ସେନାରେ କେବଳ ମଣିଷ ନୁହନ୍ତି ପ୍ରାଣୀମାନେ ବି ସାମିଲ ହୋଇପାରିବେ। ଏକଥାକୁ ଅନେକେ ବିଶ୍ୱାସ କରିପାରୁ ନ ଥିବେ। କିନ୍ତୁ କିଛି ବର୍ଷ ତଳେ ୨୦୧୬ରେ ଏକ ପ୍ରାଣୀକୁ କେବଳ ଯେ ସେନାର ଅଂଶ କରାଯାଇଥିଲା ତାହା ନୁହେଁ ବରଂ ଏକ ସର୍ବୋଚ୍ଚ ପଦବୀ ଦିଆଯାଇଥିଲା। ତାସହ ତାକୁ ଗାର୍ଡ ଅଫ ଅନର୍ ବି ଦିଆଯାଇଥିଲା। ଏହା ହେଉଛି ସ୍କଟଲାଣ୍ଡର ରାଜଧାନୀ ଏଡିନ୍ବର୍ଗ ଚିଡିଆଖାନାର ଏକ ପେଙ୍ଗୁଇନ୍ର କଥା। ‘ସର୍ ନିଲ୍ସ ଓଲାଭ’ ନାମକ ଏହି ପେଙ୍ଗୁଇନ୍କୁ ବ୍ରିଗେଡିୟର୍ ପଦବୀ ମିଳିଥିଲା। ଆଉ ୫୦ରୁ ଉର୍ଦ୍ଧ୍ୱ ସୈନିକ ତାକୁ ଗାର୍ଡ ଅଫ୍ ଅନର୍ ପ୍ରଦାନ କରିଥିଲେ। ଜଣେ ସେନାଧିକାରୀ ସାଲ୍ୟୁଟ୍ ମଧ୍ୟ କରିଥିଲେ। ଆଉ ନିଲ୍ସକୁ କିଙ୍ଗସ୍ ଅଫ୍ ନରଓ୍ବେ ଗାର୍ଡ ବିଭାଗର ମୁଖ୍ୟ ସଦସ୍ୟ କରାଯାଇଥିଲା। ତେଣୁ ସେ ‘ବ୍ରିଗେଡିୟର୍ ସର୍ ନିଲ୍ସ ଓଲାଭ’ ନାମରେ ପରିଚିତ ହେଲା। ଏହି ସମାରୋହରେ ନିଲ୍ସ ଏକ ପେଙ୍ଗୁଇନ୍ ନୁହେଁ ବରଂ ସେନାର ଜଣେ ଯୋଦ୍ଧା ପରି ଲାଗୁଥିଲା। ଆଉ ସେ ବୀର ଠାଣିରେ ଚାଲୁଥିଲା। କେବଳ ସେତିିକି ନୁହେଁ ସେଠାରେ ଜଣେ ଅଫିସର୍ଙ୍କୁ ନିରୀକ୍ଷଣ ବି କରିଥିଲା। ସମାରୋହର ଆୟୋଜକଙ୍କ କହିବାନୁସାରେ ସ୍କଟଲାଣ୍ଡ ଓ ନର୍ଓ୍ବେ ଦୁଇ ଦେଶ ମଧ୍ୟସ୍ଥ ସମ୍ପର୍କର ଏହା ଏକ ସୁନ୍ଦର ଦୃଶ୍ୟ ଥିଲା।