ପ୍ରେମିକାଙ୍କ ପଛରେ ଜଣେ ପ୍ରେମିକ ୪୦୦,୦୦୦ ପାଉଣ୍ଡ ଅର୍ଥାତ୍ ୪ କୋଟି ଟଙ୍କା ଖର୍ଚ୍ଚ କରୁଥିଲେ। ଶେଷରେ ପ୍ରେମିକାଙ୍କୁ ପ୍ରପୋଜ କରିବାକୁ ଯାଇ ଯୁବକଙ୍କୁ ଝଟ୍କା ଲାଗିଛି। ୬ ମାସ ପର୍ଯ୍ୟନ୍ତ ପ୍ରେମିକାଙ୍କ ସହ ରିଲେସନଶିପ୍ରେ ରହିବା ପରେ ତାଙ୍କୁ ବିବାହ କରିବାକୁ ଚାହୁଁଥିଲେ। ମାତ୍ର ସତ ଜାଣିବା ପରେ ତାଙ୍କର ହୋସ୍ ଉଡ଼ିଯାଇଥିଲା।
ଏକ ରିପୋର୍ଟ ଅନୁଯାୟୀ, ବ୍ରିଟେନର ଚେଲ୍ସାରେ ରହୁଥିବା ମୋସ ମେଫେୟାର ନାମକ ଜଣେ ୨୫ ବର୍ଷୀୟ ଯୁବକ ତାଙ୍କ ପ୍ରେମିକାଙ୍କୁ ବିବାହ କରିବା ପାଇଁ ଚାହୁଁଥିଲେ। କିନ୍ତୁ ଏହା ପୂର୍ବରୁ ଏକ ସତ କଥା ଜାଣି ତାଙ୍କ ହୋସ୍ ଉଡ଼ିଗଲା। ଦିନେ ପ୍ରେମିକାଙ୍କ ଇନ୍ଷ୍ଟାଗ୍ରାମ ଆକାଉଣ୍ଟକୁ ନିଜର ମୋବାଇଲ୍ରେ ଲଗ୍ ଇନ୍ କରିଥିଲେ। ଇନ୍ଷ୍ଟାଗ୍ରାମରେ ପ୍ରେମିକା ଆଉ ଜଣେ ଲୋକଙ୍କ ସହ କରିଥିବା ଚାଟ୍ ସେ ଦେଖିଥିଲେ। ଏପରିକି ଏହି ଚାଟ୍ରେ ମେଫେୟାରଙ୍କୁ ତାଙ୍କ ପ୍ରେମିକା ଅଜଣା ବ୍ୟକ୍ତି ବୋଲି ଲେଖିଛନ୍ତି। ଯାହା ଦେଖିବା ପରେ ତାଙ୍କ ହୃଦୟ ଭାଙ୍ଗିଯାଇଛି। ଯାହାକୁ ପାଇବେ ବୋଲି ତାଙ୍କ ପଛରେ ପାଣି ପରି ଟଙ୍କା ଖର୍ଚ୍ଚ କରୁଥିଲେ ସେ ଆଉ କାହାକୁ ଭଲ ପାଉଛନ୍ତି ଜାଣି ଚୁପ୍ ରହିଯାଇଥିଲେ ମେଫେୟାର। ଏହାର କିଛିଦିନ ପରେ ସେ ତାଙ୍କ ପ୍ରେମିକାଙ୍କୁ ଛାଡ଼ିବାକୁ ବାଧ୍ୟ ହେଲେ। ପରବର୍ତ୍ତୀ ସମୟରେ ପ୍ରେମିକା ଜଣଙ୍କ ମେଫେୟାରଙ୍କ ସହ ସମ୍ପର୍କ ଯୋଡ଼ିବାକୁ ଚେଷ୍ଟା କରିଥିଲେ। ମାତ୍ର ମେଫେୟାର ମନା କରିଦେଇଥିଲେ।
ମନା ସିନା କରିଦେଲେ କିନ୍ତୁ ସେ ପ୍ରେମିକାଙ୍କ ପଛରେ ଖର୍ଚ୍ଚ କରିଥିବା ଟଙ୍କା ବିଷୟରେ ଏବେ ଭାଳି ହେଉଛନ୍ତି। ପ୍ରେମିକାଙ୍କୁ ଲଞ୍ଚ୍, ଡିନର, ଶପିଂ, ଗିଫ୍ଟ ଆଦିରେ କୋଟିକୋଟି ଟଙ୍କା ଖର୍ଚ୍ଚ କରିଛନ୍ତି। ଏବେ କେବଳ ଅନୁତାପ କରିବା ଛଡ଼ା ତାଙ୍କ ନିକଟରେ କୌଣସି ରାସ୍ତା ନାହିଁ ବୋଲି କହିଛନ୍ତି।