ଝାରସୁଗୁଡା ଅଫିସ,୫ା୭- କରୋନା ମୁକାବିଲା ପାଇଁ ଝାରସୁଗୁଡା ଜିଲାରେ କରାଯାଇଥିବା ଶଟ୍ଡାଉନ୍ର ପ୍ରଥମ ଦିନ ଶନିବାରରେ ବ୍ରଜରାଜନଗର ଥାନାର ଏକ ପାଟ୍ରୋଲିଂ ଗାଡିର ଡ୍ରାଇଭରଙ୍କ କାର୍ଯ୍ୟକଳାପ ପାଇଁ ଜିଲା ପୋଲିସକୁ ବିଭିନ୍ନ ମହଲରୁ ସମାଲୋଚିତ ହେବାକୁ ପଡିଛି। ତେବେ ପୋଲିସ ନିଜ ଉପରୁ ଦୋଷ ଛଡାଇ ଏହି ଡ୍ରାଇଭର ଯୋଶୀ ତାଣ୍ଡିଙ୍କ ବିରୋଧରେ ମାମଲା ରୁଜୁ କରି ତାଙ୍କୁ କାର୍ଯ୍ୟରୁ ବାହାର କରିବା ପାଇଁ ପଦକ୍ଷେପ ନେଇଛି। ଯାହା ଖୋଦ ଜିଲା ଏସପି ରାହୁଲ ପିଆର ରବିବାର ଟୁଇଟ୍ ଯୋଗେ ସୂଚନା ଦେଇଛନ୍ତି। ହେଲେ ଏହି ଡ୍ରାଇଭରଙ୍କୁ ସୁପ୍ରିମ ପାୱାର ଦେଇଥିବା ଅଧିକାରୀଙ୍କ ବିରୁର୍ଦ୍ଧରେ କିନ୍ତୁ କିଛି କାର୍ଯ୍ୟାନୁଷ୍ଠାନ ନିଆଯାଇନାହିଁ।
ସୂଚନାମୁତାବକ ବ୍ରଜରାଜନଗର ଥାନାକୁ ଏମ୍ସିଏଲ ପକ୍ଷରୁ ଏକ ଗାଡିକୁ ସ୍ଥାନୀୟ ଅଞ୍ଚଳରେ ପାଟ୍ରୋଲିଂ ପାଇଁ ପ୍ରଦାନ କରାଯାଇଛି। ଏହି ଗାଡିର ଡ୍ରାଇଭର ଭାବେ ଯୋଶୀ ତାଣ୍ଡିଙ୍କୁ ମଧ୍ୟ ଏମ୍ସିଏଲ୍ ନିଯୁକ୍ତ କରିଥିଲା। ତେବେ ଏହି ଡ୍ରାଇଭର ନିଜକୁ ପୋଲିସ ଭାବି ଲୋକଙ୍କୁ ଧମକ ଚମକ କରି ନିଜ କାର୍ଯ୍ୟ ହାସିଲ କରୁଥିବା ସହିତ ଜଣେ ଅଧିକାରୀଙ୍କ କଲେକ୍ସନ ଏଜେଣ୍ଟ ସାଜିଥିବା ବହୁବାର ଜିଲା ପୋଲିସ ନିକଟରେ ଅଭିଯୋଗ ହୋଇଛି। ହେଲେ ପ୍ରମାଣ ଅଭାବରୁ ପୋଲିସ କିଛି କାର୍ଯ୍ୟାନୁଷ୍ଠାନ ନ ନେଇ ଚୁପ ହୋଇ ବସିରହିଥିଲା। ତେବେ ଶଟ୍ଡାଉନର ପ୍ରଥମ ଦିନ ଶନିବାରରେ ଡ୍ରାଇଭର ତାଣ୍ଡି ଥାନା ଅଧିକାରୀ ନଳିତା ମୋଦିଙ୍କୁ ନେଇ ପାଟ୍ରୋଲିଂ କରୁଥିଲେ। ଏହି ସମୟରେ ସେ ବିନା ମାସ୍କରେ ପୋଲିସର ଲାଠି ଧରି ଘୁରିବୁଲିବା ସହ ଲୋକଙ୍କୁ ଦୁର୍ବବ୍ୟହାର କରୁଥିବା ଅଭିଯୋଗ ହୋଇଥିଲା। ସେହିପରି ବ୍ରଜରାଜନଗର ରେଳ ଷ୍ଟେଶନ ନିକଟରେ ଜଣେ ଯୁବକ ବାହାରକୁ ଆସିଥିବା ବେଳେ ତାଙ୍କୁ ରାସ୍ତା ଉପରେ ଉଠବସ କରାଇବା ସହ ମାଡ ମାରିବାକୁ ଉଦ୍ୟମ କରିଥିଲେ। ସେଠାରେ ଥାନା ଅଧିକାରିଣୀ ନଳିତା ମୋଦୀ ଓ ଜଣେ ପୋଲିସ କର୍ମଚାରୀ ଉପସ୍ଥିତ ଥିଲେ ସୁଦ୍ଧା ତାଙ୍କୁ କିଛି କହି ନ ଥିଲେ। ଏହି ଘଟଣାର ଭିଡିଓ ଭାଇରାଲ ହୋଇଥିଲା। ପରେ ଏସ୍ପି ରାହୁଲ ପିଆର୍ ଘଟଣାକୁ ଗୁରୁତର ସହିତ ନେଇ ଡ୍ରାଇଭର ତାଣ୍ଡିଙ୍କୁ କାର୍ଯ୍ୟରୁ ବାହାର କରିବା ପାଇଁ ଏମ୍ସିଏଲ୍କୁ ଚିଠି ଲେଖିବା ସହିତ ଘଟଣାର ତଦନ୍ତ ନିର୍ଦ୍ଦେଶ ଦେଇଛନ୍ତି। ବ୍ରଜରାଜନଗର ଥାନାରେ ଯୋଶୀଙ୍କ ବିରୋଧରେ ଏକ ମାମଲା (ନଂ.୨୫୪/୨୦୨୦) ରୁଜୁ କରାଯାଇଛି।
