ବ୍ରହ୍ମପୁର,୧୦ା୩ (ସ୍ମୃତିରଞ୍ଜନ ମହାଲିକ):ମାର୍ଚ୍ଚ ଆରମ୍ଭରୁ ତାତି ବଢ଼ିଲାଣି। ମଧ୍ୟାହ୍ନ ବେଳକୁ ଅସମ୍ଭାଳ ଖରା। ଖରାରେ ଶୋଷ ମେଣ୍ଟାଇବାକୁ ଲୋକେ ବିଭିନ୍ନ ମୃଦ୍ୟୁ ପାନୀୟ ଉପରେ ନିର୍ଭର କରୁଛନ୍ତି। ଭଲ କମ୍ପାନୀର ପାଣି ବୋତଲ ଅଧିକ ଦରରେ ବିକ୍ରି ହେଉଥିବା ବେଳେ ଅନେକ ଦୋକାନରେ ୫ରୁ ୧୦ ଟଙ୍କା ଭିତରେ ଶସ୍ତାରେ ପାଣି ବୋତଲ ମିଳୁଛି। ତେବେ ଏହାର ବିଶୁଦ୍ଧତାକୁ ନେଇ ପ୍ରଶ୍ନ ଉଠିଛି।
ପ୍ରଥମତଃ ପାଣି ବୋତଲ ପ୍ରସ୍ତୁତ ପାଇଁ ବ୍ୟୁରୋ ଅଫ ଇଣ୍ଡିଆନ ଷ୍ଟାଣ୍ଡାର୍ଡ ପକ୍ଷରୁ ଅନୁମତି ଆଣିବାକୁ ପଡିଥାଏ। ପରେ ଖାଦ୍ୟ ନିରାପତ୍ତା ବିଭାଗ ପକ୍ଷରୁ ନଳକୂପ ପାଣି, ଆର୍ଓ ମେଶିନ, ପାଣି ବୋତଲ ପ୍ରସ୍ତୁତ ପରେ ପରୀକ୍ଷା କରାଯାଇ ପାଣି ବିକ୍ରି ନିମନ୍ତେ ସମ୍ପୃକ୍ତ ବ୍ୟକ୍ତିଙ୍କୁ ଲାଇସେନ୍ସ ମିଳିଥାଏ ବୋଲି ବ୍ରହ୍ମପୁର ମହାନଗର ନିଗମ ଖାଦ୍ୟ ନିରାପତ୍ତା ବିଭାଗ ପକ୍ଷରୁ କୁହାଯାଇଛି। ସବୁଠୁ ଗୁରୁତ୍ୱପୂର୍ଣ୍ଣ ହେଲା ପାଣି ପ୍ରସ୍ତୁତି ଓ ଏକ୍ସପାଏରି ତାରିଖ ବୋତଲରେ ରହିବା ନିୟମ ରହିଛି। ସହରରେ ଫାଷ୍ଟ ଗେଟ, ଲାଞ୍ଜିପଲୀ ଜାତୀୟ ରାଜପଥ ପାର୍ଶ୍ୱ ଓ ମହୁରୀ କାଳୁଆଠାରେ ୪ ଲାଇସେନ୍ସପ୍ରାପ୍ତ ପାଣି ବୋତଲ ପ୍ରସ୍ତୁତିକାରୀ କମ୍ପାନୀ ରହିଛି। ସେହିପରି ଲାଇସେନ୍ସ ପ୍ରାପ୍ତ ୮ଟି ସୋଡ଼ା ଓ ମୃଦ୍ୟୁ ପାନୀୟ ପ୍ରସ୍ତୁତକାରୀ କମ୍ପାନୀ ରହିଛି। କିନ୍ତୁ ସହରର ଗଳିକନ୍ଦିରେ ବିନା ଲାଇସେନ୍ସପ୍ରାପ୍ତ ପାଣି ବୋତଲ କାରଖାନା ଗଢି ଉଠିଛି; ଯେଉଁଠାରେ କେବଳ ଆରଓ ମେଶିନ ବ୍ୟବହାର ହେଉଛି। ଏ ବାବଦରେ ଖାଦ୍ୟ ସୁରକ୍ଷା ବିଭାଗ ଅବଗତ ଥାଇ ମଧ୍ୟ କାୈଣସି ପଦକ୍ଷେପ ଗ୍ରହଣ କରୁନାହାନ୍ତି। ବିଆଇଏସ ଲାଇସେନ୍ସପ୍ରାପ୍ତ ପାଣି ବୋତଲ ପ୍ରସ୍ତୁତକାରୀ କମ୍ପାନୀଗୁଡିକରେ ବିଭାଗ ପକ୍ଷରୁ ୨ ଥର ଯାଞ୍ଚ ନିୟମ ରହିଛି। ଯାଞ୍ଚ ସମୟରେ କମ୍ପାନୀର ସ୍ବଚ୍ଛତା ଓ ଆରଓ ମେଶିନ ତଦାରଖକୁ ଅଧିକ ଗୁରୁତ୍ୱ ଦିଆଯାଇଥାଏ। ଏଥିସହ ବିଆଇଏସ୍ ଲାଇସେନ୍ସ ନବୀକରଣ ଯାଞ୍ଚ ନିୟମ ମଧ୍ୟ ରହିଛି। କିନ୍ତୁ ତାହା ଠିକ୍ ଭାବେ ହେଉ ନ ଥିବା ଅଭିଯୋଗ ହେଉଛି।
