ସୋଚି, ୨୮ା୯ : ରବିବାର ଅନୁଷ୍ଠିତ ରୁଷିଆନ ଫର୍ମୁଲା ଓ୍ବାନ୍ ମୋଟର ରେସିଂରେ ମର୍ସିଡିଜ୍ ଡ୍ରାଇଭର ଭାଲଟେରି ବୋଟାସ ଟାଇଟଲ ବିଜୟୀ ହୋଇଛନ୍ତି। ସିଜନ ୨୦୨୦ରେ ଏହା ହେଉଛି ତାଙ୍କର ଦ୍ୱିତୀୟ ଏବଂ କ୍ୟାରିୟରର ୯ମ ଟାଇଟଲ। ଏହାପୂର୍ବରୁ ସେ ଅଷ୍ଟ୍ର୍ରିଆରେ ସିଜନର ପ୍ରଥମ ରେସ୍ ଜିତିଥିଲେ। ସୂଚନାଯୋଗ୍ୟ, ସୋଚିର ଏହି ଟ୍ରାକ୍ରେ ସେ ୨୦୧୭ରେ କ୍ୟାରିୟରର ପ୍ରଥମ ବିଜୟ ହାସଲ କରିଥିଲେ। ରେଡ୍ବୁଲ୍ର ମର୍ସିଡିଜ୍ର ଲୁଇସ୍ ହାମିଲଟନଙ୍କ ଆଗରେ ମାକ୍ସ ଭର୍ଷ୍ଟାପେନ୍ ଦ୍ୱିତୀୟ ସ୍ଥାନ ଅଧିକାର କରିଥିଲେ। ପ୍ରାକ୍ଟିସ ଷ୍ଟାର୍ଟରେ ତ୍ରୁଟି ପୋଜିଶନ ପାଇଁ ହାମିଲଟନଙ୍କୁ ଦୁଇ ଥର ୫ ସେକେଣ୍ଡ ପେନାଲଟି ହେବାରୁ ସେ ତୃତୀୟ ସ୍ଥାନକୁ ଖସିଯାଇଥିଲେ। ଚାମ୍ପିୟନଶିପ୍ ଲିଡର ହାମିଲଟନ ସୋଚି ଅଟୋଡ୍ରମ୍ଠାରେ ପୋଲ୍ ପୋଜିଶନରୁ ରେସ୍ ଆରମ୍ଭ କରିଥିଲେ। କ୍ୟାରିୟରର ୯୧ତମ ଫର୍ମୁଲା ଓ୍ବାନ ବିଜୟ ସହ ମାଇକେଲ ସୁମାକରଙ୍କ ରେକର୍ଡ ସମକକ୍ଷ ହେବା ଲକ୍ଷ୍ୟରେ ସେ ଥିଲେ। କିନ୍ତୁ ବର୍ତ୍ତମାନ ତାଙ୍କୁ ଆହୁରି କିଛି ସମୟ ଅପେକ୍ଷା କରିବାକୁ ପଡ଼ିବ। ଏଠାରେ ବିଜୟ ଦ୍ୱାରା ଡ୍ରାଇଭର ଚାମ୍ପିୟନଶିପ୍ ଲିଡର ବୋର୍ଡରେ ପ୍ରଥମ ସ୍ଥାନରେ ରହିଥିବା ହାମିଲଟନ ଏବଂ ଦ୍ୱିତୀୟ ସ୍ଥାନରେ ଥିବା ବୋଟାସଙ୍କ ମଧ୍ୟରେ ପଏଣ୍ଟ ବ୍ୟବଧାନ ୪୪କୁ ହ୍ରାସ ପାଇଛି। ତାଲିକାରେ ହାମିଲଟନ ୨୦୫ ପଏଣ୍ଟ ସହ ଶୀର୍ଷରେ ରହିଥିବାବେଳେ ତାଙ୍କ ପଛକୁ ଯଥାକ୍ରମେ ବୋଟାସ (୧୬୧), ଭର୍ଷ୍ଟାପେନ(୧୨୮) ଓ ମ୍ୟାକଲରେନର ଲାଣ୍ଡୋ ନୋରିସ ରହିଛନ୍ତି। ନୋରିସ୍ ରବିବାର ରେସ୍ରେ ୧୫ତମ ସ୍ଥାନରେ ରହିଥିଲେ। ରେନଲ୍ଟର ଡାନିଏଲ ରିକାର୍ଡୋ ଏବଂ ଫେରାରିର ଚାଲର୍ସ ଲେକ୍ରେକ୍ଙ୍କୁ ଯଥାକ୍ରମେ ପଛରେ ପକାଇ ରେସିଂ ପଏଣ୍ଟର ସର୍ଗିଓ ପେରେଜ ୪ର୍ଥ ହୋଇଥିଲେ।
