ନୂଆଦିଲ୍ଲୀ, ୨୧।୧୨(ପି.ଟି.): ପ୍ରଥମ ଟେଷ୍ଟରେ ଲଜ୍ଜାଜନକ ପରାଜୟ ପରେ ଭାରତୀୟ ଦଳରେ ବଡ଼ ଧରଣର ପରିବର୍ତ୍ତନ ଆଶା କରାଯାଉଛି। ଯୁବ ଓପନର ପୃଥ୍ବୀ ଶ ଓ ଅଭିଜ୍ଞ ଉଇକେଟକିପର ବ୍ୟାଟ୍ସମ୍ୟାନ ରିଦ୍ଧିମାନ ଶାହା ବାଦ୍ ପଡିବା ସମ୍ଭାବନା ସୃଷ୍ଟି ହୋଇଛି। ଡିସେମ୍ବର ୨୬ ତାରିଖରୁ ଆରମ୍ଭ ହେବାକୁ ଯାଉଥିବା ଦ୍ୱିତୀୟ ତଥା ବକ୍ସିଂ ଡେ ଟେଷ୍ଟରେ ଯୁବ ବ୍ୟାଟ୍ସମ୍ୟାନ ଶୁବମନ ଗିଲ୍, ଅଭିଜ୍ଞ ଲୋକେଶ ରାହୁଲ ଓ ଯୁବ ଉଇକେଟକିପର ବ୍ୟାଟ୍ସମ୍ୟାନ ରିଷଭ ପନ୍ତ ସାମିଲ ହେବା ନିଶ୍ଚିତ ମନେହେଉଛି।
କେତୋଟି ଓ୍ବାର୍ମଅପ୍ ମ୍ୟାଚରେ ଗିଲ୍ ପ୍ରଭାବୀ ପ୍ରଦର୍ଶନ କରିଛନ୍ତି ଓ ପୃଥ୍ବୀଙ୍କ ବଦଳରେ ଦଳରେ ସ୍ଥାନ ପାଇବେ। କାରଣ ରୋହିତ ଶର୍ମା ଅତିକମ୍ରେ ସିଡ୍ନୀରେ ଖେଳାଯିବାକୁ ଥିବା ତୃତୀୟ ଟେଷ୍ଟ ପୂର୍ବରୁ ଦଳ ପାଇଁ ଉପଲବ୍ଧ ହେବେ ନାହିଁ। ଆଡିଲେଡ୍ରେ ପୃଥ୍ବୀ ସମ୍ପୂର୍ଣ୍ଣ ଭାବେ ବିଫଳ ହୋଇଥିଲେ ଓ ତାଙ୍କ ଟେକ୍ନିକ୍ରେ ବଡ଼ ଧରଣର ତ୍ରୁଟି ରହିଥିବା ଅନୁମାନ କରାଯାଉଛି।
ସେହିପରି ରିଦ୍ଧିମାନ ମଧ୍ୟ ଅନୁରୂପ ଭାବେ ବିଫଳ ହୋଇଛନ୍ତି। ଅଭ୍ୟାସ ମ୍ୟାଚରେ ବିସ୍ଫୋରକ ଶତକ ହାସଲ କରିଥିବା ପନ୍ତଙ୍କୁ ସୁଯୋଗ ଦିଆଯିବାର ସମ୍ଭାବନା ସୃଷ୍ଟି ହୋଇଛି। ବାଉନ୍ସ ପିଚ୍ରେ କିପିଂ ସେତେଟା ଗୁରୁତ୍ୱ ବହନ କରିବନି। ତେଣୁ ପନ୍ତ ଦଳରେ ସ୍ଥାନ ପାଇବା ଏକ ପ୍ରକାର ନିଶ୍ଚିତ ମନେହେଉଛି। ପୁଣି ଅଧିନାୟକ ବିରାଟ କୋହଲି ପିତୃତ୍ୱ ଛୁଟିରେ ଭାରତ ଫେରିବାର କାର୍ଯ୍ୟକ୍ରମ ରହିଛି। ରିଷ୍ଟ ଇଞ୍ଜୁରି କାରଣରୁ ଦ୍ରୁତ ବୋଲର ମହମ୍ମଦ ସାମି ସିରିଜରୁ ବାଦ୍ ପଡିଛନ୍ତି। ଫଳରେ ଲୋକେଶ ରାହୁଲ ଓ ଯୁବ ଦ୍ରୁତ ବୋଲର ମହମ୍ମଦ ସିରାଜ ଅନ୍ତିମ ଏକାଦଶରେ ସ୍ଥାନ ପାଇବା ଏକ ପ୍ରକାର ସ୍ପଷ୍ଟ ହୋଇଛି। ଦକ୍ଷିଣ ଆଫ୍ରିକା, ଇଂଲଣ୍ଡ, ନ୍ୟୁଜିଲାଣ୍ଡ ଓ ଅଷ୍ଟ୍ରେଲିଆ ବିପକ୍ଷରେ ରିଦ୍ଧିମାନ ନିହାତି ମାମୁଲି ପ୍ରଦର୍ଶନ କରିଛନ୍ତି ଓ ଗୋଟିଏ ହେଲେ ବି ଅର୍ଦ୍ଧଶତକ ହାସଲ କରିପାରିନାହାନ୍ତି। ତେଣୁ ଇଂଲଣ୍ଡ ଓ ଅଷ୍ଟ୍ରେଲିଆ ଭଳି ଦେଶ ବିପକ୍ଷରେ ପନ୍ତ ପ୍ରଥମ ପସନ୍ଦ ବୋଲି ପୂର୍ବତନ ମୁଖ୍ୟ ଚୟନକର୍ତ୍ତା ଏମ୍ଏସ୍କେ ପ୍ରସାଦ କହିଛନ୍ତି। ତେବେ ଭାରତରେ ୬ ନମ୍ବର ପରେ ବ୍ୟାଟିଂ କରିବାର ଆବଶ୍ୟକତା ଅଧିକାଂଶ ସମୟରେ ନ ଥାଏ। ସେତେବେଳେ ଜଣେ ସ୍ପେଶାଲିଷ୍ଟ ଉଇକେଟକିପରଙ୍କୁ ଦଳରେ ସାମିଲ କରାଯାଇପାରେ ବୋଲି ସେ କହିଛନ୍ତି। ଆଗାମୀ ୩ଟି ଟେଷ୍ଟରେ ପନ୍ତଙ୍କୁ ସୁଯୋଗ ମିଳିବା ନେଇ ମୋର ସମର୍ଥନ ରହିଛି ବୋଲି ସେ ସ୍ପଷ୍ଟ କରିଛନ୍ତି। ସେହିପରି ୨୧ ବର୍ଷୀୟ ପୃଥ୍ବୀଙ୍କ ଟେକ୍ନିକ, ଟେମ୍ପରାମେଣ୍ଟ ଓ ମୋଟାମୋଟି ସ୍ବଭାବ ନେଇ ପ୍ରଶ୍ନ ଉଠିଛି। ତେଣୁ ତାଙ୍କ ସ୍ଥାନରେ ଗିଲ୍ଙ୍କୁ ଅଗ୍ରାଧିକାର ଦିଆଯାଇ ପାରେ। କୋହଲିଙ୍କ ଅନୁପସ୍ଥିତିରେ ହନୁମା ବିହାରୀଙ୍କ ବ୍ୟାଟିଂ କ୍ରମରେ ଉନ୍ନତି କରାଯିବ। ବିହାରୀଙ୍କ ଟେକ୍ନିକ୍ ଓ ଟେମ୍ପରାମେଣ୍ଟ ବେଶ୍ ଭଲ ରହିଛି। କୋହଲିଙ୍କ ଅନୁପସ୍ଥିତିରେ ତାଙ୍କର ଗୁରୁତ୍ୱ ଆହୁରି ବଢିଯାଇଛି। ଆଗାମୀ କେତୋଟି ଟେଷ୍ଟରେ ୪ କିମ୍ବା ୫ ନମ୍ବରରେ ବିହାରୀଙ୍କୁ ସୁଯୋଗ ଦେବା ଉପରେ ପ୍ରସାଦ ଗୁରୁତ୍ୱ ଦେଇଛନ୍ତି। ୬ ନମ୍ବର ସ୍ଥାନ ପାଇଁ ରାହୁଲ ଉପଯୁକ୍ତ ବୋଲି ସେ କହିଛନ୍ତି। ସେହିପରି ଦୁଇଟି ଅଭ୍ୟାସ ମ୍ୟାଚରେ ନବଦୀପ ସଇନିଙ୍କଠାରୁ ସିରାଜ ଅପେକ୍ଷାକୃତ ଭଲ ପ୍ରଦର୍ଶନ କରିଥିବାରୁ ସାମିଙ୍କ ବଦଳରେ ସେ ଦଳରେ ସ୍ଥାନ ପାଇବା ଉଚିତ ହେବ ବୋଲି କୁହାଯାଉଛି।
