ଲଣ୍ଡନ/ଟୋକିଓ,୧୨।୧ : ବ୍ରିଟେନ ଏବଂ ଜାପାନର ନେତାମାନେ ଏକ ପ୍ରତିରକ୍ଷା ଚୁକ୍ତି ସ୍ବାକ୍ଷର କରିଛନ୍ତି। ଚୁକ୍ତି ଅନୁସାରେ ଉଭୟ ଦେଶ ପରସ୍ପରର ସୈନ୍ୟମାନଙ୍କୁ ନିଜ ଦେଶରେ ରଖିବାକୁ ଅନୁମତି ଦେବେ। ତାଇୱାନ ଉପରେ ଚାଇନାର ଆକ୍ରମଣାତ୍ମକ ଆଭିମୁଖ୍ୟକୁ ନେଇ ଚିନ୍ତା ମଧ୍ୟରେ ଦୁଇ ଦେଶ ସାମରିକ ସମ୍ପର୍କକୁ ମଜବୁତ କରୁଛନ୍ତି।
ବ୍ରିଟେନ ସରକାର କହିଛନ୍ତି ଯେ ପ୍ରତିରକ୍ଷା ଚୁକ୍ତି ’ଭାରତ-ପ୍ରଶାନ୍ତ ମହାସାଗରୀୟ ଅଞ୍ଚଳ ପ୍ରତି ଆମର ପ୍ରତିବଦ୍ଧତାକୁ ସୁଦୃଢ଼ କରିବ। ବୈଠକରେ ଜାପାନର ପ୍ରଧାନମନ୍ତ୍ରୀ ଫୁମିଓ କିଶିଦା ଏବଂ ବ୍ରିଟେନର ପ୍ରଧାନମନ୍ତ୍ରୀ ଋଷି ସୁନକ ଏଥିରେ ଦସ୍ତଖତ କରିଛନ୍ତି। ଏହି ଚୁକ୍ତି ଅନେକ ବର୍ଷ ଧରି ଚାଲିଆସୁଥିଲା ଏବଂ କିଶିଦା ମେ ମାସରେ ଲଣ୍ଡନ ଗସ୍ତରେ ଆସିଥିବା ବେଳେ ପୂର୍ବତନ ପ୍ରଧାନମନ୍ତ୍ରୀ ବୋରିସ ଜନସନଙ୍କ ସହ କଥା ହୋଇଥିଲେ।
ୟୁରୋପୀୟ ୟୁନିଅନ ସହିତ ଜାପାନର ଏହା ହେଉଛି ପ୍ରଥମ ଚୁକ୍ତି ଯାହା ଉଭୟ ଦେଶକୁ ମିଳିତ ସାମରିକ ଅଭ୍ୟାସ କରିବାକୁ ଅନୁମତି ଦେବ। ବ୍ରିଟେନ ସରକାର କହିଛନ୍ତି ଯେ ଏହି ଚୁକ୍ତି ଉଭୟ ଜି-୭ ଦେଶର ସଶସ୍ତ୍ର ବାହିନୀକୁ ବଡ଼ ଏବଂ ଜଟିଳ ସାମରିକ ଅଭ୍ୟାସ ତଥା ନିୟୋଜନ ଯୋଜନାରେ କାର୍ଯ୍ୟ କରିବାକୁ ଅନୁମତି ଦେବ।
ଦକ୍ଷିଣ ଚାଇନା ସାଗର ଏବଂ ଏହାର ଆଖପାଖ ସମୁଦ୍ରିକ ଅଞ୍ଚଳରେ ଚାଇନା ସୀମା ନିୟମର ଉଲ୍ଲଂଘନ କରୁଛି। ପୂର୍ବ ଚାଇନା ସାଗରରେ ଥିବା ଦ୍ୱୀପପୁଞ୍ଜକୁ ନେଇ ଜାପାନ ସହିତ ଚାଇନାର ପୁରୁଣା ବିବାଦ ରହିଛି। ଏହି କାରଣରୁ ଉଭୟ ଦେଶର ନୌସେନା ମଧ୍ୟ ଅନେକ ଥର ମୁହାଁମୁହିଁ ହୋଇଛନ୍ତି। ସମ୍ପ୍ରତି ଏହି ଦ୍ୱୀପପୁଞ୍ଜ ଜାପାନର ଅଧୀନରେ ଅଛି, କିନ୍ତୁ ଚାଇନା ଏହାକୁ ନିଜର ବୋଲି ଦାବି କରୁଛି।