ଶ୍ରୀହରିକୋଟା,୧୬।୧୦ : ଦେଶର ସବୁଠାରୁ ଶକ୍ତିଶାଳୀ ରକେଟ ଲଞ୍ଚ ଭେଇକିଲ ମାର୍କ -୩(ଏଲଭିଏମ୍-୩) ୨୩ ଅକ୍ଟୋବରରେ ବ୍ରିଟିଶ କମ୍ପାନୀର ୩୬ ଟି ଉପଗ୍ରହ ଉତକ୍ଷେପଣ କରିବ । ପ୍ରଥମ ଥର ପାଇଁ ଆନ୍ଧ୍ରପ୍ରଦେଶର ଶ୍ରୀହରିକୋଟା ଠାରୁ ସ୍ବଦେଶୀ ଏଲଭିଏମ୍-୩ ମାଧ୍ୟମରେ ଇସ୍ରୋ ଦ୍ୱାରା ଏହି ବିଦେଶୀ ବାଣିଜି୍ୟକ ଉପଗ୍ରହକୁ ମଧ୍ୟରାତି ୧୨ଟା ୭ ରେ ଉତ୍କ୍ଷେପଣ କରାଯିବ। ଏହି ରକେଟକୁ ପୂର୍ବରୁ ଜିଓସିଙ୍କ୍ରୋନସ ସାଟେଲାଇଟ ଲଞ୍ଚ ଯାନ ମାର୍କ-୩ ଅର୍ଥାତ୍ ଜିଏସଏଲଭି ଏମ୍-୩ କୁହାଯାଉଥିଲା।
ଇସ୍ରୋ କହିଛି ଯେ ରକେଟର କ୍ୟାପସୁଲରେ ଉତକ୍ଷେପଣ ହେବାକୁ ଥିବା ଉପଗ୍ରହଗୁଡ଼ିକୁ ସ୍ଥାନିତ କରି ଏହି ମିଶନ ପାଇଁ ଆସେମ୍ବିଲ ସମାପ୍ତ ହୋଇଛି। ରକେଟର କ୍ରିଓ ଷ୍ଟେଜ ଏବଂ ଉପକରଣ ଏବଂ କାର୍ଗୋର ସମାବେଶ ମଧ୍ୟ ସମାପ୍ତ ହୋଇଛି।
ପିଏସଏଲଭି ରକେଟ ମାଧ୍ୟମରେ ଭାରତ ଜୁନ୍ ୨୦୨୨ ପର୍ଯ୍ୟନ୍ତ ୩୬ ଦେଶ ପାଇଁ ୩୪୬ ଉପଗ୍ରହ ଉତକ୍ଷେପଣ କରିଛି। ୧୯୯୦ ଦଶକରେ ଏହା ଆରମ୍ଭ ହୋଇଥିଲା, କିନ୍ତୁ ଗତ ଦଶନ୍ଧିରେ ଏହା ବେଶ୍ ବିକଶିତ ହୋଇଛି। ୧୫ ଫେବୃଆରୀ ୨୦୧୭ରେ, ୧୦୪ ଉପଗ୍ରହ ଏକାସାଙ୍ଗରେ ଉତକ୍ଷେପଣ କରାଯାଇଥିଲା। ସେଥିମଧ୍ୟରୁ ଅଧିକାଂଶ ଆମେରିକା, ଇସ୍ରାଏଲ, ୟୁଏଇ, ଜର୍ମାନୀ ଆଦି ଦେଶର ଥିଲା। ଏଥି ସହିତ ୧୯୭୫ ରୁ ଫେବୃଆରୀ ୨୦୨୨ ପର୍ଯ୍ୟନ୍ତ ଭାରତ ପାଇଁ ୧୨୯ ଉପଗ୍ରହ ଉତକ୍ଷେପଣ କରାଯାଇଛି।