ହିଞ୍ଜିଳିକାଟୁ,୨୫।୩(ଦ୍ବିତୀକୃଷ୍ଣ ପଣ୍ଡା): ମର୍ନିଂ କ୍ରିକେଟ କ୍ଲବ ହିଞ୍ଜିଳିକାଟୁ ପକ୍ଷରୁ ଆୟୋଜିତ ୬ଷ୍ଠ ରାତ୍ରକାଳୀନ ଟେନିସ୍ ବଲ୍ କ୍ରିକେଟ ଟୁର୍ନାମେଣ୍ଟର ଫାଇନାଲ ମ୍ୟାଚ୍ରେ ମୁମ୍ବାଇ କଲ୍ୟାଣ ଋତୁଭି କି ଫେରାରି ଟିମ୍କୁ ୩୨ରନ୍ରେ ହରାଇ ରୟାଲ ଷ୍ଟ୍ରାଇକର ବ୍ରହ୍ମପୁର ଚାମ୍ପିୟନ ହୋଇଛି।
ରବିବାର ରାତିରେ ହିଞ୍ଜିଳିକାଟୁ ବୃନ୍ଦାବନ ବିଦ୍ୟାପୀଠ ମିନି ଷ୍ଟାଡିୟମରେ ଆୟୋଜିତ ଏହି ମ୍ୟାଚ୍ରେ ବ୍ରହ୍ମପୁର ଦଳ ଟସ୍ ଜିତି ପ୍ରଥମେ ବ୍ୟାଟିଂ କରିଥିଲେ। ନିର୍ଦ୍ଧାରିତ ୧୨ ଓଭରରେ ୪ ଉଇକେଟ ହରାଇ ବ୍ରହ୍ମପୁର ୧୪୦ ରନ୍ କରିଥିଲେ। ଜବାବରେ ମୁମ୍ବାଇ ୧୨ ଓଭରରେ ୬ ଉଇକେଟ ହରାଇ ୧୦୮ ରନ୍ କରିବାରେ ସକ୍ଷମ ହୋଇଥିଲା।
ପୁରସ୍କାର ବିତରଣ କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ପୌର ଅଧ୍ୟକ୍ଷ ସୁବାସ ଚନ୍ଦ୍ର ପଲେଇ, ପୌରାଧ୍ୟକ୍ଷା ସୁଚିତ୍ରା ପଣ୍ଡା, ଗ୍ରୀଟ୍ ଅଧ୍ୟକ୍ଷ ପବିତ୍ର ମୋହନ ପାଣିଗ୍ରାହୀ, ରାଜ୍ୟ ବିଜେଡି ସାଧାରଣ ସମ୍ପାଦକ ଦେବାନନ୍ଦ ମହାପାତ୍ର, ଯୁବ ବିଜେଡ଼ି ସଭାପତି ସଞ୍ଜୟ ପଣ୍ଡା, ନୀଳମଣି ପଟ୍ଟନାୟକ, ପ୍ରଦୀପ ପଣ୍ଡା ପ୍ରମୁଖ ଯୋଗ ଦେଇଥିଲେ। ଟୁର୍ନାମେଣ୍ଟ ଅଧ୍ୟକ୍ଷ ତଥା କାଉନସିଲର ବିଭୁପ୍ରସାଦ ପଣ୍ଡା, କ୍ଲବ ସଭାପତି ନିଶିକାନ୍ତ ପଣ୍ଡା ପ୍ରମୁଖ ଉପସ୍ଥିତ ଥିଲେ।
ବ୍ରହ୍ମପୁର ଦଳର ଭି. ସତୀଶ ମ୍ୟାନ୍ ଅଫ ଦି ଫାଇନାଲ ହୋଇଥିଲେ। ରାଜା ସାମଲ ଓ ସତ୍ୟ ନାରାୟଣ ପାଣି ମ୍ୟାଚ୍ ପରିଚାଳନା କରିଥିଲେ। ମର୍ନିଂ କ୍ରିକେଟ କ୍ଳବର ଚନ୍ଦ୍ରଶେଖର ସାହୁ, ଅମୂଲ୍ୟ ପଣ୍ଡା, କାହ୍ନା ସାବତ, ଭଗବାନ ପାତ୍ର, ଶ୍ରୀଧର, ଚିମନ ସାହୁ, ଜଗନ ଡାକୁଆ, ଆଦିତ୍ୟ ସାହୁ ଓ ମୁନା ମହାରଣା କାର୍ଯ୍ୟକ୍ରମ ପରିଚାଳନା କରିଥିଲେ।
ମ୍ୟାଚ୍ ଦେଖିବା ପାଇଁ ଆଖପାଖ ଅଞ୍ଚଳର ବହୁ କ୍ରିକେଟ ପ୍ରେମୀଙ୍କ ଭିଡ଼ ଜମିଥିଲା। ଆଧୁନିକ ବୈଷୟିକ କୌଶଳ ବ୍ୟବହାର କରି ମ୍ୟାଚକୁ ବିଭିନ୍ନ ସୋସିଆଲ ମିଡିଆରେ ଲାଇଭ କରାଯାଇଥିଲା।