ ସାନିଟାଇଜର ହିଁ ମିଳିବ।
ଏହି ମହାମାରୀ ସମୟରେ ଜନ୍ମ ହୋଇଥିବା ଏକ ଶିଶୁକନ୍ୟା ନିଜ ମାତାପିତାଙ୍କୁ ସବୁବେଳେ ହାତ ଧୋଉଥିବାର ଦେଖୁଛି। ଏବେ ଏହି ଶିଶୁକନ୍ୟାଟି ୨ ବର୍ଷର ହୋଇଗଲାଣି। ସେ ଯେତେ ବଡ଼ ହେଉଛି ସବୁ ଜିନିଷକୁ ସାନିଟାଇଜର ଭାବୁଛି। ଯେକୌଣସି ଜିନିଷ ହାତରେ ଧରୁଛି ତାକୁ ସାନିଟାଇଜର ଭାବି ଭଲ ଭାବେ କିଛି ସମୟ ରଗଡୁଛି।
ଆଜିକାଲି ସୋସିଆଲ ମିଡିଆରେ ଏହି ଭିଡିଓ ଖୁବ୍ ତୀବ୍ର ବେଗରେ ଭାଇରାଲ ହେଉଛି। ୨୦୨୦ରେ ଜନ୍ମ ହୋଇଥିବା ଶିଶୁକନ୍ୟା ଲ୍ୟାମ୍ପଠାରୁ ଆରମ୍ଭ କରି ଇଲେକ୍ଟ୍ରିକ୍ ସାମଗ୍ରୀକୁ ମଧ୍ୟ ସାନିଟାଇଜର ଭାବୁଛି। ଯେଉଁ ଜିନିଷ ଦେଖୁଛି ତା’ ଆଗରେ ହାତ ରଖି ସାନିଟାଇଜର ସ୍ପ୍ରେ କଲା ପରି କରୁଛି। ଭିଡିଓଟି ଦେଖି ଲୋକେ ହସି ହସି ଗଡୁଛନ୍ତି। ମାତ୍ର ଏହା ଆଜିକାଲି ସମୟରେ ସତ ଘଟଣା। ଭିଡିଓଟିକୁ ବର୍ତ୍ତମାନ ୧.୮ ବିଲିୟନରୁ ଅଧିକ ଲୋକ ଦେଖିସାରିଲେଣି। ହଜାର ହଜାର ଲୋକ ଏଥିରେ ପ୍ରତିକ୍ରିୟା ମଧ୍ୟ ଦେଇଛନ୍ତି।
ଭିଡିଓଟି Babygram.tr ନାମକ ଏକ ଇନ୍ଷ୍ଟାଗ୍ରାମରେ ଶେୟାର କରାଯାଇଛି। ଏଥିରେ ଏକ ଛୋଟ ଶିଶୁକନ୍ୟା ରାସ୍ତାରେ ଲାଗିଥିବା ଲାଇଟ୍, ବିଦ୍ୟୁତ୍ ସାମଗ୍ରୀ ଆଗରେ ହାତ ରଖି ଦେଉଛି। ସେ ପ୍ରତ୍ୟେକ ଜିନିଷକୁ ସାନିଟାଇଜର ଭାବୁଛି। ଯେମିତି କି ବଡ଼ମାନେ ଗୋଟିଏ ହାତରେ ସାନିଟାଇଜର ନେଇ ଦୁଇହାତରେ ଭଲ ଭାବରେ ଘଷନ୍ତି ସେ ଅବିକଳ ସେପରି କରୁଛି। ଭିଡିଓଟିକୁ ବହୁ ଲୋକ ପସନ୍ଦ କରିଛନ୍ତି।