ଦୁବାଇ,୨୮।୧: ଜିମ୍ବାୱେର ପୂର୍ବତନ ଅଧିନାୟକ ତଥା ଷ୍ଟାର ବ୍ୟାଟର ବ୍ରେଣ୍ଡନ ଟେଲର୍ଙ୍କ ଉପରେ ବଡ଼ କାର୍ଯ୍ୟାନୁଷ୍ଠାନ ନେଇଛି ଅନ୍ତର୍ଜାତୀୟ କ୍ରିକେଟ ପରିଷଦ(ଆଇସିସି)। ଶୁକ୍ରବାର ସ୍ପଟ ଫିକ୍ସିଂ ମାମଲାରେ ଦୃଢ଼ କାର୍ଯ୍ୟାନୁଷ୍ଠାନ ନେଇ ଆଇସିସି ତାଙ୍କୁ ସାଢ଼େ ୩ ବର୍ଷ ପାଇଁ ବ୍ୟାନ୍ କରିଛି। ଅର୍ଥାତ ଟେଲର ଆସନ୍ତା ସାଢ଼େ ୩ ବର୍ଷ ପାଇଁ କୌଣସି କ୍ରିକେଟ ଟୁର୍ନାମେଣ୍ଟାରେ ଭାଗ ନେଇପାରିବେ ନାହିଁ।
କିଛି ଦିନ ପୂର୍ବରୁ ଟେଲର ନିଜର ସୋସିଆଲ ମିଡିଆ ଆକାଉଣ୍ଟରେ ଗୋଟିଏ ବିବୃତି ଜାରି କରି ସ୍ପଟ ଫିକ୍ସିଂ କଥା ଉଠାଇଥିଲେ। ତାଙ୍କୁ ଭାରତର ଜଣେ ବ୍ୟବସାୟୀ ସ୍ପଟ୍ ଫିକ୍ସିଂ ପାଇଁ ଫସାଇଥିଲେ। ସେ ତାଙ୍କ ଜାଲରେ ଫସି ଏକ ପାର୍ଟିଂକୁ ଯାଇଥିଲେ। ସେଠାରେ ତାଙ୍କୁ କୋକେନ୍ ଦିଆଯାଇ ବ୍ଲାକମେଲିଂ କରାଯାଇଥିଲା। ହେଲେ ସେ ସ୍ବାର୍ଥ ପାଇଁ ନୁହେଁ ବରଂ ନିଜର ସୁରକ୍ଷା ପାଇଁ ଟଙ୍କା ଆଣିଥିଲେ ବୋଲି କହିଥିଲେ। ଏହାଛଡ଼ା ଘଟଣା ପରେ ସେ ଏକଥା ତୁରନ୍ତ ଆଇସିସିକୁ ଅବଗତ କରାଇ ନ ଥିଲେ ବୋଲି ଲମ୍ବା ପୋଷ୍ଟ ଲେଖିଥିଲେ।
ଏହି ବିବୃତି ପରେ ଆଇସିସି ଟେଲରଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିଛି। ବୁକିମାନେ ତାଙ୍କୁ ପ୍ରଭାବିତ କରିବାକୁ ଚେଷ୍ଟା କରିଥିଲେ ହେଁ ନିୟମ ଅନୁଯାୟୀ ସେ ଏକଥା ତୁରନ୍ତ ଆଇସିସିକୁ ଜଣାଇ ନ ଥିଲେ। ଆଇସିସି ଦୁର୍ନୀତି ନିରୋଧ କୋଡର ସେ ୪ଟି ଚାର୍ଜକୁ ଭାଙ୍ଗିଛନ୍ତି। ସେ ନିଜର ଭୁଲକୁ ମଧ୍ୟ ସ୍ବୀକାର କରିନେଇଛନ୍ତି। ଏହାବାଦ ଆଣ୍ଟି ଡୋପିଂ କୋଡର ଗୋଟିଏ ଚାର୍ଜକୁ ମଧ୍ୟ ସେ ଉଲ୍ଲଙ୍ଘନ କରିଛନ୍ତି ବୋଲି ସ୍ପଷ୍ଟ କରାଯାଇଛି।