ଦୋହା,୬ା୧୨: ଫିଫା ବିଶ୍ୱକପର ରାଉଣ୍ଡ ଅଫ୍ ୧୬ ମୁକାବିଲାରେ ସୋମବାର ବୃହତ ବିଜୟ ହାସଲ କରିଛି ବ୍ରାଜିଲ। ଦଳ ୪-୧ରେ ଦକ୍ଷିଣ କୋରିଆକୁ ପରାସ୍ତ କରିବା ସହିତ କ୍ୱାର୍ଟର ଫାଇନାଲରେ ସ୍ଥାନ ସୁରକ୍ଷିତ କରିଛି। ବ୍ରାଜିଲ ପକ୍ଷରୁ ଭିନିସିଅସ୍ ଜୁନିୟର(୭), ନେମାର(୧୩), ରିଚାର୍ଲିସନ(୨୯) ଓ ଲୁକାସ୍ ପାକ୍ୱେଟା ଗୋଟିଏ ଲେଖାଏ ଗୋଲ ସ୍କୋର କରିଥିଲେ। ପ୍ରଥମାର୍ଦ୍ଧରେ ୪ ଗୋଲ ସ୍କୋର କରି ବ୍ରାଜିଲ ବିଜୟର ଦୃଢ ଦାବିଦାରୀ ସ୍ଥାପନ କରିଥିଲା। ଅନ୍ୟ ପକ୍ଷରେ ଦକ୍ଷିଣ କୋରିଆ ପକ୍ଷରୁ ପେକ୍ ସେଉଙ୍ଗ ହୋ ୭୬ ତମ ମିନିଟରେ ଏକମାତ୍ର ଗୋଲ ସ୍କୋର କରିଥିଲେ। ଗୋଇଠି ଆଘାତ କାରଣରୁ ଦୁଇଟି ମ୍ୟାଚ ଖେଳିନଥିବା ନେମାର ଏହି ମ୍ୟାଚରେ ପ୍ରତ୍ୟାବର୍ତ୍ତନ କରିବା ସହିତ ଗୋଲ ସ୍କୋର କରିଥିଲେ। ୧୩ ତମ ମିନିଟରେ ମିଳିଥିବା ପେନାଲ୍ଟିକୁ ସେ ଗୋଲରେ ପରିଣ୍ କରିଥିଲେ। ବିଶ୍ୱକପରେ ଏହା ତାଙ୍କର ସପ୍ତମ ଗୋଲ ଅଟେ। ଆସନ୍ତା ୯ ତାରିଖରେ କ୍ୱାର୍ଟର ମୁକାବିଲାରେ କ୍ରୋଏସିଆକୁ ଭେଟିବ ବ୍ରାଜିଲ। ଏହା ସହିତ ଚଳିତ ବିଶ୍ୱକପରୁ ଏସିଆନ ଚ୍ୟାଲେଞ୍ଜ ଶେଷ ହୋଇଛି। ଦୁଇ ଏସୀୟ ରାଷ୍ଟ୍ର ଜାପାନ ଓ ଦକ୍ଷିଣ କୋରିଆ ରାଉଣ୍ଡ ଅଫ୍ ୧୬ରେ ପ୍ରବେଶ କରିଥିଲେ ହେଁ ପରାଜୟ ସହିତ ବିଦାୟ ନେଇଛନ୍ତି।
