![](https://www.dharitri.com/wp-content/uploads/2021/07/6-16.jpg)
ନୂଆଦିଲ୍ଲୀ,୧୧।୭: ବର୍ତ୍ତମାନ ଭାରତୀୟ ଦଳ ସୀମିତ ଓଭର ସିରିଜ୍ ପାଇଁ ଶ୍ରୀଲଙ୍କାରେ ଅଛି। ଏହି ସିରିଜ୍ରୁ କିଛି ଖେଳାଳିଙ୍କୁ ଟି୨୦ ବିଶ୍ୱକପ୍ ଲାଗି ଭାରତୀୟ ଦଳରେ ଯାଗା ମିଳିପାରେ। ଚଳିତ ବର୍ଷ ଅକ୍ଟୋବର-ନଭେମ୍ବର ମଧ୍ୟରେ ୟୁଏଇରେ ଖେଳାଯିବାକୁ ଥିବା ଟି୨୦ ବିଶ୍ୱକପ୍ ଲାଗି ଭାରତୀୟ ଏକାଦଶ ବାଛିଛନ୍ତି ପୂର୍ବତନ ଅଷ୍ଟ୍ରେଲିଆନ ସ୍ପିନର ବ୍ରାଡ୍ ହଗ୍। ତାଙ୍କ ଦଳରେ ସ୍ଥାନ ପାଇ ନାହାନ୍ତି ଫୁଲ ଫର୍ମରେ ଥିବା ଶିଖର ଧାଓ୍ବନ।
ତାଙ୍କ ମରେ ରୋହିତ ଶର୍ମାଙ୍କ ସହ ଅଧିନାୟକ ବିରାଟ କୋହଲି ଓପନିଂ କରିବା ଉଚିତ। ଏହାର ଅର୍ଥ ଧାଓ୍ବନଙ୍କ ଲାଗି ତାଙ୍କ ଦଳରେ ସ୍ଥାନ ନାହିଁ। ତାଙ୍କ ଦଳରେ ସ୍ଥାନ ପାଇଛନ୍ତି ସୂର୍ଯ୍ୟକୁମାର ଯାଦବ, ଲୋକେଶ ରାହୁଲ ଓ ରିଷଭ ପନ୍ତ।
ମୋ ଭାରତୀୟ ଦଳ ପାଇଁ ଟି୨୦ ବିଶ୍ୱକପ୍ରେ କୋହଲି ଓ ରୋହିତ ଓପନିଂ କରିବେ। ଧାଓ୍ବନଙ୍କ ଲାଗି ଦୁଃଖିତ। କିନ୍ତୁ ଭାରତୀୟ ଦଳକୁ ମଧ୍ୟକ୍ରମରେ କିଛି ଆଟାକିଂ ଖେଳାଳି ଦରକାର। ଏଣୁ କୋହଲି ଓପନିଂ କରିବେ। ୩ୟ କ୍ରମରେ ବ୍ୟାଟିଂ କରିବେ ସୂର୍ଯ୍ୟ। ମୋ ମତରେ ତାଙ୍କ ବହୁମୁଖୀ ବ୍ୟାଟିଂ ଟିମ୍ ଇଣ୍ଡିଆ ପାଇଁ ବେଶ୍ ସହାୟକ ହେବ। ତାଙ୍କ ପଛକୁ ୪ର୍ଥ କ୍ରମ ପାଇଁ ପ୍ରବଳ ଦାବିଦାର ରାହୁଲ। ୫ମ କ୍ରମରେ ଉଇକେଟକିପର ପନ୍ତ। ଯଦି ଉଇକେଟ ପତନ ଘଟେ ପନ୍ତ ଉପରେ ବ୍ୟାଟିଂ କରିବେ। ହାର୍ଦ୍ଦିକ ପାଣ୍ଡ୍ୟା ଓ ରବୀନ୍ଦ୍ର ଜାଡେଜାଙ୍କ ରୂପେ ଦୁଇ ଅଲରାଉଣ୍ଡରଙ୍କୁ ଦଳରେ ରଖିଛି ବୋଲି ହଗ୍ ନିଜ ୟୁଟ୍ୟୁବ ଭିଡିଓରେ କହିଛନ୍ତି।
ବୋଲିଂ ବିଭାଗରେ ଭୁବନେଶ୍ୱର କୁମାର, ଶାର୍ଦ୍ଦୁଳ ଠାକୁର ଓ ଯଶପ୍ରୀତ ବୁମରା ୩ ପେସରଙ୍କୁ ଯାଗା ଦେଇଛନ୍ତି ପୂର୍ବତନ ଚାଇନାମ୍ୟାନ ସ୍ପିନର। ତାଙ୍କ ମତରେ ଦଳରେ କୁଲଦୀପ ଯାଦବ ଓ ୟୁଜବେନ୍ଦ୍ର ଚହଲଙ୍କ ମଧ୍ୟରୁ ଜଣେ ହିଁ ଖେଳିପାରିବ। ଶ୍ରୀଲଙ୍କା ବିପକ୍ଷ ସିରିଜ୍ରେ ଯଦି କିଛି ଚମତ୍କାର ପ୍ରଦର୍ଶନ କରି ଦେଖାନ୍ତି, ତାହେଲେ କୁଲଦୀପଙ୍କୁ ଯାଗା ମିଳିବ। ନ ହେଲେ ଟିମ୍ ଇଣ୍ଡିଆ ପାଇଁ ଚହଲ ପ୍ରଥମ ସ୍ପିନର ବିକଳ୍ପ। ଠାକୁରଙ୍କ ପାଖରେ ଥିବା ବିସ୍ଫୋରକ ବ୍ୟାଟିଂ ଦକ୍ଷତା ତାଙ୍କୁ ଦଳରେ ସ୍ଥାନ ଦେଇପାରେ। ପାଓ୍ବରପ୍ଲେ ଓ ଡେଥ୍ରେ ସେ ଭଲ ବୋଲିଂ କରନ୍ତି ବୋଲି ହଗ୍ କହିଛନ୍ତି।