ନୂଆଦିଲ୍ଲୀ, ୨୯ା୭ ଭାରତୀୟ କୁସ୍ତି ମହାସଂଘ (ଡବ୍ଲ୍ୟୁଏଫ୍ଆଇ) ନିର୍ବାଚନ ପୂର୍ବରୁ ଜୁଲାଇ ୩୦ରେ ବସିବାକୁ ଥିବା ଏକ ବୈଠକରେ ବିଦାୟୀ ସଭାପତି ବ୍ରିଜଭୂଷଣ ଶରଣ ସିଂ ଅଧ୍ୟକ୍ଷତା କରିବେ। ନୂଆ କର୍ମକର୍ତ୍ତାଙ୍କ ଲାଗି ହେବାକୁଥିବା ନିର୍ବାଚନ ପାଇଁ ସେ ତାଙ୍କ ପ୍ରାର୍ଥୀ ମନୋନୟନ କରିବେ। ନିର୍ବାଚନ ପାଇଁ ଉଦ୍ଦିଷ୍ଟ ଇଲେକ୍ଟୋରାଲ କଲେଜରେ ଯଦିଓ ବ୍ରିଜ ଭୂଷଣ ଓ ତାଙ୍କ ପୁତ୍ର କରନଙ୍କ ନାମ ନାହିଁ। କିନ୍ତୁ ନିର୍ବାଚନ ପାଇଁ ବିହାରରୁ ପ୍ରତିନିଧିତ୍ୱ କରୁଥିବା ଭାଜପା ନେତାଙ୍କ ଜାମାତା ବିଶାଲ ସିଂ ମୁଖ୍ୟ ପଦବୀ ପାଇଁ ଲଢିବା ଯଥେଷ୍ଟ ସମ୍ଭାବନା ରହିଛି। ବ୍ରିଜ ଭୂଷଣଙ୍କ ଦ୍ୱାରା ଏକ ବୈଠକ ଡକାଯାଇଥିବା ବିଷୟ ବିଦାୟୀ ଡବ୍ଲ୍ୟୁଏଫ୍ଆଇ ସହକାରୀ ସମ୍ପାଦକ ବିନୋଦ ତୋମାର ସ୍ପଷ୍ଟ କରିଛନ୍ତି। ତେବେ ଏହି ବୈଠକ କେଉଁଠାରେ ହେବ ସେ ସମ୍ପର୍କରେ କୌଣସି ସୂଚନା ଦେଇ ନାହାନ୍ତି। ଯଥାସମ୍ଭବ ବୈଠକରେ ବିଭିନ୍ନ ରାଜ୍ୟ ସଂଗଠନରେ ସଭାପତି ଓ ସମ୍ପାଦକ ପଦବୀରେ ରହିଥିବା ବ୍ରିଜଭୂଷଣଙ୍କ ସମର୍ଥକମାନେ ଯୋଗ ଦେବେ। ଅଗଷ୍ଟ ୧୨ ପାଇଁ ନିର୍ବାଚନ ଲାଗି ପ୍ରାର୍ଥୀପତ୍ର ଦାଖଲ ଶେଷ ତାରିଖ ଜୁଲାଇ ୩୧ ରଖାଯାଇଛି। ଅଗଷ୍ଟ ୨ରେ ପ୍ରାର୍ଥୀପତ୍ର ଯାଞ୍ଚ କରାଯିବ। ଅଗଷ୍ଟ ୭ରେ ଚୂଡ଼ାନ୍ତ ପ୍ରାର୍ଥୀ ତାଲିକା ପ୍ରକାଶ ପାଇବ। ଜାତୀୟ କ୍ରୀଡ଼ା ଆଚରଣବିଧି ଅନୁସାରେ ସେ ସର୍ବାଧିକ ୧୨ ବର୍ଷ ଧରି ଜଣେ କର୍ମକର୍ତ୍ତା ରହି ଆସିଛନ୍ତି।