ବ୍ରହ୍ମପୁର,୨୪ା୫(ନରସିଂହ ସାହୁ): ଗଞ୍ଜାମ ଜିଲାରେ ପ୍ରଥମ ପର୍ଯ୍ୟାୟ ନିର୍ବାଚନର ୧୨ ଦିନ ବିତିଛି। ସେହିପରି ୫ ଦିନ ହେଲା ଦ୍ୱିତୀୟ ପର୍ଯ୍ୟାୟ ମତଦାନ ସରିଛି। ଜିଲାର ଦୁଇ ଲୋକ ସଭା ଓ ୧୩ ବିଧାନସଭା କ୍ଷେତ୍ରରେ ପ୍ରାର୍ଥୀମାନଙ୍କ ହାର୍ଜିତ ନେଇ ଏବେ ସବୁଠି ଚର୍ଚ୍ଚା ଚାଲିଛି। ମୁଖ୍ୟତଃ ବ୍ରହ୍ମପୁର ଓ ଗୋପାଳପୁର ନିର୍ବାଚନ ମଣ୍ଡଳୀରେ ଏଥର ବିଜେଡି ଓ ଭାଜପା ମଧ୍ୟରେ କଡ଼ା ଟକ୍କର ହୋଇଥିବା ବେଳେ ଏହା ଉଭୟ ଦଳ ପାଇଁ ସମ୍ମାନର ପ୍ରଶ୍ନ ହୋଇଛି। ଜୁନ୍ ୪ ତାରିଖରେ ଭୋଟ ଗଣତିକୁ ଶାସକ ଓ ମୁଖ୍ୟ ବିରୋଧୀ ଦଳ କର୍ମୀ ଓ ସମର୍ଥକ ଅପେକ୍ଷା କରିଛନ୍ତି।
ବ୍ରହ୍ମପୁର ବିଧାନସଭା କ୍ଷେତ୍ରରେ ବିଧାୟକ ବିକ୍ରମ ପଣ୍ଡାଙ୍କ ପକେଟ ଭୋଟ ଥିବା ସତ୍ତ୍ୱେ ବିଜେଡି ପକ୍ଷରୁ ତାଙ୍କୁ ଗୋପାଳପୁର ପ୍ରାର୍ଥୀ କରାଯାଇଥିଲା। ଆସନ କାହିଁକି ପରିବର୍ତ୍ତନ କରାଗଲା ସେ ନେଇ ଆରମ୍ଭରୁ ନାନା ଚର୍ଚ୍ଚା ହୋଇଥିଲା। ସେହିପରି ୮୨ ବର୍ଷିୀୟ ରମେଶ ଚନ୍ଦ୍ର ଚ୍ୟାଉ ପଟ୍ଟନାୟକଙ୍କୁ ପୁଣି ବ୍ରହ୍ମପୁର ଆସନ ଲାଗି ପ୍ରାର୍ଥୀ କରାଗଲା ତାହା ମଧ୍ୟ ଆଲୋଚନା ଓ ପର୍ଯ୍ୟାଲୋଚନା ପରିସରକୁ ଆସିଥିଲା। କଂଗ୍ରେସର ଅନ୍ତଃକନ୍ଦଳ ଯୋଗୁ ୧୯୯୫ ନିର୍ବାଚନରେ ଜନତା ଦଳରୁ ଏବଂ ୨୦୦୦ରୁ ୨୦୧୪ ନିର୍ବାଚନ ପର୍ଯ୍ୟନ୍ତ ବିଜେଡିରୁ ସହଜରେ ନିର୍ବାଚିତ ହୋଇଥିଲେ ଚ୍ୟାଉ ପଟ୍ଟନାୟକ। ଏଥର ସେ ସଙ୍କଟରେ ପଡ଼ିଛନ୍ତି। ଭାଜପାର ନୂଆ ପ୍ରାର୍ଥୀ କେ. ଅନୀଲ କୁମାର ତାଙ୍କ ସହିତ ପ୍ରତିଦ୍ୱନ୍ଦିତା କରିଛନ୍ତି। ତେଲୁଗୁ ଭାଷାଭାଷି ବହୁଳ ଏହି ଆସନରେ ପ୍ରଥମ କରି ଜାତୀୟ ଦଳ ଭାଜପା ଅନିଲଙ୍କୁ ପ୍ରାର୍ଥୀ କରିଛି। ତେଲୁଗୁ ଭୋଟରଙ୍କ ସମର୍ଥନରେ ସେ ଜିତିବେ ବୋଲି ଆଶା ରଖିଛନ୍ତି। ପ୍ରଧାନମନ୍ତ୍ରୀ ପ୍ରଚାର କରିଥିବାରୁ ମତଦାନ ପରେ ନିଶ୍ଚିତ ହୋଇଯାଇଛନ୍ତି। ଅନ୍ୟପକ୍ଷରେ ସହରରେ ନବୀନ ହାୱା ଥିବାରୁ ଜିତିବା ଆଶା ରଖିଛନ୍ତି ଚ୍ୟାଉବାବୁ। ତେବେ ଅନେକ ଜଣାଶୁଣା ବିଜେଡି ନେତା ଓ କର୍ମୀ ତାଙ୍କୁ ବିରୋଧ କରି ଦଳରୁ ଇସ୍ତଫା ଦେଇ ଭାଜପାରେ ମିଶିଥିଲେ। ତେଣୁ ଏହି ଆସନରେ ଜିତ୍ ହାର ନେଇ ଦ୍ୱନ୍ଦ୍ୱ ସୃଷ୍ଟି ହୋଇଛି।
ଡୁରାରୁ ନାମ ପରିବର୍ତ୍ତନ ହୋଇଥିବା ଗୋପାଳପୁର ନିର୍ବାଚନ ମଣ୍ଡଳୀରେ ପ୍ରଥମେ ୨୦୦୦ ଏବଂ ପରେ ୨୦୦୯ରୁ ୨୦୧୯ ମଧ୍ୟରେ ହୋଇଥିବା ନିର୍ବାଚନରେ ବିଜେଡି ପ୍ରାର୍ଥୀ ନିର୍ବାଚିତ ହୋଇଥିଲେ। ସେଠାରେ ବିଜେଡିର ବିକ୍ରମଙ୍କ ସହିତ ସେହି ଆସନରୁ ଲଗାତର ୩ ଥର ପରାସ୍ତ ହୋଇଥିବା ଭାଜପାର ବିଭୂତି ଜେନାଙ୍କ ମଧ୍ୟରେ ପ୍ରତିଦ୍ୱନ୍ଦିତା ହୋଇଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ଭାଜପା ଅଧ୍ୟକ୍ଷ ଜେ. ପି. ନଡ୍ଡା ପ୍ରଚାର କରିଥିବାରୁ ଏଥର ଜିତିବା ଆଶାରେ ଅଛନ୍ତି ବିଭୂତି।
