ନୂଆଗାଁ,୧୦।୯(ଧନେଶ୍ୱର ସାହୁ)ନୟାଗଡ଼ ଜିଲା ନୂଆଗାଁ ବ୍ଲକର ଅସମ୍ପୂର୍ଣ୍ଣ ମିଶନ ଶକ୍ତି ଗୃହକୁ ମିଶନ ଶକ୍ତି ବିଭାଗକୁ ହସ୍ତାନ୍ତର କରାଯାଇଛି ା ସେଥିମଧ୍ୟରୁ କୌଣସି ଗୃହ ବ୍ୟବହାର ହେଉନାହିଁ । ଫଳରେ ମହିଳାମାନେ କେଉଁଠି ପଞ୍ଚାୟତ ଘରେ ତ ଆଉ କେଉଁଠି କାହା ବାରଣ୍ଡାରେ ବସି ସଭା ସମିତି କରୁଛନ୍ତି। ସିଙ୍ଗାରପଲି ପଞ୍ଚାୟତ ମିଶନ ଶକ୍ତି ଗୃହଟି ସମ୍ପୂର୍ଣ୍ଣ ହୋଇ ନ ଥିଲେ ମଧ୍ୟ ତାହାକୁ ଉଦ୍ଘାଟନ କରାଯାଇଛି । ହେଲେ ତାହା କାମରେ ଲାଗୁ ନ ଥିବା ଅଭିଯୋଗ ହେଉଛି ।
ମହିଳାମାନେ ଏକତ୍ର ହେବା ପାଇଁ ପ୍ରତି ପଞ୍ଚାୟତରେ ମିଶନ ଶକ୍ତି ଗୃହ ନିର୍ମାଣ ଲାଗି ୫ ଲକ୍ଷ ଟଙ୍କା ଅନୁଦାନ ପ୍ରଦାନ କରାଯାଇଛି। ନୂଆଗାଁ ବ୍ଲକର ୨୨ ପଞ୍ଚାୟତ ମଧ୍ୟରୁ ଅଦ୍ୟାବଧି ୧୭ ମିଶନ ଶକ୍ତି ଗୃହ ସମ୍ପୃକ୍ତ ବିଭାଗକୁ ବ୍ଲକ ପ୍ରଶାସନ ହସ୍ତାନ୍ତର କରିଛି । କାପ୍ତାପଲି ପଞ୍ଚାୟତର ମିଶନ ଶକ୍ତି ଗୃହକୁ ଛାଡି ଦେଲେ ଅନ୍ୟ ସମସ୍ତ ଗୃହ ଅସମ୍ପୂର୍ଣ୍ଣ ହୋଇ ରହିଛି ା ଏଥିପାଇଁ କୌଣସି ଗୃହ କାମରେ ଲାଗି ପାରୁନି । ଅଧିକାଂଶ ଗୃହରେ ବିଦ୍ୟୁତ୍ ସଂଯୋଗ , ପାନୀୟ ଜଳର ଅଭାବ ସହ ଶୌଚାଳୟ କାର୍ଯ୍ୟ ସମ୍ପୂର୍ଣ୍ଣ ହୋଇ ନାହିଁ । ସିଙ୍ଗାରପଲି ମିଶନ ଶକ୍ତି ଗୃହର ନିର୍ମାଣ କାର୍ଯ୍ୟ ନ୍ୟୁନମାନର ହୋଇଥିବାରୁ ଘର କାନ୍ଥରେ ଫାଟ ସୃଷ୍ଟି ହେବା ସହ ପ୍ଳାଷ୍ଟର ଛାଡ଼ି ଗଲାଣି। ଶୌଚାଳୟରେ ଆନୁସଙ୍ଗିକ ସାମଗ୍ରୀ ଲାଗି ନାହିଁ ା ଏପରି କି ବିଦ୍ୟୁତ୍ ସଂଯୋଗ ହୋଇ ନ ଥିବା ବେଳେ ପାଣିର ବ୍ୟବସ୍ଥା କରାଯାଇ ନାହିଁ। ଏତେସବୁ ସମସ୍ୟା ମଧ୍ୟରେ ଦଶପଲ୍ଲା ବିଧାୟକ ରମେଶ ଚନ୍ଦ୍ର ବେହେରା ଓ ଅନ୍ୟ ଅତିଥିମାନଙ୍କ ଦ୍ୱାରା ୨୦୨୧ ଡିସେମ୍ବର ୨୦ରେ ସେହି ଅସମ୍ପୂର୍ଣ୍ଣ ଗୃହର ଉଦ୍ଘାଟନ କରାଯାଇଥିଲା । ହେଲେ ଅଦ୍ୟାବଧି ତାହା ସମ୍ପୂର୍ଣ୍ଣ ହୋଇ ପାରିଲା ନାହିଁ କିମ୍ବା କାମରେ ଲାଗି ପାରି ନାହିଁ । ଏ ବାବଦରେ ନୂଆଗାଁ ବ୍ଲକ ମିଶନ ଶକ୍ତି ସଂଯୋଜକ ଦିଲୀପ କୁମାର ନାୟକଙ୍କୁ ପଚାରିବାରେ ହସ୍ତାନ୍ତର ହୋଇଥିବା ଗୃହରେ ଅନେକ ସମସ୍ୟା ରହିଥିବାରୁ ସେଗୁଡିକ ବ୍ୟବହାର କରିବା ସମ୍ଭବ ହେଉ ନ ଥିବା କହିଛନ୍ତି ା ନୂଆଗାଁ ସହକାରୀ ଯନ୍ତ୍ରୀ ରାଜେନ୍ଦ୍ର କୁମାର ପଣ୍ଡାଙ୍କୁ ପଚାରିବାରେ ମୁଁ ମିଶନ ଶକ୍ତି ଦାୟିତ୍ୱରେ ଥିବା ଅଧିକାରୀଙ୍କ ସହ ଏ ସଂକ୍ରାନ୍ତରେ ଆଲୋଚନା କରିବି। ଯାହା ସମସ୍ୟା ଅଛି ସେଥିରେ ସୁଧାର ଆଣିବାକୁ ଚେଷ୍ଟା କରିବି ବୋଲି କହିଛନ୍ତି ା