ଲଣ୍ଡନ, ୨୮ା୬: ବ୍ରିଟେନ ପ୍ରତିରକ୍ଷା ମନ୍ତ୍ରଣାଳୟର ୫୦ ପୃଷ୍ଠା ସମ୍ବଳିତ ଗୋପନୀୟ ଦସ୍ତାବିଜ୍ ମଙ୍ଗଳବାର ଦକ୍ଷିଣ ଇଂଲଣ୍ଡର କେଣ୍ଟଠାରେ ଥିବା ଏକ ବସ୍ଷ୍ଟାଣ୍ଡରୁ ମିଳିବା ଘଟଣା ଦେଶରେ ହଇଚଇ ସୃଷ୍ଟି କରିଛି। ଏହି ଡକ୍ୟୁମେଣ୍ଟରେ ବ୍ରିଟେନ ଯୁଦ୍ଧ ଜାହାଜ ଏବଂ ବ୍ରିଟିଶ ସେନା ସମ୍ବନ୍ଧରେ ଗୁପ୍ତ ତଥ୍ୟ ରହିଥିବା ଜଣାଯାଇଛି। କ୍ରିମିଆ ଉପକୂଳରୁ ୟୁକ୍ରେନ ଜଳକ୍ଷେତ୍ର ଦେଇ ବ୍ରିଟେନର ଯୁଦ୍ଧଜାହାଜ ଏଚ୍ଏମ୍ଏସ୍ ଡିଫେଣ୍ଡର ଚଳାଚଳ ଉପରେ ରୁଷିଆର ସମ୍ଭାବ୍ୟ ପ୍ରତିକ୍ରିୟା ବିଷୟରେ ଏହି ଦସ୍ତାବିଜରେ ଉଲ୍ଲେଖ ରହିଛି। ନାଟୋ ଅପରେଶନ ଶେଷ ହେବା ପରେ ଆଫଗାନିସ୍ତାନରେ ବ୍ରିଟିଶ ସେନା ଉପସ୍ଥିତି ଉପରେ ହୋଇଥିବା ଆଲୋଚନା ବାବଦରେ ମଧ୍ୟ ତଥ୍ୟ ରହିଛି। ଗତ ସପ୍ତାହରେ ଏହି ଡକ୍ୟୁମେଣ୍ଟ ହଜିଯାଇଥିବା ଏବଂ ଏ ନେଇ ତଦନ୍ତ ଚାଲିଥିଲା ବୋଲି ପ୍ରତିରକ୍ଷା ମନ୍ତ୍ରଣାଳୟର ଜଣେ ଅଧିକାରୀ କହିଛନ୍ତି। ୟୁକ୍ରେନ ଜଳକ୍ଷେତ୍ର ଦେଇ ଏଚ୍ଏମ୍ଏସ୍ ଡିଫେଣ୍ଡର ଚଳାଚଳ ଘଟଣା ଉପରେ ରୁଷିଆ ବୁଧବାର ତୀବ୍ର ପ୍ରତିକ୍ରିୟା ପ୍ରକାଶ କରିଥିଲା। ଯୁଦ୍ଧଜାହାଜ କ୍ରେମଲିନ ଜଳସୀମା ଦେଇ ଯାତାୟାତ କରିଥିଲା ବୋଲି ରୁଷିଆ କହିବା ସହ କାର୍ଯ୍ୟାନୁଷ୍ଠାନ ଚେତାବନୀ ସ୍ବରୂପ ଗୁଳିଚାଳନା ସହ ଏଚ୍ଏମ୍ଏସ୍ ଡିଫେଣ୍ଡର ଯିବା ବାଟରେ ବୋମା ପକାଇଥିଲା। ପରେ ରୁଷିଆ ମସ୍କୋରେ ଥିବା ବ୍ରିଟିଶ ରାଷ୍ଟ୍ରଦୂତଙ୍କୁ ଏ ନେଇ ସମନ କରିଥିଲା। ତେବେ ଅନ୍ତର୍ଜାତୀୟ ନିୟମ ଅନୁଯାୟୀ ୟୁକ୍ରେନ ଜଳସୀମାରେ ଯୁଦ୍ଧଜାହାଜ ପଶିଥିବା ବ୍ରିଟେନ କହିବା ସହ ରୁଷିଆର ଦାବିକୁ ପ୍ରତ୍ୟାଖାନ କରିଥିଲା। ଯୁଦ୍ଧଜାହାଜ ଚଳାଚଳକୁ ନେଇ ରୁଷିଆ କଡ଼ା ପ୍ରତିକ୍ରିୟା ରଖିପାରେ ବୋଲି ବ୍ରିଟେନ ପୂର୍ବରୁ ଆକଳନ କରିଥିବା ଉକ୍ତ ଡକ୍ୟୁମେଣ୍ଟରୁ ଜଣାପଡ଼ିଛି।