ଏକଦା କେବଳ ‘ବିସ୍କୁଟ’ରୁ ବ୍ୟବସାୟ ଆରମ୍ଭ କରିଥିଲା ‘ବ୍ରିଟାନିଆ’। ହେଲେ ଏବେ ଏହାର ବ୍ୟବସାୟ ବ୍ରେଡ୍, କେକ୍, ରସ୍କଠାରୁ ଆରମ୍ଭ କରି କ୍ଷୀର ପର୍ଯ୍ୟନ୍ତ ପହଞ୍ଚିଲାଣି। ସାରା ଦେଶରେ ଏହା ୧୫ ମାନୁଫାକ୍ଚରିଂ ୟୁନିଟ୍୍ ଏବଂ ୩୫ କଣ୍ଟ୍ରାକ୍ଟ ଏବଂ ଫ୍ରାଞ୍ଚାଇଜ୍ ୟୁନିଟ୍ ରହିଛି। କମ୍ପାନୀରେ ପ୍ରାୟ ୧ ଲକ୍ଷ କର୍ମଚାରୀ କାମ କରୁଛନ୍ତି।
ବ୍ରିଟାନିଆର ମାଲିକ ହେଉଛନ୍ତି ନୁସଲୀ ଓ୍ବାଡିଆ। ଏହାର ମ୍ୟାର୍କେଟ କ୍ୟାପ୍ ୧.୦୯ ଲକ୍ଷ କୋଟି ଟଙ୍କା। ତେବେ ୧୮୯୨ରେ ବ୍ରିଟିଶ ବ୍ୟବସାୟୀଙ୍କ ଏକ ଗ୍ରୁପ୍ କୋଲକାତାର ଏକ ଛୋଟ ଘରୁ ମାତ୍ର ୨୯୫ ଟଙ୍କା ବ୍ୟୟରେ ଏହି କମ୍ପାନୀ ଆରମ୍ଭ କରିଥିଲେ। ପରେ ଏହାକୁ ଗୁପ୍ତା ବ୍ରଦର୍ସ କିଣି ନେଇଥିଲା ଏବଂ ବିଏସ୍ ବ୍ରଦର୍ସ ନାମରେ ଚଳାଇଥିଲା। ୧୯୧୦ରେ କମ୍ପାନୀ ମେଶିନ ସାହାଯ୍ୟରେ ବିସ୍କୁଟ୍ କରିବା ଆରମ୍ଭ କରିଥିଲା। ୧୯୮୦ରେ ସିଏଚ୍ ହୋମ୍ସ କମ୍ପାନୀ ସହ ଯୋଡ଼ି ହୋଇ ବ୍ରିଟାନିଆ ବିସ୍କିଟ୍ କମ୍ପାନୀ ଲିମିଟେଡ୍(ବିବିସିଓ)କୁ ଲଞ୍ଚ କରିଥିଲେ। ୧୩୧ ବର୍ଷ ପରେ ସେହି କମ୍ପାନୀ ଭାରତର ସବୁଠାରୁ ବଡ଼ ଏଫ୍ଏମ୍ସିଜି କମ୍ପାନୀରେ ପରିଗଣିତ ହେଉଛି। ଏବେ ପ୍ରାୟ ପ୍ରତି ଘରେ କମ୍ପାନୀର ବିସ୍କୁଟ, ଟୋଷ୍ଟ, ବ୍ରେଡ ଅଥବା କେକ୍ରୁ ଆରମ୍ଭ କରି ଅନ୍ୟ କୌଣସି ସାମଗ୍ରୀ ମିଳିଯିବ।