କେନ୍ଦୁଝର, ୨୯।୯(ନରେଶ ଚନ୍ଦ୍ର ପଟ୍ଟନାୟକ): କେନ୍ଦୁଝର ସ୍ବତନ୍ତ୍ର ଭିଜିଲାନ୍ସ କୋର୍ଟ ଏକ ଲାଞ୍ଚ ମାମଲାର ରାୟ ପ୍ରକାଶ କରିଛନ୍ତି। ଲାଞ୍ଚ ନେବାବେଳେ ଧରାପଡ଼ିଥିବା ପୋଲିସ ଅଧିକାରୀ କାଳୁଚରଣ ସ୍ବାଇଁଙ୍କୁ କୋର୍ଟ ୪ ବର୍ଷ ସଶ୍ରମ କାରାଦଣ୍ଡରେ ଦଣ୍ଡିତ କରିଛନ୍ତି। ଏପରି କି ୩ ହଜାର ଟଙ୍କା ଜରିମାନା ଆଦେଶ ଦେଇଛନ୍ତି। ଜରିମାନା ଅନାଦାୟ ଅଧିକ ୨ ମାସ ଜେଲ ଦଣ୍ଡାଦେଶ ଦେଇଛନ୍ତି।
ପ୍ରକାଶ ଯେ, ୨୦୧୦ରେ ମନୋରଞ୍ଜନ ନାଏକ ଏବଂ ସରସ୍ବତୀ ନାଏକ ବିବାହ କରିଥିଲେ। ବିବାହର ୪ ବର୍ଷ ପରେ ଉଭୟଙ୍କ ମଧ୍ୟରେ ମନୋମାଳିନ୍ୟ ହୋଇଥିଲା। ସ୍ତ୍ରୀଙ୍କ ଅଭିଯୋଗ କ୍ରମେ ମନୋରଞ୍ଜନଙ୍କ ନାମରେ ବାରିଆ ଥାନାରେ ନାରୀ ନିର୍ଯାତନା ମାମଲା ରୁଜୁ ହୋଇଥିଲା। ହେଲେ ୨୦୧୪ ଅକ୍ଟୋବର ୧୦ରେ ମନୋରଞ୍ଜନଙ୍କୁ ଥାନାକୁ ଡାକି ତାଙ୍କ ବାପା ଏବଂ ମା’ଙ୍କ ନାମ କାଟିଦେବି ବୋଲି କହିବା ସହ ମାମଲା କୋହଳ କରିବାକୁ ୧୫ ହଜାର ଟଙ୍କା ଲାଞ୍ଚ ମାଗିଥିଲେ। ଏହାର ଗୋଟିଏ ଦିନ ପରେ ମନୋରଞ୍ଜନଙ୍କୁ କୋର୍ଟ ଚାଲାଣ କରିବା ପରେ କେସ୍ ଡାଏରୀ ଦେବା ପାଇଁ ୫ ହଜାର ଟଙ୍କା ଲାଞ୍ଚ ନେଇଥିଲେ। ସେ ଜାମିନ ପାଇଁ ଜେଲରୁ ଆସିବା ପରେ କେସ୍ କୋହଳ କରିବା ପାଇଁ ୬ ହଜାର ଟଙ୍କା ଲାଞ୍ଚ ମାଗିଥିଲେ। ଏ ନେଇ ସେ ଭିଜିଲାନ୍ସର ଦ୍ୱାରସ୍ଥ ହୋଇଥିଲେ। ବାଲେଶ୍ୱର ଭିଜିଲାନ୍ସ ୟୁନିଟ୍ ପକ୍ଷରୁ ଏ ନେଇ ଏକ ମାମଲା ନମ୍ବର (୪୭/୨୦୧୪) ରୁଜୁ ହୋଇଥିଲା।
ଅନ୍ୟପକ୍ଷେ ୨୦୧୪ ଜାନୁୟାରୀ ୧ ତାରିଖରେ ମନୋରଞ୍ଜନଙ୍କ ଠାରୁ ବାରିଆ ଥାନା ତତ୍କାଳୀନ ଅଧିକାରୀ କାଳୁଚରଣ ସ୍ବାଇଁ ୬ ହଜାର ଟଙ୍କା ଲାଞ୍ଚ ନେବା ବେଳେ ଥାନା ଭିତରେ ଭିଜିଲାନ୍ସ ହାତରେ ଧରାପଡି ଜେଲ ଯାଇଥିଲେ। ଏହି ମାମଲରେ ୧୫ଜଣ ସାକ୍ଷୀ ଏବଂ ତଦନ୍ତ ରିପୋର୍ଟଙ୍କୁ ଭିତ୍ତି କରି କେନ୍ଦୁଝର ସ୍ବତନ୍ତ୍ର ଭିଜିଲାନ୍ସ ବିଚାରପତି ରଶ୍ମିତା ଦଳେଇ ଶୁକ୍ରବାର ପୋଲିସ ଅଧିକାରୀ କାଳୁଚରଣ ସ୍ବାଇଁଙ୍କୁ ୪ ବର୍ଷ ଜେଲଦଣ୍ଡ ଏବଂ ୩ ହଜାର ଟଙ୍କା ଜରିମାନା ଆଦେଶ କରିଛନ୍ତି। ଜରିମାନା ଅନାଦେୟ ଅତିରିକ୍ତ ୨ ମାସ ଜେଲ ଦଣ୍ଡ ଶୁଣାଇଛନ୍ତି।
ସରକାରଙ୍କ ପକ୍ଷରୁ ସ୍ବତନ୍ତ୍ର ପିପି ଦେବଦତ୍ତ ବିଶ୍ୱାଳ ମାମଲା ପରିଚାଳନା କରୁଥିଲେ। ଦଣ୍ଡ ହୋଇଥିବା କାଳୁଚରଣ ସ୍ବାଇଁ ଗତ ୩୧।୦୩ ୨୦୧୭ରେ ନନ୍ଦିପଦା ଥାନାରେ ସବ୍ ଇନ୍ସପେକ୍ଟର ଭାବେ ଅବସର ନେଇଥିବା ବେଳେ ତାଙ୍କ ଘର ଗଞ୍ଜାମ ଜିଲା ଭଞ୍ଜନଗର ଥାନା ବାଲିପଦର ଗ୍ରାମ ବୋଲି ଜଣାପଡିଛି।
