ନୂଆଦିଲ୍ଲୀ,୧୮।୩(ପି.ଟି.): ତୁର୍କୀର ଇସ୍ତାନବୁଲଠାରେ ଚାଲିଥିବା ବୋସଫୋରସ୍ ବକ୍ସିଂ ଟୁର୍ନାମେଣ୍ଟରେ ରାଜ୍ୟଗୋଷ୍ଠୀ କ୍ରୀଡ଼ା ସ୍ବର୍ଣ୍ଣପଦକ ବିଜେତା ଗୌରବ ସୋଲାଙ୍କି କ୍ୱାର୍ଟର ଫାଇନାଲରେ ପ୍ରବେଶ କରିଛନ୍ତି। ସୋଲାଙ୍କି ୫-୦ରେ କାଜାଖସ୍ତାନର ଆରାପୋଭ ଏଇଡୋସଙ୍କୁ ପରାସ୍ତ କରି ଅଗ୍ରଗତି କରିଛନ୍ତି। ସେହିପରି ବିଶ୍ୱ ଚାମ୍ପିୟନଶିପ୍ ବ୍ରୋଞ୍ଜ ପଦକ ହାସଲ କରିଥିବା ସୋନିଆ ଲାଥର ବିଜୟରୁ ଅଭିଯାନ ଆରମ୍ଭ କରିଛନ୍ତି। ସେ ମହିଳା ୫୭ କେ.ଜି. ବର୍ଗରେ ଆର୍ଜେଣ୍ଟିନାର ରୋସୋରିଓ ମିଲୋଗ୍ରୋସ୍ଙ୍କୁ ୫-୦ରେ ପରାସ୍ତ କରିଛନ୍ତି। ଲାଥର ଏବେ ସ୍ଥାନୀୟ ଫେଭରାଇଟ୍ ସୁର୍ମେନେଲି ସୁଗସେନାଜଙ୍କୁ ଦ୍ୱିତୀୟ ରାଉଣ୍ଡରେ ଭେଟିବେ।
ତେବେ ଅନ୍ୟ ୩ ଭାରତୀୟ ବକ୍ସର ପରାସ୍ତ ହୋଇ ପ୍ରତିଯୋଗିତାରୁ ବିଦାୟ ନେଇଛନ୍ତି। ରାଜ୍ୟଗୋଷ୍ଠୀ କ୍ରୀଡ଼ା ବ୍ରୋଞ୍ଜ ପଦକ ବିଜେତା ନମନ ତନଓ୍ବାର ୪-୧ରେ ତୁର୍କୀର ବାକି ୟାଲସିନ ମହମ୍ମଦଙ୍କଠାରୁ ୯୧ କେ.ଜି. ପୁରୁଷ ବର୍ଗରେ, ପି.ଏଲ. ପ୍ରସାଦ ୫୨ କେ.ଜି. ବର୍ଗରେ ୫-୦ରେ କାଜାଖସ୍ତାନର ଡାମିରଙ୍କଠାରୁ ପରାସ୍ତ ହୋଇଛନ୍ତି। ସେହିପରି ପୁରୁଷ ୭୫ କେ.ଜି.ରେ ପ୍ରୟାଗ ଚାଭନ ଓ ମହିଳା ୭୫ କେ.ଜି.ରେ ପୂଜା ଯଥାକ୍ରମେ ଆଜରବୈଜାନର ସାହସୁଭାର୍ଲି କର୍ମାନ ଓ ରୁଷିଆର ଶାମୋନୋଭା ଅନାଷ୍ଟାସିଆଙ୍କଠାରୁ ପରାସ୍ତ ହୋଇଛନ୍ତି। ଏହି ବକ୍ସିଂ ଟୁର୍ନାମେଣ୍ଟରେ ୮ ପୁରୁଷ ଓ ୫ ମହିଳା ପ୍ରତିଯୋଗୀଙ୍କୁ ନେଇ ଏକ ୧୩ ଜଣିଆ ଭାରତୀୟ ଦଳ ଅଂଶଗ୍ରହଣ କରିଛନ୍ତି। ମାର୍ଚ୍ଚ ୧୫ ତାରିଖରୁ ଆରମ୍ଭ ହୋଇଥିବା ଏହି ଟୁର୍ନାମେଣ୍ଟ ୨୧ ତାରିଖରେ ଶେଷ ହେବ। ଏଥିରେ ବକ୍ସିଂ ଖେଳୁଥିବା ଶ୍ରେଷ୍ଠ ଦେଶ ଯଥା ରୁଷିଆ, ଆର୍ଜେଣ୍ଟିନା ଓ କାଜାଖସ୍ଥାନର ବକ୍ସରମାନେ ଅଂଶଗ୍ରହଣ କରିଛନ୍ତି।