ଢାକା:ଲୁଚକାଳି ପିଲାବେଳର ସମସ୍ତଙ୍କ ପ୍ରିୟ ଖେଳ ଭାବେ ଜଣାଯାଏ। ଲୁଚକାଳିକୁ ନେଇ ଛୋଟବେଳର ଅନେକ ସ୍ମୃତି ମଧ୍ୟ ଅନେକଙ୍କ ମନେ ଥିବ। କିନ୍ତୁ ଏହି ଲୁଚକାଳି ଖେଳରୁ ଜଣେ ୧୫ ବର୍ଷର ବାଳକ ଯାଇ ମାଲେସିଆରେ ପହଞ୍ଚିଛନ୍ତି। ବାଂଲାଦେଶର ଫହିମ ଗତ ୧୧ ତାରିଖରେ କେତେଜଣ ସାଙ୍ଗମାନଙ୍କ ସହ ମିଶି ଲୁଚକାଳି ଖେଳୁଥିଲେ। ଖେଳୁ ଖେଳୁ ସେ ଯାଇ ଏକ କଣ୍ଟେନରରେ ଲୁଚିଗଲେ। ସେଠାରେ ଲୁଚିଥିବା ଫହିମଙ୍କୁ ନିଦ ହୋଇଯାଇଥିଲା ଓ କଣ୍ଟେନରରେ ସେ ଶୋଇପଡ଼ିଥିଲେ। ଉକ୍ତ କଣ୍ଟେନରଟି ଜାହାଜରେ ଲୋଡ୍ ହୋଇ ମାଲେସିଆରେ ଯାଇ ପହଞ୍ଚିଥିଲା। ୧୧ ତାରିଖ ପରଠାରୁ ଫହିମଙ୍କ କୌଣସି ଖୋଜ୍ଖବର ମିଳୁ ନ ଥିଲା। ନିଦ ଭାଙ୍ଗିବା ପରେ ଫାହିମ ରକ୍ଷା ପାଇଁ ଚିତ୍କାର କରିଥିଲେ ହେଁ କେହି ତାଙ୍କୁ ଶୁଣିପାରି ନ ଥିଲେ। ଠିକ୍ ୬ ଦିନ ପରେ କଣ୍ଟେନରଟି ଯାଇ ପହଞ୍ଚିଥିଲା ମାଲେସିଆରେ। ଉକ୍ତ କଣ୍ଟେନରକୁ ଜାହାଜରୁ ବାହାର କରିବା ସମୟରେ ଲୋକେ ଫହିମଙ୍କ ଚିତ୍କାର ଶୁଣିବାକୁ ପାଇଥିଲେ। ସଙ୍ଗେ ସଙ୍ଗେ କଣ୍ଟେନର ଖୋଲି ଦେଖିବା ବେଳକୁ ତା’ ଭିତରେ ଜରାଜୀର୍ଣ୍ଣ ଅବସ୍ଥାରେ ଥିବା ଫାହିମଙ୍କୁ ପାଇଥିଲେ। ବନ୍ଦର କର୍ତ୍ତୃପକ୍ଷ ତୁରନ୍ତ ତାଙ୍କୁ ଟେଙ୍ଗକୁ ଆମ୍ପୁଆନ ରହିମାହ ହସ୍ପିଟାଲରେ ଭର୍ତ୍ତି କରିଥିଲେ। ଫହିମଙ୍କ କଣ୍ଟେନରରୁ ଉଦ୍ଧାର କରିବାର ଫଟୋ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ତେବେ ଫହିମଙ୍କୁ ପୁଣି ବାଂଲାଦେଶ ପଠାଇବା ପାଇଁ ମାଲେସିଆର କ୍ଲାଙ୍ଗ ବନ୍ଦର କର୍ତ୍ତୃପକ୍ଷ ପ୍ରତିପକ୍ଷ ବାଂଲାଦେଶ ସହ ଆଲୋଚନା କରିଥିବା ଜଣାପଡ଼ିଛି। ଅନ୍ୟପକ୍ଷେ ଚିକିତ୍ସାଧୀନ ଅବସ୍ଥାରେ ଥିବା ଫହିମଙ୍କ ସ୍ବାସ୍ଥ୍ୟାବସ୍ଥା ସୁଧୁରିବାରେ ଲାଗିଛି।