ଲକ୍ଷ୍ନୌ,୯।୬: ଲକ୍ଷ୍ନୌର ହାଇକୋର୍ଟ ପରିସରରେ କୁଖ୍ୟାତ ଗ୍ୟାଙ୍ଗଷ୍ଟର ସଞ୍ଜୀବ ଜୀଭାଙ୍କୁ ବୁଧବାର ଗୁଳି କରି ହତ୍ୟା କରାଯାଇଛି। ଏହି ହତ୍ୟାକାଣ୍ଡ ଉତ୍ତରପ୍ରଦେଶ ରାଜନୀତିର ୩ଦଶକର ପୁରୁଣା ଅଧ୍ୟାୟକୁ ତାଜା କରିଦେଇଛି। ସଞ୍ଜୀବ ଭାଜପାର ଦୁଇ ବିଧାୟକ କୃଷ୍ଣାନନ୍ଦ ରାୟ ଏବଂ ବ୍ରହ୍ମାଦତ୍ତ ଦ୍ୱିବେଦୀ ହତ୍ୟାକାଣ୍ଡର ଅଭିଯୁକ୍ତ ଥିଲେ। ବ୍ରହ୍ମାଦତ୍ତ ମର୍ଡର କେସ୍ରେ ସେ ଆଜୀବନ ଜେଲଦଣ୍ଡ ଭୋଗୁଥିଲେ। ବ୍ରହ୍ମାଦତ୍ତଙ୍କୁ ୧୯୯୭ ଫେବୃୟାରୀ ୧୦ରେ ହତ୍ୟା କରାଯାଇଥିଲା। ଏଥିରେ ମୁଖତାର ଅନସାରୀଙ୍କ ଘନିଷ୍ଠ ସହଯୋଗୀ ସଞ୍ଜୀବ ମୁଖ୍ୟ ଅଭିଯୁକ୍ତ ଥିଲେ।
ତେବେ ସେହି ସମୟରେ ଭାଜପାର ଶୀର୍ଷ ନେତାଙ୍କ ମଧ୍ୟରୁ ବ୍ରହ୍ମାଦତ୍ତ ଦ୍ୱିବେଦୀଙ୍କୁ ଗଣା ଯାଉଥିଲା। ସେ ଅଟଳ ବିହାରୀ ବାଜପେୟୀ, ଆଡଭାନି ଏବଂ ମୁରଲୀ ମନୋହର ଜୋଶୀଙ୍କ ନିକଟତର ଥିଲେ। ୧୯୯୫ରେ ହୋଇଥିବା ଗେଷ୍ଟ ହାଉସ୍ ଘଟଣାରୁ ସେ ଚର୍ଚ୍ଚିତ ହୋଇଥିଲେ। ତେବେ ସେହି ଘଟଣାରୁ ସେ ମାୟାବତୀଙ୍କ ନିକଟତର ହୋଇଥିଲେ। ଭାଜପା ସହ ମେଣ୍ଟ ସମୟରେ ମାୟାବତୀ ବ୍ରହ୍ମାଦତ୍ତଙ୍କୁ ମୁଖମନ୍ତ୍ରୀ କରିବାକୁ ଚାହୁଁଥିଲେ।
୧୯୯୩ରେ ସମାଜବାଦୀ ପାର୍ଟି ଏବଂ ବହୁଜନ ସମାଜ ପାର୍ଟି ଏକାଠି ନିର୍ବାଚନ ଲଢି ମେଣ୍ଟ ସରକାର ଗଠନ କରିଥିଲେ। ଦୁଇବର୍ଷ ସରକାରରେ ରହିବା ପରେ ୧୯୯୫ରେ ମାୟାବତୀ ମେଣ୍ଟ ସରକାରରୁ ସମର୍ଥନ ହଟାଇ ନେଇଥିଲେ। ଏନେଇ ଏସପି ସମର୍ଥକମାନେ ମାୟାବତୀଙ୍କୁ ବିରୋଧ କରିଥିଲେ।
ଲକ୍ଷ୍ନୌର ଏକ ଗେଷ୍ଟ ହାଉସ୍ରେ ମାୟାବତୀ ଏସପି ସହ ମେଣ୍ଟ ସରକାର ଭାଙ୍ଗିବା ପାଇଁ ବିଏସପି ନେତାଙ୍କ ସହ ବୈଠକ କରୁଥିଲେ। ତେବେ ଏହି ସମୟରେ ଏସପିର କାର୍ଯ୍ୟକର୍ତ୍ତାମାନେ ଗେଷ୍ଟ ହାଉସ୍କୁ ଘେରାଉ କରିଥିଲେ। ଗେଷ୍ଟ ହାଉସର ସେହି ରୁମ୍ରେ ଦୁଇ ଦଳ ମଧ୍ୟରେ ଗଣ୍ଡଗୋଳ ପରିସ୍ଥିତି ସୃଷ୍ଟି ହୋଇଥିଲା। ଗଣ୍ଡଗୋଳରୁ ବଞ୍ଚିବା ପାଇଁ ମାୟାବତୀ ନିଜକୁ ଏକ ରୁମ୍ରେ ବନ୍ଦ କରି ଦେଇଥିଲେ। ଖବର ପାଇ ବ୍ରହ୍ମାଦତ୍ତ ଘଟଣାସ୍ଥଳରେ ପହଞ୍ଚିଥିଲେ। ମାୟାବତୀ ଏବଂ ବିଏସପିର ଅନ୍ୟ ନେତାଙ୍କୁ ସେଠାରୁ ବଞ୍ଚାଇ ସେ ରାଜ୍ୟପାଳଙ୍କ କାର୍ଯ୍ୟଳୟକୁ ନେଇଯାଇଥିଲେ।
ଏହି ଘଟଣାକୁ ନେଇ ମାୟାବତୀ ବ୍ରହ୍ମାଦତ୍ତଙ୍କ ନିକଟତର ହୋଇଥିଲେ। ସେ ପ୍ରତିଟି କାର୍ଯ୍ୟରେ ବ୍ରହ୍ମାଦତ୍ତଙ୍କୁ ସମର୍ଥନ କରିଥିଲେ। ମାୟାବତୀ ଭାଜପା ସହ ମେଣ୍ଟ ସରକାର ଗଢିବା ସମୟରେ ଅଧା ଅଧା ଟର୍ମରେ ମୁଖ୍ୟମନ୍ତ୍ରୀକୁ ନେଇ ଚୁକ୍ତି କରାଯାଇଥିଲା। ଯେଉଁଥିରେ ସେ ମୁଖ୍ୟମନ୍ତ୍ରୀ ପଦ ପାଇଁ ବ୍ରହ୍ମାଦତ୍ତଙ୍କୁ ସମର୍ଥନ କରିଥିଲେ। କିନ୍ତୁ ଭାଜପା କଲ୍ୟାଣ ସିଂହଙ୍କୁ ମୁଖ୍ୟମନ୍ତ୍ରୀ ପଦ ଦେଇଥିଲା। ପରେ ୧୯୯୭ରେ ଏକ ତେଲକ ସମାରୋହରେ ବ୍ରହ୍ମାଦତ୍ତଙ୍କୁ ଗୁଳି ମାରି ହତ୍ୟା କରାଯାଇଥିଲା।