ବ୍ରିଜ୍ଟାଉନ, ୨୯ା୧୧: ବିଶ୍ୱର ଅନେକ ଦେଶକୁ ଶାସନ କରିଥିବା ବ୍ରିଟେନ୍ ହାତରୁ ମୁକୁଳି ଏବେ ନୂଆକରି ଗଣତନ୍ତ୍ର ଦେଶ ହେବାକୁ ଯାଉଛି ବାର୍ବାଡୋସ୍। ସ୍ବାଧୀନ ହେବା ସତ୍ତ୍ୱେ ବ୍ରିଟେନ ମହାରାଣୀ ଏଲିଜାବେଥ୍ ଦ୍ୱିତୀୟ ଔପଚାରିକ ଭାବେ ଦେଶର ରାଷ୍ଟ୍ରମୁଖ୍ୟ ରହିଥିଲେ। ମହାରାଣୀଙ୍କୁ ମୁଖିଆ ପଦରୁ ହଟାଇ ସମ୍ପୂର୍ଣ୍ଣ ରିପବ୍ଲିକ ରାଷ୍ଟ୍ର ହେବାକୁ ଘୋଷଣା କରି ବାର୍ବାଡୋସ୍ ନିଜର ରାଷ୍ଟ୍ରପତି ଚୟନ କରିସାରିଛି। ନୂଆ ରାଷ୍ଟ୍ରମୁଖ୍ୟ ଭାବେ ଗଭର୍ନର ଜେନେରାଲ ସାଣ୍ଡ୍ରା ମାସୋନ୍ ଦାୟିତ୍ୱ ନେବା ପାଇଁ ସୋମବାର ଓ ମଙ୍ଗଳବାର ଦୁଇ ଦିନ ଧରି ସ୍ବତନ୍ତ୍ର ସମାରୋହର ଆୟୋଜନ କରାଯାଇଛି। ଏ ବାବଦରେ ପ୍ରଧାନମନ୍ତ୍ରୀ ମିଆ ଆମୋର ମୋଟ୍ଟେଲୀ ସୂଚନା ଦେଇଛନ୍ତି। ଏଥିରେ ମିଲିଟାରୀ ପରେଡ୍ ସମେତ ଅନ୍ୟ କାର୍ଯ୍ୟକ୍ରମର ବ୍ୟବସ୍ଥା କରାଯାଇଛି। ସମାରୋହରେ ବ୍ରିଟେନ ପ୍ରିନ୍ସ ଚାଲର୍ସଙ୍କୁ ଅତିଥି ଭାବେ ନିମନ୍ତ୍ରଣ କରାଯାଇଛି।
୩ ଲକ୍ଷ ଜନସଂଖ୍ୟାର ଦେଶ ବାର୍ବାଡୋସ ଶହ ଶହ ବର୍ଷ ଧରି ବ୍ରିଟିଶଙ୍କ କବଳରେ ଥିବାବେଳେ ୧୯୬୬ରେ ସ୍ବାଧୀନତା ପାଇଥିଲା। ଏହା ପରେ ମଧ୍ୟ ବ୍ରିଟେନ ମହାରାଣୀ ଔପଚାରିକ ଭାବେ ବାର୍ବାଡୋସ୍ର ରାଷ୍ଟ୍ରମୁଖ୍ୟ ରହିଥିଲେ। ଉପନିବେଶର ଇତିହାସକୁ ପଛରେ ଛାଡ଼ି ଦେଶବାସୀ ନିଜର ରାଷ୍ଟ୍ରମୁଖ୍ୟ ଚାହୁଁଥିଲେ ବୋଲି ମାସୋନ୍ କହିଛନ୍ତି। ଆସନ୍ତା ୩୦ରେ ବାର୍ବାଡୋସ୍ ୫୫ତମ ସ୍ବାଧୀନତା ଦିବସ ପାଳନ କରିବାକୁ ଯାଉଥିବାବେଳେ ଏହି ଅବସରରେ ବ୍ରିଟିଶ ଶାସନରୁ ସମ୍ପୂର୍ଣ୍ଣ ଭାବେ ମୁକୁଳିବାକୁ ସ୍ଥିର କରାଯାଇଛି। ଗତ ଅକ୍ଟୋବରରେ ମାସୋନ୍ଙ୍କୁ ରାଷ୍ଟ୍ରପତି ଭାବେ ନିର୍ବାଚିତ କରାଯାଇଥିଲା। ତେବେ ଆୟୋଜନ ହେବାକୁ ଥିବା ସମାରୋହରେ ପ୍ରିନ୍ସ ଚାଲର୍ସଙ୍କୁ ନିମନ୍ତ୍ରଣ କରାଯିବାକୁ ନେଇ ପ୍ରଧାନମନ୍ତ୍ରୀ ମୋଟ୍ଟେଲୀଙ୍କ ନିଷ୍ପତ୍ତିକୁ ଅନେକେ ସମାଲୋଚନା କରିଛନ୍ତି। ସୂଚନାଯୋଗ୍ୟ, ମହାରାଣୀ ଏଲିଜାବେଥ୍ ଏବେ ବି କାନାଡା, ଅଷ୍ଟ୍ରେଲିଆ, ନ୍ୟୁଜିଲାଣ୍ଡ ଭଳି ଦେଶର ରାଷ୍ଟ୍ରମୁଖ୍ୟ ରହିଛନ୍ତି।