ନୂଆଦିଲ୍ଲୀ,୮।୧୨: ଓଡ଼ିଶାର ବାଲେଶ୍ୱରସ୍ଥିତ ଚାନ୍ଦିପୁର କ୍ଷେପଣାସ୍ତ୍ର ପରୀକ୍ଷଣ ଘାଟିରୁ ବୁଧବାର ସଫଳତାର ସହ ବ୍ରାହ୍ମୋସ୍ ସୁପରସୋନିକ୍ କ୍ରୁଜ ମିଶାଇଲର ପରୀକ୍ଷା କରାଯାଇଛି। ଏହାକୁ ସୁପରସୋନିକ ଫାଇଟର ଜେଟ ସୁଖୋଇ ୩୦ ଏମ୍କେ-ଆଇ ଏୟାରକ୍ରାଫ୍ଟରୁ ପରୀକ୍ଷା କରାଯାଇଥିଲା। ବିଶ୍ୱରେ ପ୍ରଥମ ଥର ପାଇଁ ସୁପରସୋନିକ ଏୟାରକ୍ରାଫରୁ ବ୍ରାହ୍ମୋସ ଭଳି ଓଜନିଆ ମିଶାଇଲ ପରୀକ୍ଷା କରାଯାଇଛି।
ଚାନ୍ଦିପୁରର ଇଣ୍ଟେଗ୍ରେଟେଡ୍ ଟେଷ୍ଟ ରେଞ୍ଜରେ ସକାଳ ୧୦ଟା ୩୦ରେ ବ୍ରାହ୍ମୋସ କ୍ଷେପଣାସ୍ତ୍ରର ପରୀକ୍ଷା କରାଯାଇଥିଲା। ପରୀକ୍ଷା ବେଳେ କ୍ଷେପଣାସ୍ତ୍ରର ଷ୍ଟ୍ରକଚରାଲ ଇଣ୍ଟେଗ୍ରିଟି ଓ ପରଫରମାନ୍ସ ଯାଞ୍ଚ କରାଯାଇଥିଲା ବୋଲି ଅଧିକାରୀମାନେ କହିଛନ୍ତି।
ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ପ୍ରତିରକ୍ଷା ଗବେଷଣା ଓ ବିକାଶ ସଂଗଠନ (ଡିଆରଡିଓ) ଏବଂ ଭାରତୀୟ ବାୟୁ ସେନା ସହ ଏହି ସଫଳ ପରୀକ୍ଷା ସହ ଜଡ଼ିତ ଇଣ୍ଡଷ୍ଟ୍ରିର ପ୍ରଶଂସା କରିଛନ୍ତି। ବ୍ରାହ୍ମୋସ ମିଶାଇଲକୁ ଭାରତ (ଡିଆରଡିଓ) ଓ ରୁଷିଆ (ଏମ୍ପିଓଏମ୍)ର ମିଳିତ ଉଦ୍ୟମରେ ବିକଶିତ କରାଯାଇଛି।