ଭୁବନ,୨୦ା୧(ବିପିନ ବିହାରୀ ସେଠୀ): ଢେଙ୍କାନାଳ ଜିଲା ଭୁବନ ଥାନା କୁନିନ୍ଦା ଗ୍ରାମର ମାମୁ ସୁଦାମ ବାରିକଙ୍କ ଘରେ ରହୁଥିବା କଲେଜ ଛାତ୍ରୀ ଭାଣିଜୀ ପଦ୍ମିନୀ ନାୟକଙ୍କ ହତ୍ୟା ଘଟଣା ଉପରୁ ପରଦା ହଟାଇଛି ପୋଳିସ। ଫେସ୍ବୁକ୍ ସମ୍ପର୍କରୁ ପ୍ରେମିକ ସାଜିଥିବା ମୁଆ ଗ୍ରାମର ପ୍ରମୋଦ ବାହାଲିଆ ଏହି ଘଟଣାର ମୁଖ୍ୟ ଅଭିଯୁକ୍ତ ବୋଲି ପୋଲିସ ପ୍ରକାଶ କରିଛି। ଗିରଫ ପରେ ଅଭିଯୁକ୍ତ ପ୍ରମୋଦଙ୍କୁ କୋର୍ଟଚାଲାଣ କରାଯାଇଥିବା ପୋଲିସ ସୂଚନା ଦେଇଛି।
ପୋଲିସ ସୂଚନା ମୁତାବକ, ବାସୁଦେଇପୁର ଗ୍ରାମର ବ୍ରହ୍ମାନନ୍ଦ ନାୟକଙ୍କ ଝିଅ ପଦ୍ମିନୀ ପିଲାବେଳୁ କୁନିନ୍ଦା ଗ୍ରାମସ୍ଥିତ ମାମୁ ଘରେ ରହି ପାଠ ପଢୁଥିଲେ। ଯୁକ୍ତ ୩ରେ ପଢ଼ୁଥିବା ପଦ୍ମିନୀଙ୍କ ସହ ଫେସବୁକରେ ଅଭିଯୁକ୍ତ ପ୍ରମୋଦଙ୍କ ପରିଚୟ ହୋଇଥିଲା। ପରେ ଏହା ପ୍ରେମ ସମ୍ପର୍କରେ ପରିଣତ ହୋଇଥିଲା। ତେବେ ଗତ ୧୫ ତାରିଖରେ ମାମୁ ସୁଦାମ କ୍ରିକେଟ୍ ମ୍ୟାଚ ଦେଖିବକୁ ଯାଇଥିଲେ। ମାଈଁ ମଧ୍ୟ ଘରେ ନ ଥିଲେ।
ଏହାର ସୁଯୋଗ ନେଇ ପଦ୍ମିନୀ ପ୍ରେମିକ ପ୍ରମୋଦଙ୍କୁ ଫୋନ କରି ଡକାଇଥିଲେ। ପ୍ରମୋଦ ଏକ ବାଇକ୍ (ନଂ. ଓଡି ୦୬ ଜେ ୬୯୯୨)ରେ କୁନିନ୍ଦା ଗ୍ରାମକୁ ଯାଇଥିଲେ। ହେଲେ ମକର ଯାତ୍ରା ଦେଖିବାକୁ ନେଇ ପଦ୍ମିନୀ ଓ ପ୍ରମୋଦଙ୍କ ମଧ୍ୟରେ ବଚସା ହୋଇଥିଲା। ଏଥିରେ ରାଗିଯାଇ ପ୍ରମୋଦ ଏକ ପ୍ଲାଷ୍ଟିକ ରଶିରେ ପଦ୍ମିନୀଙ୍କ ବେକକୁ ଚିପି ହତ୍ୟା କରିଥିଲେ। ପରେ ଘଟଣାସ୍ଥଳରୁ ପଳାଇଯାଇ ଶାମଳ ଗ୍ରାମ ନିକଟରେ ଅନ୍ୟ ଜଣେ ଲୋକଙ୍କ ମୋବାଇଲରୁ ପଦ୍ମିନୀଙ୍କ ମାମୁଙ୍କୁ ଫୋନ କରି ପଦ୍ମିନୀ ଘରେ ପଡ଼ିଥିବା ଜଣାଇଥିଲେ।
ଖବରପାଇ ମାମୁ ସୁଦାମ ଘରେ ପହଞ୍ଚି ପଦ୍ମିନୀଙ୍କୁ ଭୁବନ ଡାକ୍ତରଖାନାକୁ ନେଇଥିଲେ। ସେଠାରେ ଡାକ୍ତର ମୃତ ଘୋଷଣା କରିଥିଲେ। ମୃତା ଛାତ୍ରୀଙ୍କ ବାପା ବ୍ରହ୍ମାନନ୍ଦ ଏ ନେଇ ଭୁବନ ଥାନାରେ ଅଭିଯୋଗ କରିବା ପରେ ପୋଲିସ ନଂ. ୧୮/୨୦୨୪ରେ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା। ୨ଟି ଟିମ ଗଠନ କରାଯାଇ ତଦନ୍ତ ପରେ ଅଭିଯୁକ୍ତ ପ୍ରମୋଦଙ୍କୁ ଧରିବାରେ ପୋଲିସ ସକ୍ଷମ ହୋଇଥିବା କାମାକ୍ଷାନଗର ଉପଖଣ୍ଡ ଆରକ୍ଷୀ ଅଧୀକ୍ଷକ ପ୍ରଭାତ କୁମାର ତ୍ରିପାଠୀ, ଥାନା ଅଧିକାରୀ ନରେଶ କୁମାର ସାହୁ ଓ ଅତିରିକ୍ତ ଥାନା ଅଧିକାରୀ ମନସିନୀ ମହାନ୍ତି ଖବରଦାତା ସମ୍ମିଳନୀରେ ସୂଚନା ଦେଇଛନ୍ତି।