ଏ ନେଇ ବିଇଏମ୍ସି ଖାଦ୍ୟ ନିରାପତ୍ତା ଅଧିକାରୀ ସ୍ମିତା ଖାଡଙ୍ଗାଙ୍କୁ ପଚାରିବାରୁ ସେ କହିଛନ୍ତି, ଗତ ଜାନୁଆରୀ ମାସରେ ସହରର ଗାୈରାଙ୍ଗ ବିହାରଠାରେ ଏକ ବେଆଇନ ପାଣି ବୋତଲ ପ୍ରସ୍ତୁତକାରୀ କମ୍ପାନୀ ଉପରେ ଚଢ଼ଉ କରାଯାଇ ମାଲିକଙ୍କୁ ଗିରଫ କରାଯାଇଥିଲା। ସେହିପରି ଗୁଡ୍ସ ରୋଡ୍ ଓ ଗୋପାଳପୁର ଜଙ୍କ୍ସନଠାରେ ଥିବା ବେଆଇନ ପାଣି ବୋତଲ କାରଖାନାରେ ଚଢ଼ାଉ କରାଯାଇ କମ୍ପାନୀ ସିଲ୍ କରାଯାଇଥିଲା। ଆମ ନିକଟକୁ କାୈଣସି ଅଭିଯୋଗ ଆସିଲେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଛି ବୋଲି ସେ କହିଛନ୍ତି। ଏ ସଂକ୍ରାନ୍ତରେ ଏମ୍କେସିଜିର ଭେଷଜ ବିଭାଗର ଡା. ନୀହାର ରଞ୍ଜନ ସାହୁଙ୍କୁ ପଚାରିବାରୁ ସେ କହିଲେ, ପ୍ଲାଷ୍ଟିକ ବୋତଲରେ ମିଳୁଥିବା ପିଇବା ପାଣିରେ ଆର୍ଦ୍ରତା ନ ଥାଏ। ଖରାଦିନେ ଜଳୀୟ ଅଂଶ କମ୍ ରହୁଥିବାରୁ କମ୍ ଆର୍ଦ୍ରତାଯୁକ୍ତ ପାଣି ପିଇବା ଦ୍ୱାରା ଖାଦ୍ୟ ବିଷାକ୍ତ ସହ ଜଣ୍ଡିସ, ଟାଇଫଏଡ୍ ଭଳି ରୋଗରେ ଶିକାର ହେବା ସମ୍ଭାବନା ରହିଛି। ବୁଦ୍ଧିଜୀବୀ ବିକାଶ ପ୍ରଧାନ କହିଛନ୍ତି ଯେ, ସହରର ବିଭିନ୍ନ ଦୋକାନରେ ମିଳୁଥିବା ପାଣି ବୋତଲଗୁଡ଼ିକର କାୈଣସି ବୈଧତା ରହୁନି। ପ୍ଲାଷ୍ଟିକ ବୋତଲଗୁଡ଼ିକ ଭଲ କି ଖରାପ ତାହା ଜଣାପଡୁନି। ପ୍ରଶାସନ ପକ୍ଷରୁ ଯାଞ୍ଚ ନ ହେବାରୁ ବହୁ ଅସାଧୁ ବ୍ୟବସାୟୀ ବିଭିନ୍ନ ସ୍ଥାନରେ ପାଣି ପ୍ରସ୍ତୁତ କରି କମ୍ ମୂଲ୍ୟରେ ବଜାରକୁ ଛାଡୁଛନ୍ତି। ଫଳରେ ଲୋକେ ପେଟ ରୋଗରେ ପଡୁଛନ୍ତି। ବୋତଲ ପାଣି କେତେ ବିଶୁଦ୍ଧ ତାହା ଯାଞ୍ଚ କରାଯାଇ କାର୍ଯ୍ୟାନୁଷ୍ଠାନ ଆବଶ୍ୟକ ବୋଲି କହିଛନ୍ତି।