ଭୁବନେଶ୍ୱର,୪।୫(ବ୍ୟୁରୋ): ଭୁବନେଶ୍ୱରରେ ଏକ ବିବାଦୀୟ ଜମିକୁ ଅକ୍ତିଆର କରିବାକୁ ଯାଇ ରାତି ଅଧରେ ଜେସିବି ଲଗାଇ ଦୋକାନ ଭାଙ୍ଗି ଲୁଟ୍ ଘଟଣାରେ ଫେରାର ଥିବା ବାଉନ୍ସର ଗ୍ୟାଙ୍ଗର ମୁଖ୍ୟ ରାଘବ ଜେନା ଦେଢ଼ମାସ ପରେ କମିଶନରେଟ ପୋଲିସ ହାତରେ ଧରାପଡ଼ିଛନ୍ତି। ନୟାପଲ୍ଲୀ ଥାନା ପୋଲିସ ରାଘବ ଓରଫ ବିଶ୍ୱନାଥ ଜେନା (୫୦) ଓ ତାଙ୍କ ସହଯୋଗୀ ଖଣ୍ଡଗିରି ଥାନା ଅଞ୍ଚଳରେ ରହୁଥିବା ସୌମ୍ୟରଞ୍ଜନ ରାଣାସିଂ (୩୦)ଙ୍କୁ ବାଙ୍କୀରୁ ଗିରଫ କରି ବୁଧବାର କୋର୍ଟଚାଲାଣ କରିଛି। ପରେ ଉଭୟଙ୍କୁ ଜେଲକୁ ପଠାଇ ଦିଆଯାଇଛି। ଏହି ମାମଲାରେ ପୂର୍ବରୁ ୧୯ଜଣ ଗିରଫ ହୋଇଥିବା ବେଳେ ଏବେ ଏହି ସଂଖ୍ୟା ୨୧ରେ ପହଞ୍ଚତ୍ଛି। ଅନ୍ୟପକ୍ଷରେ ସୁପାରି ଦେଇଥିବା ରଞ୍ଜିତ ଦାସପୁରିଆଙ୍କୁ ମଧ୍ୟ ଗିରଫ କରିବାକୁ ପୋଲିସ ପ୍ରୟାସ ଜାରି ରଖିଛି।
ନୟାପଲ୍ଲୀ ଥାନା ନିକଟରେ ଥିବା ବିବାଦୀୟ ପ୍ଲଟ୍ ନଂ.୧୪୭୦ରେ ଥିବା ଘରକୁ ସୁବାସ ଅଗ୍ରୱାଲ ଓ ସୁବାସ ସାମଲ ଭଡ଼ା ନେଇ ଦୋକାନ କରିଥିଲେ। ଏହି ବିବାଦୀୟ ଜମିକୁ ଅକ୍ତିଆର କରିବା ପାଇଁ ମାଲିକ ରଞ୍ଜିତ ଦାସପୁରିଆ ୨ବ୍ୟକ୍ତିଙ୍କୁ ଦାୟିତ୍ୱ ଦେଇଥିଲେ। ପରେ ଉକ୍ତ ୨ଜଣ ରାଘବଙ୍କ ସହଯୋଗ ଲୋଡ଼ିଥିଲେ। ରାଘବ ଏଥିପାଇଁ ୨୦ ଲକ୍ଷ ଟଙ୍କା ଦାବି କରି ପ୍ରଥମ ପର୍ଯ୍ୟାୟରେ ୧୩ ଲକ୍ଷ ନେଇଥିବା ବେଳେ ବାକି ଟଙ୍କା କାମ ହେବା ପରେ ନେବେ ବୋଲି କଥା ଛିଡ଼ିଥିଲା। ଗତ ମାର୍ଚ୍ଚ ୨୪ ବିଳମ୍ବିତ ରାତିରେ ପ୍ରାୟ ୫୦ରୁ ଊର୍ଦ୍ଧ୍ୱ ବାଉନ୍ସର ବସ୍, ଜେସିବି ଓ ବାଇକ୍ରେ ଆସି ହଠାତ ଦୋକାନକୁ ଭାଙ୍ଗିଦେବା ସହ ବହୁ ଟଙ୍କାର ଜିନିଷ ଚୋରିକରି ନେଇଥିଲେ। ଏ ନେଇ ଏତଲା ପରେ ପୋଲିସ ୪ଟି ମାମଲା ରୁଜୁ କରି ତଦନ୍ତ କରିଥିଲା। ରାଘବ ଝାରପଡ଼ାସ୍ଥିତ ସରକାରୀ ଜମିରେ ଘର କରି ଭଡ଼ା ବାବଦକୁ ପାଉଥିବା ଲକ୍ଷାଧିକ ଟଙ୍କାରେ ଆପରାଧିକ କାର୍ଯ୍ୟକଳାପ ଚଳାଉଥିବା ଜଣାପଡ଼ିବା ପରେ ପୋଲିସ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିଥିଲା। ବିଏମ୍ସି ଜଏଣ୍ଟ ଏନ୍ଫୋର୍ସମେଣ୍ଟ୍ ଟିମ୍ ଓ ପୋଲିସ ଏପ୍ରିଲ ୧୨ରେ ରାଘବଙ୍କ ୪୦ଟି ଘର ସମେତ ସେଠାରେ ଜବରଦଖଲରେ ଗଢ଼ି ଉଠିଥିବା ମୋଟ ୯୩ଟି ଘର ଭାଙ୍ଗି ଦେଇଥିଲା।