ନୂଆଦିଲ୍ଲୀ, ୧୪।୪: ଦେଶର ୧ଶହ ବ୍ୟସ୍ତବହୁଳ ଜାତୀୟ ରାଜପଥରେ ୧୦୦ଟି ଫାଷ୍ଟ ଇଲେକ୍ଟ୍ରିକ୍ ଭେହିକିଲ୍ (ଇଭି) କରିଡର ନିର୍ମାଣ ସମ୍ପର୍କରେ ରାଷ୍ଟ୍ରାୟତ୍ତ ପେଟ୍ରୋଲିୟମ୍ ମାର୍କେଟିଂ କମ୍ପାନୀ ଭାରତ ପେଟ୍ରୋଲିୟମ୍ କର୍ପୋରେଶନ (ବିପିସିଏଲ୍) ପକ୍ଷରୁ ବୁଧବାର ସୂଚନା ଦିଆଯାଇଛି। ଏନେଇ କମ୍ପାନୀ ପକ୍ଷରୁ ୨୦୦ କୋଟି ଟଙ୍କା ନିବେଶ କରାଯିବ ବୋଲି ମଧ୍ୟ କୁହାଯାଇଛି। ଏହି କରିଡରଗୁଡ଼ିକରେ ୨୦୦୦ ଚାର୍ଜିଂ ଷ୍ଟେଶନ ରହିବ। ଏ ସମ୍ପର୍କରେ ବିପିସିଏଲ୍ର କାର୍ଯ୍ୟକାରୀ ନିର୍ଦ୍ଦେଶକ ପିଏସ୍ ରବି ବୁଧବାର ଗଣମାଧ୍ୟମକୁ ସୂଚନା ଦେଇ କହିଛନ୍ତି, କମ୍ପାନୀ ବର୍ତ୍ତମାନ ଚେନ୍ନାଇ-ତ୍ରିଚି ମଦୁରାଇ ରାଜପଥରେ ପ୍ରଥମ ଇଭି ଚାର୍ଜିଂ କରିଡର ସ୍ଥାପନା କରିଛି। ଜାତୀୟ ରାଜପଥ ୪୭ରେ କୋଚି-ସାଲେମ ସେକ୍ସନରେ ଆସନ୍ତା ୨ମାସ ମଧ୍ୟରେ କମ୍ପାନୀ ପକ୍ଷରୁ ପରବର୍ତ୍ତୀ ଇଭି ଚାର୍ଜିଂ କରିଡର ସ୍ଥାପନା କରାଯିବ ବୋଲି ସେ କହିଛନ୍ତି।