ବରଗଡ଼ ଅଫିସ୍/ବିଜେପୁର,୯।୫: ବରଗଡ଼ ଜିଲା ବିଜେପୁର ଥାନା ଅଧୀନ ଜାରିଂ ଗ୍ରାମରେ ଏକ ଅଭାବନୀୟ ଘଟଣା ଘଟିଛି। ଅଧିକ ଯୌତୁକ ଦାବି କରି ଶାଶୁଘର ଲୋକେ ଜଣେ ବିବାହିତା ମହିଳାଙ୍କୁ ନିଆଁରେ ପୋଡ଼ି ମାରି ଦେଇଥିବା କନ୍ୟାପକ୍ଷ ଅଭିଯୋଗ କରିଛନ୍ତି । ମୃତା ମହିଳା ହେଲେ ଉକ୍ତ ଗ୍ରାମର ରାଜେନ୍ଦ୍ର ବାରିକଙ୍କ ସ୍ତ୍ରୀ ପୁଷ୍ପାଞ୍ଜଳି। ମୃତ ପୁଷ୍ପାଞ୍ଜଳିଙ୍କ ବାପା ଭୀଷ୍ମଦେବ ବାରିକଙ୍କ ଏତଲାକ୍ରମେ ବିଜେପୁର ଥାନା ପୋଲିସ ଏକ ମାମଲା (ନଂ.୮୦/୨୧) ରୁଜୁ କରିଛି। ମୃତ ପୁଷ୍ପାଞ୍ଜଳିଙ୍କ ସ୍ବାମୀ ରାଜେନ୍ଦ୍ର ମଧ୍ୟ ଗୁରୁତର ଅବସ୍ଥାରେ ଭିମସାର୍, ବୁର୍ଲାରେ ଚିକିତ୍ସାଧୀନ ଅଛନ୍ତି ।
୭ ବର୍ଷ ତଳେ ରାଜେନ୍ଦ୍ର ବଲାଙ୍ଗୀର ଜିଲା ଲୋଇସିଂହା ଥାନା ଅଧୀନ ମହଖଣ୍ଡ ଗ୍ରାମର ଭୀଷ୍ମଦେବ ବାରିକଙ୍କ ଝିଅ ପୁଷ୍ପାଞ୍ଜଳିଙ୍କୁ ବିବାହ କରିଥିଲେ। ବିବାହ ସମୟରେ କନ୍ୟାପକ୍ଷ ଝିଅ, ଜ୍ୱାଇଁଙ୍କୁ ଉପହାର ଦେଇଥିଲେ । ବିବାହ ପରେ ଶାଶୁଘର ଲୋକେ ଲକ୍ଷେ ଟଙ୍କା ସହିତ ଅଧିକ ସୁନା ଗହଣା, ଗାଡ଼ି ଆଦି ଦାବି କରି ପୁଷ୍ପାଞ୍ଜଳିଙ୍କୁ ଶାରୀରିକ, ମାନସିକ ନିର୍ଯାତନା ଦେଇ ଆସୁଥିବା ଅଭିଯୋଗ ହୋଇଛି। ଶନିବାର ଶାଶୁଘରେ ଥିବାବେଳେ ପୁଷ୍ପାଞ୍ଜଳି ନିଆଁରେ ପୋଡି ହୋଇ ଗୁରୁତର ହୋଇଥିଲେ। ପରେ ତାଙ୍କୁ ବୁର୍ଲା ନିଆଯାଇଥିଲା। ସେଠାରୁ ରାଉରକେଲା ଆଇଜିଏଚ୍କୁ ସ୍ଥାନାନ୍ତର କରାଯାଇଥିଲା। ଚିକିତ୍ସାଧୀନ ଅବସ୍ଥାରେ ରବିବାର ଭୋରରେ ପୁଷ୍ପାଞ୍ଜଳିଙ୍କ ମୃତ୍ୟୁ ଘଟିଥିଲା। ପୁଷ୍ପାଞ୍ଜଳି କିରୋସିନ ଢ଼ାଳି ଆତ୍ମହତ୍ୟା କରିଥିବା ଶାଶୁଘର ଲୋକେ କହୁଥିବା ବେଳେ କନ୍ୟାପକ୍ଷ ଲୋକେ ତାଙ୍କୁ ପୋଡ଼ି ମାରି ଦିଆଯାଇଥିବା ଅଭିଯୋଗ ହୋଇଛି। ରବିବାର ରାଉରକେଲାରୁ ମୃତଦେହ ବ୍ୟବଚ୍ଛେଦ ହୋଇ ଜାରିଂ ନିଆଯାଇ ଦାହ କରାଯାଇଥିଲା।