ରାଞ୍ଚି,୨୭ା୫: ଦେଶରେ କ୍ରିକେଟକୁ ନେଇ ଲୋକେ ପାଗଳପ୍ରାୟ। ପିଲାଠୁ ଆରମ୍ଭ କରି ବୁଢ଼ା ପର୍ଯ୍ୟନ୍ତ ସମସ୍ତେ କ୍ରିକେଟ ପ୍ରେମରେ ବାଇଆ। ଝାଡ଼ଖଣ୍ଡରୁ ଏମିତି ଜଣେ ଛୋଟପିଲାର କ୍ରିକେଟ ଖେଳ ପ୍ରତି ଅହେତୁକ ଆଗ୍ରହ ଦେଖିବାକୁ ମିଳିଛି। ବୟସ ମାତ୍ର ୨ ବର୍ଷ ୨ ମାସ। ଏହି ବୟସରେ ସେ ଏମିତି ଶଟ୍ ମାରୁଛନ୍ତି ଯାହା ଦେଖିଲେ ଆଖି ଲାଖିଯିବ। ତାଙ୍କର ଏହି ଭିଡିଓ ସୋସିଆଲ ମିଡିଆରେ ବେଶ୍ ଭାଇରାଲ ହେବାରେ ଲାଗିଛି।
ଯେଉଁ ବୟସରେ ପିଲା ଚାଲିବା କିମ୍ବା ଦୌଡ଼ିବା ଆରମ୍ଭ କରନ୍ତି। ସେ ସେହି ବୟସରେ ଫୁଟଓ୍ବାର୍କ ସହିତ ପଡ଼ିଆରେ ଚୌକା ଛକା ମାରି ସମସ୍ତଙ୍କୁ ଚକିତ କରିଦେଉଛନ୍ତି। ତାଙ୍କର ବ୍ୟାଟ୍ ଧରିବା ଶୈଳୀ ଦେଖିଲେ ଯେ କେହି ଭାବିବ ଇଏ ଛୋଟ ପିଲା ନୁହନ୍ତି, ଜଣେ ପ୍ରଫେଶନାଲ କ୍ରିକେଟର।
ଏହି ଶିଶୁ ଜଣକ ବୋକାରୋ ଜିଲାର କୁରାମୋଡସ୍ଥିତ ବିରଡାଣ୍ଟରେ ରହୁଛନ୍ତି। ତାଙ୍କ ନାମ ଜୟନ୍ତ କୁମାର। ତାଙ୍କ ପିତା ଅମିତ କୁମାର କହିଛନ୍ତି, ପୁଅକୁ ମାତ୍ର ୨ ବର୍ଷ ୨ ମାସ ଅର୍ଥାତ୍ ୨୬ ମାସ। ଦୁଇ ବର୍ଷ ହୋଇଥିବା ବେଳେ ଜୟନ୍ତଙ୍କ କ୍ରିକେଟ ପ୍ରତି ଆଗ୍ରହ ବଢ଼ିଥିଲା। ଥରେ ସେ ମୋବାଇଲରେ ଭାରତୀୟ କ୍ରିକେଟ ଦଳର ଅଧିନାୟକ ବିରାଟ କୋହଲିଙ୍କ ଖେଳ ଦେଖି ବ୍ୟାଟ୍ ନେବାକୁ ଜିଦି ଧରିଥିଲା। ଯେତେବେଳେ ତାଙ୍କୁ ବ୍ୟାଟ୍ ଦିଆଗଲା ସେ ଘର ସାମ୍ନାରେ ଥିବା ପଡ଼ିଆରେ ପ୍ରତିଦିନ ସକାଳେ ଖେଳିବା ଆରମ୍ଭ କଲେ ଆଉ ଲମ୍ବା ଲମ୍ବା ଶଟ୍ସ ମାରିବାକୁ ଲାଗିଲେ। ଯାହା ଦେଖି ଲୋକେ ଆଶ୍ଚର୍ଯ୍ୟଚକିତ ହୋଇଗଲେ। ସେ କ୍ରିକେଟ ଖେଳିବେ ବୋଲି ଖାଇବା ପିଇବା ବି ଭୁଲି ଯାଆନ୍ତି। ଅମିତ କୁହନ୍ତି, ପୁଅ ଠିକ୍ରେ ଚାଲିପାରେ ନାହିଁ ବୋଲି ଗୋଡ଼ ପ୍ଲାଷ୍ଟର କରାଯାଇଥିଲା। ଏହା ଧୀରେ ଧୀରେ ଠିକ୍ ହୋଇଯାଇଛି। ଏବେ ସେ ଭଲ ଭାବରେ ଚାଲିପାରୁଛି।
ଜୟନ୍ତ କୁହନ୍ତି, ସେ ବଡ଼ ହେଲେ ବିରାଟ କୋହଲି ହେବେ। ତାଙ୍କର ପରି ଶଟ୍ ମାରିବେ। ତାଙ୍କ ମା’ ଜାନକୀ ଦେବୀ କୁହନ୍ତି, ପୁଅର କ୍ରିକେଟ ପ୍ରତି ଏତେ ଆଗ୍ରହ ଦେଖି ସେ ବହୁତ ଖୁସି।